કોરોનાની રસી આવી ગયા પછી પણ લાંબા સમય સુધી આપણને માસ્ક પહેરવામાંથી છૂટકારો મળે એવી શક્યતાઓ દેખાતી નથી. આ સ્થિતિમાં ફેસિયલ રેક્ગ્નિેશન ટેકનોલોજીના ઉપયોગમાં માસ્ક એક મોટો અવરોધ બની શકે તેમ છે. પરંતુ હવે તેના પણ ઉપાય શોધાઈ રહ્યા છે.
જાપાનની એક કંપનીએ હવે ચહેરો ઓળખવાની એવી ટેકનોલોજી વિકસાવી છે જેમાં વ્યક્તિએ માસ્ક પહેર્યો હોય ત્યારે પણ તેની ઓળખ થઈ શકે છે. આવા કિસ્સામાં વ્યક્તિના ચહેરાના માસ્ક વગરના ભાગની લાક્ષણિકતાઓ, ખાસ કરીને આંખ પર વધુ ફોકસ કરવામાં આવે છે.
આ ટેકનોલોજીમાં યૂઝરનો, માસ્ક વગરના ચહેરાનો ફોટોગ્રાફ સિસ્ટમને અગાઉથી મળ્યો હોવો જરૂરી છે. કંપનીના દાવા અનુસાર, આ ટેકનોલોજી માસ્ક પહેરેલી વ્યક્તિની પણ ૯૯.૯ ટકા ચોકસાઈ સાથે સાચી ઓળખ કરી શકે છે. જાપાનમાં કોરોના મહામારી પહેલાંના સમયથી લોકોમાં માસ્ક પહેરવાનું વલણ હતું.
