ખાસ પ્રોફેશનલ્સ માટેના સોશિયલ નેટવર્ક લિંક્ડઇનમાં વીડિયો શેર કરવાનું કામ સહેલું છે પરંતુ હવે માઇક્રોસોફ્ટની માલિકીની આ કંપની લિંક્ડઇનને યુટ્યૂબ, ઇન્સ્ટાગ્રામ કે ટિકટોક જેવું વીડિયો પ્લેટફોર્મ બનાવવાની કોશિશ કરે તેવી સંભાવના છે.

હાલમાં કોઈ યૂઝર પોતાની લિંક્ડઇન પોસ્ટમાં વીડિયો શેર કરે તેને અન્ય યૂઝર્સ જોઈ શકે છે અને તેના પર પોતાની કમેન્ટ્સ પણ આપી શકે છે. આવા વીડિયો સુધી પહોંચવા માટે આપણે જે તે યૂઝરની પોસ્ટ સુધી પહોંચવું પડે. પરંતુ હવે વિવિધ યૂઝર્સ વધુ સહેલાઈથી, તેમને માટે વધુ રિલેવન્ટ હોય તેવા વીડિયો ટાઇમલી ડિસ્કવર કરી શકે તે માટે કંપની પ્રયાસો કરી રહી છે. બીજા શબ્દોમાં કહીએ તો અન્ય સોશિયલ મીડિયા પ્લેટફોર્મની જેમ લિંક્ડઇન પર પણ આપણી હિસ્ટ્રી મુજબ અન્ય યૂઝર્સના વીડિયો તારવીને એક સાથે બતાવવામાં આવે એવી શક્યતા છે. યુટ્યૂબના શોર્ટ્સ કે ઇન્સ્ટાગ્રામના રિલ્સની જેમ લિંક્ડઇનમાં વીડિયોનું એક અલગ બટન ઉમેરાય તથા તેમાં વીડિયોની ફીડ જોઈ શકાય તેવી શક્યતા છે.

લિંક્ડઇન કંપની અન્ય સોશિયલ પ્લેટફોર્મ્સના પોપ્યુલર કન્ટેન્ટ ક્રિએટર્સને લિંક્ડઇન તરફ વાળવાની કોશિશ કરી રહી છે. અલબત્ત લિંક્ડઇનનું અલગ પ્રકારનું ફોક્સ જોતાં આ પ્લેટફોર્મ પર કન્ટેન્ટ ક્રિએટર્સને યુટ્યૂબ, ઇન્સ્ટાગ્રામ કે ટિકટોક જેવો બહોળો યૂઝરબેઝ મળવાની શક્યતા ઓછી છે. દરમિયાન સમાચાર છે કે એક્સ પ્લેટફોર્મ પણ હવે વીડિયો પ્લેટફોર્મ બનવાની મથામણમાં છે. લિંક્ડઇનની જેમ અહીં પણ  અત્યારે યૂઝર્સ દ્વારા જે વીડિયો પોસ્ટ કરવામાં આવે એ બધા જે તે યૂઝરની ફીડમાં જોઈ શકાય છે. બધા યૂઝર્સના ફક્ત વીડિયો એક સાથે જોવાની સગવડ નથી.

હાલમાં ભારતમાં ટિકટોક પર પ્રતિબંધ છે તેથી યુટ્યૂબ અને ઇન્સ્ટાગ્રામને વીડિયો પ્લેટફોર્મ તરીકે મોકળું મેદાન મળ્યું છે.