અમેરિકનો ફેસબુક પર રાજકીય જાહેરાતો સામે અકળાયા
અમેરિકનો સર્વેક્ષણો કરવામાં પાવરધા છે અને હમણાં ત્યાં પ્રમુખપદની ચૂંટણી નજીક આવી રહી હોવાથી સર્વેક્ષણોના માર્કેટમાં તેજી આવવાની એ વાત નક્કી છે.
અમેરિકામાં ચૂંટણી સમયે સોશિયલ મીડિયાનો જબરજસ્ત ઉપયોગ થાય છે એ તો જાણીતી વાત છે, પણ હવે અમેરિકનો જ તેનાથી કંટાળવા લાગ્યા છે.
ત્યારે ત્યાં એવું બની રહ્યું છે કે જે ફેસબુકના અમેરિકન યુઝર્સે પોતાના પ્રોફાઇલને પ્રાઇવેટ રાખ્યો હોય, તેમાંની વિગતો અનુસાર, ફેસબુક રાજકીય પક્ષો અને ઉમેદવારોની ટાર્ગેટેડ એડ્સનો યુઝર્સ પર મારો ચલાવે છે.
આ વિશે હમણાં થયેલા આવા એક સર્વેક્ષણમાં કેટલાંક ખરેખર રસપ્રદ તારણો બહાર આવ્યાં છે. જે મુજબ, ૮૫ ટકા લોકોએ કહ્યું કે તેમના પ્રાઇવેટ પ્રોફાઇલની વિગતો અનુસાર ફેસબુક તરફથી તેમના પર રાજકીય જાહેરાતો મોકલવામાં આવતી હોય તો તેની સામે તેમને સખ્ખત વાંધો છે. અમેરિકનો એટલા અકળાયા છે કે ૭૦ ટકાએ કહ્યું કે તેમની જાણ બહાર આ રીતે તેમને ટાર્ગેટ બનાવીને એડ કરવામાં આવતી હોય તો ભલે તેઓ એ ઉમેદવારને ટેકો આપતા હોય, તેઓ તેની વિરુદ્ધ મત આપતાં અચકાશે નહીં!
ચૂંટણીનો લેવાય તેટલો લાભ લેવા માટે ફેસબુકે હવે આપણા પિનકોડ જેવા જે તે ઝિપકોડના વિસ્તાર પૂરતી જ જાહેરાત દેખાય એવી વ્યવસ્થા પણ શરૂ કરી છે.
