ઓફિસ પ્રોગ્રામ્સ – આ શબ્દો કાને પડતાં આપણા મનમાં માત્ર ને માત્ર વર્ડ, એક્સેલ અને પાવરપોઇન્ટ જેવા પ્રોગ્રામ્સનો વિચાર ઝબકે. આખી દુનિયામાં ઓફિસના કામકાજમાં પર્સનલ કમ્પ્યૂટર્સ અને તેમાં વિન્ડોઝ ઓપરેટિંગ સિસ્ટમ તથા માઇક્રોસોફ્ટ ઓફિસ પ્રોગ્રામ્સનું વર્ષો સુધી લગભગ એકચક્રી શાસન રહ્યું.  તેના કોઈ વિકલ્પો હશે એવી પણ ઘણા લોકોને ખબર નહીં હોય! આ રાજ એવું કે માઇક્રોસોફ્ટના સ્થાપક બિલ ગેટ્સ વર્ષો સુધી દુનિયાના સૌથી વધુ ધનિકના સ્થાન પર ટકી રહ્યા.

ઓફિસની દુનિયામાં વર્ષોથી માઇક્રોસોફ્ટ ઓફિસ પ્રોગ્રામ્સનું લગભગ એકચક્રી શાસન રહ્યું છે.

ઓફિસનું કામકાજ કરવા માટે માઇક્રોસોફ્ટ ઓફિસના પ્રોગ્રામ્સ અત્યંત પાવરફુલ છે એ વાત સાચી, પરંતુ ઓફિસ પ્રોગ્રામ્સ એટલે માત્ર માઇક્રોસોફ્ટ એવું નથી. કંપનીના પ્રોગ્રામ્સ એક વાર કિંમત ચૂકવીને ખરીદી શકાય તેવા અથવા હવે વાર્ષિક લવાજમ સ્વરૂપે ઉપલબ્ધ હોવાથી ઘણા લોકોને તે પરવડે તેમ નથી.

વ્યક્તિગત ઉપયોગ માટે તે મોટા ભાગના લોકોને ચોક્કસ મોંઘા પડે. કંપની નાની હોય ત્યારે સોફ્ટવેરની કિંમત આકરી લાગે અને કંપની બહુ મોટી થાય, તો બહુ મોટી સંખ્યામાં સોફ્ટવેર લાઇસન્સ લેવાનાં થાય એટલે કોસ્ટ કટિંગનો વિચાર આવે! સરકારી વિભાગો કે શાળાઓમાં પણ આ જ કારણે માઇક્રોસોફ્ટના પ્રોગ્રામ્સના વિકલ્પો તરફ નજર દોડાવવી પડે.

આવા ઘણા વિકલ્પો છે પણ ખરા.

તમને આ પ્રોગ્રામ્સ મોંઘા પડતા હોય કે તેમાં મળતાં બધાં ફીચર્સની તમારે જરૂર ન હોય તો તેના જુદા જુદા વિકલ્પો પણ હવે છે.

માઇક્રોસોફ્ટના દરેક પ્રોગ્રામ પાર વગરની ખૂબીઓ ધરાવે છે, પણ દરેકને આ બધી ખૂબીઓની જરૂર ન પણ હોય. તમે કે તમારી કંપની પણ આ કેટેગરીમાં આવતા હો તો તમે તેના વિકલ્પો તપાસી શકો છો.

વ્યક્તિગત ઉપયોગ કે નાની કંપની, સંસ્થા માટે આ વિકલ્પો બિલકુલ ફ્રી છે ને તમારી જરૂરિયાતો ઘણે અંશે પૂરી કરી શકે છે.

આગળનાં પાનાંઓ પર માઇક્રોસોફ્ટના મુખ્ય ઓફિસ પ્રોગ્રામ્સની નજીકના કે હજી થોડા દૂરના કેટલાક વિકલ્પોની વાત કરી છે. આ વિકલ્પો તપાસતી વખતે આપણે એ વાત પર ધ્યાન આપ્યું છે કે હવે આખી દુનિયા ક્લાઉડ તરફ, બધું કામકાજ ક્લાઉડમાં કરવા વળી રહી છે. આથી આપણે ડેસ્કટોપમાં ઇન્સ્ટોલ કરી શકાય તથા માત્ર વેબ પર કામ કરી શકાય એવા બંને પ્રકારના વિકલ્પોની વાત કરી છે.

તમારું કામકાજ પ્રમાણમાં મર્યાદિત હોય કે તમારી કંપનીની જરૂરિયાતો ઓછી હોય તો તમે આ વિકલ્પો તપાસી શકો છો.

ડેસ્કટોપમાં ડાઉનલોડ માટે વિકલ્પો

વ્યક્તિગત કે ઓફિસ ઉપયોગ માટે તમે પીસી કે ડેસ્કટોપમાં કામ કરી શકાય એવા બિલકુલ મફત ઓફિસ પ્રોગ્રામ્સ શોધી રહ્યા હો, તો અહીં આપેલા ચારેય વિકલ્પ ધ્યાનથી તપાસવા જેવા છે.

એટલું યાદ રાખશો કે અહીં જણાવેલા પ્રોગ્રામ્સ મફત છે એ જ તેમનું સૌથી મોટું જમા પાસું છે. વર્ડ, એક્સેલ કે પાવરપોઇન્ટ જેટલાં ફીચર્સ આ ફ્રી પ્રોગ્રામ્સમાં સહેલાઈ ન મળે કે તમને તેનો ઉપયોગ ન ફાવે એવું બની શકે છે. એટલી ખાતરી છે કે આ બધા પ્રોગ્રામ્સમાં માઇક્રોસોફ્ટ ઓફિસની ફાઇલ્સ સાથે સહેલાઈથી કામ પાર પાડી શકાય છે.

ઓનલાઇન કામ લાગે તેવા વિકલ્પો

તમને સતત સારું ઇન્ટરનેટ કનેક્શન મળતું હોય અને તમારી ફાઇલ્સ મોટા ભાગે ક્લાઉડમાં જ સ્ટોર કરતા હો, તો માઇક્રોસોફ્ટ ઓફિસના વિકલ્પ તરીકે નીચેના મફત પ્રોગ્રામ્સ તપાસી શકાય.

નવા સમય અને વર્ક-ફ્રોમ-હોમ કે વર્ક-ફ્રોમ-એનીવ્હેર જેવા આજના ટ્રેન્ડ્સને ધ્યાનમાં લેતાં, આપણું બધું જ કામકાજ ક્લાઉડમાંથી થાય અને ત્યાં જ સેવ્ડ રહે તે સૌથી સારો વિકલ્પ છે. પરંતુ એ માટે, વિવિધ ડિવાઇસમાં અને વિવિધ જગ્યાએ આપણને ઝડપી અને વિશ્વસનીય નેટ કનેક્શન મળે તે જરૂરી છે.