ફોટોગ્રાફી જેટલી અદભુત કલા છે, એટલી જ આનંદમય પ્રવૃત્તિ ફોટોગ્રાફ્સમાંથી સરસ આલબમ બનાવવાની છે. આલબમ કુટુંબીઓ અને મિત્રોને બતાવવામાં તો મજા આવે જ, પોતે પણ તેને વારંવાર જોવાનો આનંદ કંઈક જુદો જ છે.
આજની અતિ વ્યવસ્ત જિંદગીમાં, સ્માર્ટફોનને કારણે ફટાફટ સંખ્યાબંધ ફોટોગ્રાફ લેવાની સગવડ મળી ગઈ છે, પણ એ બધા ફોટોઝને યોગ્ય રીતે મેનેજ કરવાનો કે ગમતા ફોટોઝ અલગ તારવીને સરસ આલબમ બનાવવાનો સમય કોની પાસે છે?
આવો સમય આપણામાં કોઈ પાસે ભલે ન હોય, ગૂગલ પાસે છે! આ અંકની કવરસ્ટોરીનું ફોકસ ગૂગલ+ના ફોટોઝ વિભાગમાં ઉમેરાયેલી એક નવી સુવિધા છે. તમે તેનો લાભ લઈને કોઈ મજાની ફોટોસ્ટોરી ડેવલપ કર્યાનો આનંદ માણો, તો સ્ટોરી નહીં તો તેનો આનંદ જરૂર શેર કરશો.
આ અંકમાં શેરિંગ અને સોશિયલ મીડિયા પર થોડો વિશેષ ઝોક છે. સોશિયલ મીડિયાનો વ્યાપ વધતો જાય છે તેમ તેમ તેના ઉપયોગ વિશે વધુ જાણવાની જિજ્ઞાસા પણ વધતી જાય છે. આ ધ્યાને રાખીને, વધુ જાણીતી પણ પ્રમાણમાં ઓછી વપરાતી ટવીટર સર્વિસ વિશે અહીં મુદ્દાસર વાત આલેખી છે. જુદી જુદી સાઇટ્સ પરથી સોશિયલ શેરિંગ કેવી રીતે કરાય અને તેનું મહત્ત્વ કેમ વધી રહ્યું છે એ મુદ્દો એક વાચક મિત્રના સવાલના આધારે એફએક્યુમાં આવરી લીધો છે.
સોશિયલ સાઇટ્સની કારકિર્દી પર કેવી અસર છે એ વિશેનું એક સર્વેક્ષણ પણ ખાસ નોંધપાત્ર છે અને કોલેજમાંથી બહાર નીકળી રહેલા વિદ્યાર્થીઓએ ખાસ સમજવા જેવું છે.અને હા, ‘સાયબરસફર’ની વેબસાઇટ હવે બિલકુલ નવા સ્વરૂપે તૈયાર કરવામાં આવી છે. તેમાં ઘણું વધુ કરવાનું આયોજન છે. તમારાં સૂચનો જરૂર મોકલશો!
– હિમાંશુ