ગયા મહિને, માઇક્રોસોફ્ટ કંપનીની વિન્ડોઝ ઓપરેટિંગ સિસ્ટમમાં એક ગંભીર ખામી સર્જાઇ અને તેના પર આધારિત દુનિયાભરનાં લાખો કમ્પ્યૂટર્સ અટકી પડ્યાં. અનેક દેશોની એરલાઇન્સ, હોસ્પિટલ્સ અને અન્ય ઇમરજન્સી સર્વિસિસ ખોરવાઈ ગઈ. અનેક બિઝનેસ પણ અટકી પડ્યા. આમ થવાનું કારણ મૂળ માઇક્રોસોફ્ટમાં નહોતું. તેને માટે સિક્યોરિટી અપડેટ્સ આપતી કંપનીના અપડેટ્સમાં ખામીને કારણે કમ્પ્યૂટર્સ ઠપ્પ થઈ ગયાં. આપણાં વ્યક્તિગત કમ્પ્યૂટર્સ એ કંપનીની સેવા લેતાં નહોતાં એટલે આપણે બચી ગયા.

આ પ્રકારના ગ્લોબલ આઉટેજ ભાગ્યે જ સર્જાય છે. એટલે આપણે વ્યક્તિગત બહુ ચિંતા કરવાની જરૂર નથી – જે બધાનું થાય તે આપણું થાય! આમ છતાં આવા ગ્લોબલ આઉટેજથી બચવાના ઉપાય છે (જે સચોટ નથી).

1. વિન્ડોઝ અપડેટ ન કરવાઃ આમાં દેખીતી રીતે જોખમ છે. આવા ઉપાયનો વિચાર પણ ન કરી શકાય.
2. વિન્ડોઝને બદલે લિનક્સ ઓપરેટિંગ સિસ્ટમનો ઉપયોગ કરવોઃ લિનક્સ ચોક્કસપણે વધુ સલામત ઓએસ છે. પરંતુ આપણે જેનો નિયમિત રીતે ઉપયોગ કરતા હોઇએ એ તેમાં ઘણાં સોફ્ટવેર તેમાં ન ચાલી શકે તેવું બની શકે. સૌ માટે આ સહેલો ઉપાય નથી.
3. વિન્ડોઝને બદલે એપલની મેક ઓએસનો ઉપયોગ કરવોઃ આ પણ સૌ માટે સહેલો ઉપાય નથી કેમ કે વિન્ડોઝની સરખામણીમાં મેક કમ્પ્યૂટર્સ ખાસ્સા મોંઘા છે!

આમ આપણે રોજિંદા ઉપયોગ માટે માઇક્રોસોફ્ટ વિન્ડોઝ અને તેના અપડેટ્સ પર આધાર રાખ્યા વિના છૂટકો નથી. જ્યારે આપણું કામકાજ માઇક્રોસોફ્ટ વિન્ડોઝ કમ્પ્યૂટર પર તથા તેની ક્લાઉડ સ્ટોરેજ પર આધારિત હોય ત્યારે બે પ્રકારના જોખમ રહે છે.

એક જોખમ એ કે આપણું કમ્પ્યૂટર ઠપ્પ થાય અને કામકાજ અટકી પડે, એથી પણ મોટું બીજું જોખમ એ કે ક્લાઉડમાં સ્ટોર કરેલો આપણો ડેટા અનિશ્ચિત સમય સુધી કે કાયમ માટે ગુમાવવાનો વારો આવે.

કમ્પ્યૂટર ઠપ્પ થાય તો તેને કમ્પ્યૂટર એન્જિનીયરની મદદથી  ફરી શરૂ કરી શકાય. પરંતુ મહત્ત્વનો ડેટા ગુમાવવાનું પાલવે નહીં. એ જ કારણે આપણે માટે ખરેખર બહુ મહત્ત્વની ફાઇલ્સ ફક્ત ક્લાઉડમાં સ્ટોર કરવાને બદલે તેની એક કોપી વનડ્રાઇવ, ગૂગલ ડ્રાઇવ કે અન્ય કોઈ પણ ક્લાઉડ સ્ટોરેજ સર્વિસમાં સેવ્ડ રહે, બીજી કોપી આપણા કમ્પ્યૂટરમાં રહે અને એ ઉપરાંત ત્રીજી કોપી કમ્પ્યૂટરથી અલગ કોઈ ફિઝિકલ ડ્રાઇવમાં સ્ટોર્ડ રહે એ સૌથી સારી સ્થિતિ છે. હાલમાં જે બન્યું તે માત્ર ટેકનિકલ ભૂલને કારણે બન્યું. પરંતુ અવારનવાર બને છે તેમ વ્યાપક સાયબર એટેક કે રેનસમવેર એટેકનો આપણે ભોગ બનીએ ત્યારે તેનાથી બચવા માટે ડેટાનો ત્રણ જગ્યાએ બેકઅપ એ જ સૌથી મોટો હથિયાર બની શકે.