તમે તમારા એન્ડ્રોઇડનો પાસવર્ડ ભૂલી ગયા હો કે તેમાં સેટ કરેલી પેટર્ન યાદ ન આવતી હોય કે ફિંગરપ્રિન્ટ પણ કોઇક કારણસર ચાલતી ન હોય તો ફોનને રીસેટ કરીને તેને ફરી, નવેસરથી સેટઅપ કરવાનો એક જ વિકલ્પ રહે છે.

યાદ રાખશો કે આ રીતે ફોનને રીસેટ કરવા જતાં ફોનમાં સેવ કરેલ તમામ એપ્સ, ફાઇલ્સ, ફોટોઝ, મ્યુઝિક વગેરે બધું ભૂંસાઈ જશે. જો તમે ફોનમાંના ડેટાનો ગૂગલ એકાઉન્ટમાં બેકઅપ લેતા હો તો ફોન રીસેટ કર્યા પછી બધો જ ડેટા ફરીથી રીસ્ટોર કરી શકાશે.

આપણે એન્ડ્રોઇડ ફોનને બીજા કોઈ પણ સ્માર્ટ ફોન કે કમ્પ્યૂટરની મદદથી રીસેટ કરી શકીએ છીએ. પરંતુ એ માટે કેટલીક આકરી શરતો છે, જેમ કે…

પહેલી શરત : આપણો ફોન ઓન હોવો જોઇએ. આ શરતનું પાલન સહેલું છે. આપણા ફોનની બેટરી સારી એવી ચાર્જ઼્ડ હોય ત્યારે તેને ફક્ત ઓન કરવાનો છે.

બીજી શરત : આપણે ફોનમાં ગૂગલ એકાઉન્ટમાં લોગ્ડ-ઇન હોવા જોઇએ. આ શરતનું પાલન પણ સહેલું છે કેમ કે આપણે એન્ડ્રોઇડ સ્માર્ટફોનનો ઉપયોગ કરતા હોઇએ તો લગભગ તમામ સંજોગમાં તેમાં ગૂગલ એકાઉન્ટમાં સાઇન-ઇન હોઇએ જ.

ત્રીજી શરત : આપણા ફોનમાં મોબાઇલ ડેટા કે વાઇ-ફાઇથી ઇન્ટરનેટ કનેકશન ઓન હોવું જોઇએ. આ શરત આકરી છે કેમ કે જો તમને ફોનમાં સતત બંને રીતે ઇન્ટરનેટ કનેક્ટિવિટી ઓન રાખવાની આદત ન હોય તો આ શરતનું પાલન થશે નહીં. ફોનમાં દાખલ થયા વિના તેને ઓન કરી શકાશે નહીં. એ સંજોગમાં આપણને બીજા ફોન કે કમ્પ્યૂટરમાંથી, જેને અનલોક કરી શકાતો નથી એ ફોનની એક્સેસ મળશે નહીં.

ગૂગલ અને એપલ બંને કંપની પોતપોતાના ફોનમાં ખોટી રીતે એન્ટર થવાનું કામ લગભગ અશક્ય બનાવી રહી છે. અહીં જણાવેલા ઉપાય ઉપરાંત, કેટલીક થર્ડ પાર્ટી એપ્સ કે સોફ્ટવેરની મદદથી આ કામ થઈ શકે, પરંતુ તેમાં ડેટાની સલામતી નથી. આથી અહીં બંને કંપની પોતે જે ઉપાય આપે છે તેની જ વાત કરી છે.

ચોથી શરત : આપણો ફોન ગૂગલ પ્લેમાં દેખાવો જોઇએ. આ શરતનું પાલન બહુ મુશ્કેલ નથી. ફોનમાં ગૂગલ એકાઉન્ટથી લોગ-ઇન હોઈશું તો તે ગૂગલ પ્લેમાં દેખાવાનો છે.

પાંચમી શરત : ફોનમાં લોકેશન સર્વિસ ઓન હોવી જોઇએ. આ શરત પણ આકરી છે. તમે ગૂગલ કે અન્ય એપ્સ તમને સતત ટ્રેક ન કરે એ માટે તેમાં લોકેશન સર્વિસ ઓફ રાખતા હો તો ફોન અનલોક ન કરી શકાતો હોય કે ફોન ખોવાઈ જાય ત્યારે ગૂગલ તરફથી મળતી સગવડોનો આપણે લાભ લઈ શકીએ નહીં.

છઠ્ઠી શરત : ફોનમાં ‘ફાઇન્ડ માય ડિવાઇસ’ સર્વિસ ઓન હોવી જોઈએ. આ શરત પણ આકરી છે પરંતુ તેનું પાલન બહુ મુશ્કેલ નથી. તમે ફોનમાં ગૂગલ એકાઉન્ટ એડ કરો તે પછી ફાઇન્ડ માય ડિવાઈસ ઓટોમેટિકલી ઓન થઈ જાય છે. તમે પોતે સમજી વિચારીને બંધ કરેલ હોય તો આવે સમયે ગૂગલની સગવડનો લાભ મળશે નહીં.

હવે આગળ વધો…

જો આ બધી શરતોનું પાલન થતું હોય તો  બીજા કોઈ પણ કમ્પ્યૂટર કે સ્માર્ટફોનમાં બ્રાઉઝરમાં https://android.com/find વેબપેજ પર જાઓ. અહીં તમારા ગૂગલ એકાઉન્ટથી લોગ-ઇન થાઓ. આથી તમારો ફોન અત્યારે ક્યાં છે તે મેપ પર જોવા મળશે. સાથોસાથ ડાબી પેનલમાં, દૂરબેઠાં ફોનમાં લઈ શકાય તેવાં એક્શન્સ જોવા મળશે. જો તમે એક ગૂગલ એકાઉન્ટનો એકથી વધુ સ્માર્ટફોનમાં ઉપયોગ કરતા હો તો જે ફોનમાં અનલોક થઈ શકતા નથી તેને પસંદ કરો.

અહીંથી તમે ફોનમાંનો બધો ડેટા ઇરેઝ કરી શકશો. એ સાથે ફોનમાં તમે સેટ કરેલ પાસવર્ડ કે પેટર્ન કે ફિંગરપ્રિન્ટની વિગતો પણ ભૂંસાઈ જશે. આ પછી ફોન નવે નવો લીધો હોય એ રીતે તેને ફરીથી સેટ-અપ કરી શકાશે. આ પછી તમે એન્ડ્રોઇડ ફોનમાં નવેસરથી પિન, પેટર્ન કે ફિંગરપ્રિન્ટ લોક સેટ કરી શકશો. તમારા મૂળ ગૂગલ એકાઉન્ટથી તેમાં લોગઇન થતાં જો તમે ગૂગલ એકાઉન્ટમાં ફોનનો બેકઅપ લેતા હો તો બધી જ એપ્સ અને ડેટા રીસ્ટોર થશે!

ફોન લોક્ડ હોય અને તમે તેને અનલોક કરી શકતા ન હો, તો પાવર અને વોલ્યુમ બટનની મદદથી પણ તેને સહેલાઈથી રીસેટ કરી શકાય છે. અલબત્ત, દરેક કંપનીના મોડેલ અનુસાર, એન્ડ્રોઇડ ફોનને રીસેટ કરવાની વિધિ થોડી થોડી જુદી હોઈ શકે છે.

આ રીતે પણ ફોન રીસેટ કરતાં તેમાંનો બધો ડેટા ભૂંસાઈ જશે અને તમારે નવેસરથી તેને સેટ અપ કરવો પડશે.