બહુ લાંબા સમયથી જેની જરૂરિયાત વર્તાઈ રહી હતી તે પગલું આખરે લેવામાં આવ્યું છે. ગૂગલ પ્લે સ્ટોરમાં સરકારની સત્તાવાર એપ્સ પર હવે ‘ગવર્નમેન્ટ’ બેજ જોવા મળશે. આ બેજને આપણે ક્લિક કરીશું તો જણાવવામાં આવશે કે આ એપ કોઈ સરકારી સંસ્થા સાથે સંકળાયેલી હોવાની ગૂગલ પ્લે સ્ટોર દ્વારા ખાતરી કરવામાં આવી છે.

આવી ખાતરી મળવી બહુ જરૂરી હતી. ભારતમાં દરેક જાણીતી સરકારી (કે બિનસરકારી) પહેલ લોકોમાં જિજ્ઞાસા જગાવે એ સાથે તેનો લાભ લૂંટી લેવા માટે પાર વગરની એપ ફૂટી નીકળતી હોય છે.

આધાર, આયુષ્યમાન ભારત, આત્મનિર્ભર ભારત વગેરે કોઈ પણ એવી સરકારી યોજના જેનાથી સામાન્ય લોકોને લાભ મળવાની શક્યતા હોય, પરંતુ જેના વિશે પૂરતી લોકજાગૃતિ ન હોય એવા વિષયો વિશે લોકો તરત જ એપ કે વેબસાઇટ્સ બનાવી લેતા હોય છે.

આવી એપ કે વેબસાઇટ્સ મોટા ભાગે બે પ્રકારની હોય છે. પહેલા પ્રકારની એપ જે તે યોજના વિશે શક્ય એટલી માહિતી આપવાનો પ્રયાસ હોય છે અને તેના બદલામાં જે તે એપ કે વેબસાઇટ પર જાહેરાતો દર્શાવીને તેમાંથી આવક મેળવવાનો પ્રયાસ હોય છે. આવી એપ કે વેબસાઇટમાં યોગ્ય અને સાચી માહિતી આપવામાં આવી હોય તો તે સામાન્ય લોકો માટે હાનિકારક હોતી નથી. પરંતુ ઘણી એપ કે વેબસાઇટ માત્ર બદઇરાદાથી તૈયાર કરવામાં આવી હોય છે. આવી એપ/વેબસાઇટમાં જે તે યોજનાનો લાભ અપાવવાના નામે ખોટી લિંક તરફ લોકોને દોરી જવામાં આવે છે અને ત્યાંથી તેમની માહિતી ચોરીને કોઈ ને કોઈ રીતે ફ્રોડ કરવાનો આશય હોય છે. પ્લે સ્ટોરમાં સાચી અને બદઇરાદાવાળી એપને અલગ તારવવાનું બહુ મુશ્કેલ છે.

એ જ કારણે કોઈ પણ બાબત વિશેની સત્તાવાર એપ માટે ‘ગવર્નમેન્ટ’નો ઓફિશિયલ બેજ મૂકવાનું પગલું આ દૂષણને નાથવામાં મહત્ત્વપૂર્ણ સાબિત થશે. ભારત ઉપરાંત અન્ય કેટલાય દેશોમાં ગૂગલે આ રીતે ગવર્નમેન્ટ બેજ દર્શાવવાનું શરૂ કર્યું છે.