બે વર્ષ પહેલાં ઓપનએઆઇ કંપનીએ તેનો ચેટબોટ ચેટ જીપીટી પબ્લિક રીવ્યૂ માટે લોન્ચ કર્યો ત્યારથી આખા વિશ્વમાં આર્ટિફિશિયલ ઇન્ટેલિજન્સ (એઆઇ)ની જબરજસ્ત લહેર ઊભી થઈ છે. 

એ જ કંપનીએ હમણાં ‘સ્વાર્મ’ નામે એક નવું ‘ફ્રેમવર્ક’ લોન્ચ કર્યું છે અને તેણે પણ લગભગ અગાઉ જેટલી જ ચર્ચા જગાવી છે.

હાલના એઆઇ ચેટિંગમાં આપણે એટલે કે જીવતાજાગતા માણસ એઆઇ ચેટબોટ સાથે ચેટિંગ કરી શકીએ છીએ. જ્યારે સ્વાર્મમાં એકથી વધુ એઆઇ એજન્ટ એકમેક સાથે વાતચીત કરી શકે છે અને એકમેકને તાલમેલમાં કામ કરી શકે છે!આ ફ્રેમવર્કને આધારે ભવિષ્યમાં ડેવલપર્સ સંખ્યાબંધ એઆઇ એજન્ટ્સના સંખ્યાબંધ નેટવર્ક ઊભા કરી શકશે.

એ ખાસ નોંધવા જેવું છે કે અત્યારે આ નેટવર્ક ફક્ત એક પ્રયોગ છે. તે ઓપન એઆઇની ઓફિશિયલ પ્રોડક્ટ નથી. કંપનીએ તેનો કોડ સૌ કોઈ ઉપયોગ કરી શકે તે રીતે ગિટહબ પર ખુલ્લો મૂકી દીધો છે.

જનરેટિવ એઆઇનો યુગ શરૂ થયો ત્યારથી તેનો બે પ્રકારે ઉપયોગ વિસ્તરી રહ્યો છે. એક છે વ્યક્તિગત ઉપયોગ અને બીજો છે વ્યાપક સ્તરનો ઉપયોગ જે મોટાં કોર્પોરેશન્સ તેમની પ્રક્રિયાઓમાં ઉપયોગમાં લઈ શકે.

એઆઇ કંપનીઓને આ પ્રકારના એન્ટરપ્રાઇઝ યૂઝમાં વધુ રસ છે કેમ કે કમાણી તેમાં જ છે. સ્વાર્મ ફ્રેમવર્કને કારણે મોટી કંપનીઓને માનવ મદદ વિના ડેટાનું એનાલિસીસ કરીને નિર્ણયો લેવામાં મોટી મદદ મળશે. એ કારણે લોકોની નોકરી જવાનું જોખમ હજી વધશે. તેની સાથોસાથ ખોટા નિર્ણયોની સંભાવના કે સિક્યોરિટી સંબંધિત જોખમો વધવાની શક્યતા પણ રહેશે.