ભારતમાં અત્યારે લાઇફ ઇન્સ્યોરન્સ, હેલ્થ ઇન્સ્યોરન્સ અને જનરલ ઇન્સ્યોરન્સ એમ મુખ્ય ત્રણ પ્રકારના વીમા ખરીદી શકાય છે. આ બંનેના પાછા બીજા અનેક પેટા પ્રકાર. એટલું ઓછું હોય તેમ આ બધા પ્રકારના વીમા ઓફર કરતી કંપનીઓ પણ અનેક. તમે પોતાને માટે કોઈ પણ પ્રકારનો વીમો ખરીદવાનું વિચારો તો કેટલીય ગૂંચવણનો સામનો કરવાનો થાય.

આના ઉપાય તરીકે વર્ષોથી વીમા કંપનીઓ પોતાના એજન્ટની મદદ લેતી આવી છે. એજન્ટ વીમો લેવા ઇચ્છતી વ્યક્તિ અને વીમા કંપની વચ્ચે કડીનું કામ કરે.

મોટા ભાગના એજન્ટ જુદી જુદી ઘણી કંપનીનું કામ કરતા હોય, આથી તે લોકોની જરૂરિયાત સમજીને તેમને (અથવા પોતાને!) સૌથી વધુ ફાયદાકારક થાય તેવી પોલિસી પસંદ કરવામાં મદદ કરી શકે.

આ પદ્ધતિ વર્ષોથી ચાલતી રહી છે. એ પછી પાછલાં થોડાં વર્ષોથી ઇન્ટરનેટ અને સ્માર્ટફોનનો ઉપયોગ વધ્યા પછી જુદી જુદી વીમા કંપનીઓએ પોતાની પોલિસી ઓનલાઇન વેચવાની શરૂઆત કરી અને તેમાં એજન્ટ્સને આપવા પડતા કમિશન તથા ખર્ચમાં જે ઘટાડો થયો તેનો ઘણો ખરો લાભ વીમા ગ્રાહકોને આપવાનું શરૂ કર્યું.

ઓનલાઇન વીમો ખરીદી શકતી વ્યક્તિ ભણેલી ગણેલી હોય, સ્માર્ટ હોય અને પોતાના સ્વાસ્થ્યની કાળજી રાખી શકે તેવી હોય એવી ગણતરી પણ મૂકવામાં આવી અને આ બધાને કારણે, ઓનલાઇન વીમો ખરીદવામાં આવે તો તેનું પ્રીમિયમ ઓછું ચૂકવવું પડે.

ભારતમાં અત્યારે સંખ્યાબંધ કંપની, અનેક પ્રકારની વીમા પ્રોડક્ટ્સ ઓફર કરે છે. તેની સરખામણી અને ખરીદી સહેલી બનાવે તેવાં ઓનલાઇન પ્લેટફોર્મ વધી રહ્યાં છે. હવે ભારત સરકાર પોતે આવા સૌથી વિશાળ પ્લેટફોર્મ સાથે તેમાં ઝંપલાવી રહી છે.

જુદી જુદી વીમા કંપનીઓએ પોતેપોતાની પોલિસીઓ ઓનલાઇન વેચવાની શરૂ કરી એ જ રીતે ઇન્સ્યોરન્સ માટેનાં ઓનલાઇન પ્રાઇવેટ પ્લેટફોર્મ્સ પણ વિકસ્યાં. 

આવાં પ્લેટફોર્મને રોજબરોજની ચીજવસ્તુઓની ખરીદી માટેની ઓનલાઇન શોપિંગ સાઇટ્સ સાથે સરખાવી શકાય. આ બધાં પ્લેટફોર્મ પર આપણે એજન્ટની મદદ વિના જુદી જુદી કંપનીની જુદા જુદા ઘણા પ્રકારની વીમા પ્રોડક્ટ્સનાં ફીચર સરખાવી શકીએ, તેના પ્રીમિયમની ગણતરી કરી શકીએ અને પછી તેના આધારે કોઈ ચોક્કસ વીમો ખરીદવા તરફ આગળ વધી શકીએ. એ પછીનું આપણું બધું કામકાજ જે કંપનીનો વીમો ખરીદ્યો હોય તેની સાથે કરવાનું થાય.

‘બીમા સુગમ’થી અત્યાર સુધીની આ ઘરેડમાં મોટા ફેરફાર આવી રહ્યા છે.