તમારી પાસે સ્માર્ટફોન હોય તો ઘણું કરીને હવે તમે પણ યુનિફાઇડ પેમેન્ટ ઇન્ટરફેસ (યુપીઆઈ)નો ઉપયોગ શરૂ કરી દીધો હશે. જો એમ હોય તો તમારે માટે એક સારા સમાચાર છે. સામાન્ય રીતે યુપીઆઈ એકદમ સલામત વ્યવસ્થા છે અને આપણે પોતે કોઈ ભૂલ કે ગફલત ન કરીએ તો તેમાં થતું ટ્રાન્ઝેકશન સલામત રહે છે. કોઈ કારણસર આપણે કોઈને યુપીઆઈ દ્વારા મોકલેલી રકમ સામેની વ્યક્તિના ખાતામાં ન પહોંચે તો તે ફરી આપણા ખાતામાં જમા થાય છે, પરંતુ એ માટે આપણે ધીરજ રાખવી પડે છે.

હવે  યુપીઆઈનું સંચાલન કરતા નેશનલ પેમેન્ટ્સ કોર્પોરેશન ઓફ ઇન્ડિયા (એનપીસીઆઈ)ના એમડી અને સીઇઓએ જણાવ્યા અનુસાર આખી વ્યવસ્થા હજી વધુ સલામત બનશે. તેમણે જણાવ્યા અનુસાર એનપીસીઆઈમાં અત્યારે યુપીઆઈ આધારિત પેમેન્ટમાં થતા ડિસ્પ્યુટ વાસ્તવિક સમયમાં જ ઉકેલતી વ્યવસ્થા વિકસાવવા પર કામ ચાલી રહ્યું છે. આ વ્યવસ્થા સપ્ટેમ્બર ૨૦૨૨ સુધીમાં કાર્યરત થઈ જાય તેવી શક્યતા છે. વિવિધ યુપીઆઈ એપમાં જ આ ફીચર ઉમેરાઈ જશે અને એ પછી યુપીઆઈ એપમાંથી પેમેન્ટ બાબતે કોઈ તકલીફ સર્જાય તો ૮૦ થી ૯૦ ટકા કિસ્સામાં તેનો તરત ને તરત ઉકેલ આવી જશે.

આ વ્યવસ્થા પૂરેપૂરી અમલી થશે એ પછી આપણે યુપીઆઈથી કરેલું પેમેન્ટ નિષ્ફળ જાય અને રકમ આપણા ખાતામાંથી ડેબિટ થઈ જાય તો આપણે બેન્ક કે અન્ય કોઈ જગ્યાએ મદદ માટે સંપર્ક કરવાની જરૂર રહેશે નહીં. એપમાં જ આપણને મદદ કરતું એક ફીચર રહેશે. તેમાં આપણી વિગતો આપતાં પેમેન્ટ સંબંધિત ડિસ્પ્યુટ તરત ને તરત ઉકેલાઈ જશે.

એનપીસીઆઇએ યુપીઆઈની સગવડ આપતી તમામ બેન્ક તથા અન્ય યુપીઆઈ એપ્સને આ નવી ઓનલાઇન ડિસ્પ્યુટ રિઝોલ્યુશન સિસ્ટમ સપ્ટેમ્બર ૨૦૨૨ સુધીમાં પોતાની સર્વિસમાં એક્ટિવેટ કરવાની તાકિદ કરી દીધી છે. એમ કરવામાં નિષ્ફળ જનારી કંપની પોતાની યુપીઆઈ વ્યવસ્થામાં નવા કસ્ટમર્સ ઉમેરી શકશે નહીં.