ગૂગલે વર્ષ ૨૦૧૮થી ભારતમાં રેલવે સ્ટેશન્સ પર ફ્રી વાઇ-ફાઇ આપવાનો પ્રોજેક્ટ શરૂ કર્યો હતો. એ પછી ૪૦૦ જેટલાં સ્ટેશન્સ પર આ સર્વિસ ઉપલબ્ધ થઈ ગઈ હતી અને રેલવેમાં મુસાફરી કરતા પ્રવાસીઓ સ્ટેશન પર ફ્રી વાઇ-ફાઇનો લાભ લઈ શકતા હતા.
ગયા મહિને ગૂગલે જાહેરાત કરી છે કે હવે ભારતમાં સમગ્ર વિશ્વમાં લગભગ સૌથી ઓછા દરે મોબાઇલ ડેટા ઉપલબ્ધ થવા લાગ્યો હોવાથી ભારતમાં ફ્રી વાઇ-ફાઇ આપવાની જરૂર રહી નથી અને તેથી ગૂગલ રેલવે સ્ટેશન્સ પર ફ્રી વાઇ-ફાઈ આપવાનો પ્રોજેક્ટ સમેટી લેશે.
જોકે આ સુવિધા ભારતીય રેલવેની રેલટેલ સર્વિસના સહયોગમાં આપવામાં આવી રહી હતી અને રેલટેલ કંપનીએ ચોખવટ કરી છે કે ગૂગલ તેનો પ્રોજેક્ટ સમેટી લેશે તો પણ તે ફ્રી વાઇ-ફાઇ આપવાનું ચાલુ રાખશે! ગૂગલ માત્ર એ અને સી કેટેગરીનાં ૪૧૫ સ્ટેશન્સ પર ફ્રી વાઇ-ફાઈ સુવિધા આપતી હતી જ્યારે રેલટેલ બી, સી અને ડી કેટેગરીનાં સ્ટેશન્સ સહિત કુલ ૫,૬૦૦ સ્ટેશન્સ પર ફ્રી વાઇ-ફાઇ આપે છે.
રેલટેલ અને ગૂગલનો કોન્ટ્રેક્ટ આ વર્ષે પૂરો થઈ રહ્યો છે પરંતુ રેલટેલ અન્ય કંપનીના સહયોગમાં આ મફત સર્વિસ ચાલુ રાખશે.
