તમારી સાથે આવું થાય છે? માની લો કે તમે ક્લાયન્ટની ઓફિસે પહોંચ્યા છો અને ત્યાં કોઈ મીટિંગમાં વ્યસ્ત છો, એ દરમિયાન ફોન તમને ડિસ્ટર્બ ન કરે એટલે તમે ફોનમાં ડુ-નોટ ડિસ્ટર્બ ફીચર ઓન કર્યું છે. પછી મીટિંગ પૂરી થઈ ગઈ, તમે પોતાની ઓફિસે પરત જવા માટે નીકળી પડ્યા, પરંતુ ડુ-નોટ ડિસ્ટર્બ ફીચર ડિસેબલ કરવાનું ભૂલી ગયા! પછી પત્નીનો કે નજીકના મિત્રનો તમારા પર કોલ આવે ત્યારે તેની રિંગ ન વાગતાં તમારું એ તરફ ધ્યાન જાય નહીં, પરિણામે ઠપકો ખાવો પડે!
આઇફોન આવી પરિસ્થિતિથી બચવાનો એક સરસ ઉપાય આપે છે. તેમાં ડુ-નોટ ડિસ્ટર્બ ફીચરમાં વધુ એક સ્માર્ટ કાળજી લેવામાં આવી છે. તેમાં તમે જ્યારે ડુ-નોટ ડિસ્ટર્બ ફીચર ઓન કરો ત્યારે તમે એ ચોક્કસ લોકેશન પર હો ત્યાં સુધી જ તે ઓન રહે અને લોકેશન છોડો એ સાથે આપોઆપ ડિસેબલ થઈ જાય એવું સેટિંગ કરી શકાય છે!
એ માટે આઇફોનના કંટ્રોલ સેન્ટરમાં જાઓ અને તેમાં ડુ-નોટ ડિસ્ટર્બના આઇકનને જરા લાંબો સમય પ્રેસ કરી રાખો. એ પછી ‘અનટિલ આઇ લીવ ધીસ લોકેશન’ પસંદ કરી લો. હવે ડુ-નોટ ડિસ્ટર્બ ફીચર ઓન થશે, પરંતુ તમે એ લોકેશન છોડશો એ પછી તે આપોઆપ બંધ થશે.
એન્ડ્રોઇડમાં પણ ડુ-નોટ ડિસ્ટર્બની સગવડ છે અને તે આપોઆપ બંધ થાય એવી સગવડ પણ મળે છે, પરંતુ શરતોને આધીન! એન્ડ્રોઇડમાં લોકેશન મુજબ ડુ -નોટ ડિસ્ટર્બ ફીચર સેટ કરવા અમુક ફોનમાં રુલ સેટ કરવો પડે છે. મતલબ કે એવી સુવિધા મળી શકે છે ખરી. એ ઉપરાંત નિશ્ચિત સમય પછી ડુ-નોટ ડિસ્ટર્બ ફીચર ઓફ થાય તેવું સેટિંગ કરી શકીએ છીએ. એ માટે સેટિંગ્સમાં ડુ-નોટ ડિસ્ટર્બ ફીચર શોધી લો અને તેમાં જરૂરી ફેરફાર કરી લો. એન્ડ્રોઇડ ફોનમાં આઇએફટીટીટી જેવી સર્વિસની એપ ઉમેરીને તમે કોઈ ચોક્કસ લોકેશન પર પહોંચો અને એ છોડો ત્યાં સુધી ફોનમાં રિંગટોન બંધ રહે તેવું સેટિંગ કરી શકો છો.
