આજના ડિજિટલ યુગમાં આપણા ફોનમાં ચારે તરફથી એટલા બધા પ્રમાણમાં ઇમેજ-વીડિયોનો મારો થતો રહે છે કે તેની નિયમિત સફાઈ કરવી અનિવાર્ય છે. ઘરના માળિયા કે કબાટ કરતાં ક્યાંય વધુ બિનજરૂરી ચીજો આપણા સ્માર્ટફોનમાં જમા થતી રહે છે. એ બધું પાછું નજર સામે ન આવતું હોવાથી, આપણને તેની નિયમિત સફાઈ કરવાનું સૂઝતું નથી. નવા ફોનમાં સ્ટોરેજની ચિંતા ન હોવાથી પણ આપણે એ તરફ પૂરતું ધ્યાન આપતા નથી. પરંતુ ફોનમાં બિનજરૂરી ડેટા જમા થતો રહે તો સરવાળે ફોનના પરફોર્મન્સ પર અસર થયા વિના રહે નહીં.

આપણા સ્માર્ટફોનમાં સ્ટોરેજ ભરાઈ જવાનું સૌથી મોટું કારણ ફોટોગ્રાફ અને વીડિયોની ફાઇલ્સ હોય છે. આપણે પોતે પોતાના ફોનના કેમેરાથી ફોટો કે વીડિયો લઇએ અને તે ફોનમાં જગ્યા રોકે એ તો જાણે સમજ્યા, પરંતુ આપણે ધ્યાન ન રાખીએ તો આપણા સંખ્યાબંધ મિત્રો અને સ્વજનો પણ ઉત્સાહભેર પોતપોતાની રીતે આપણા સ્માર્ટફોન પરનો ભાર વધારતા રહે છે. 

આ બાબતે વોટ્સએપ તથા ઇન્સ્ટાગ્રામ, ફેસબુક વગેરે એપનું વર્તન જુદું જુદું છે. વોટ્સએપમાં બધું જ આપણા ફોનમાં ઠલવાય છે, જ્યારે ઇન્સ્ટાગ્રામ, ફેસબુક વગેરેમાં બધી ઇમેજ-વીડિયો ઓરિજિનલ સ્વરૂપે નહીં, પણ ‘કેશ’ તરીકે ફોનના ખાતે જમા થાય છે. એ બધું પણ જગ્યા તો રોકે જ છે. આ બધામાં આપણે જેટલા વધુ એક્ટિવ હોઇએ તેટલા વધુ પ્રમાણમાં આ બધી એપ તરફથી આપણા ફોનમાં ઇમેજિસ અને વીડિયોનો ઢગલો ખડકાતો રહે છે.

તેનાથી છૂટકારો મેળવવાના બે રસ્તા છે. એક, આવી એપ્સને દરવાજે જ ‘નો-એન્ટ્રી’નું બોર્ડ લગાવી દઇએ અને આપણે જે કંઈ જોવા માગતા હોય માત્ર એ જ ઇમેજ અને વીડિયો ડાઉનલોડ થાય તેવું સેટિંગ કરીએ.  બે, આપણે વારંવાર, નિયમિત રીતે આ બધી એપ દ્વારા ઠલવાતી ઇમેજિસ અનો વીડિયો શોધીને જે બિનજરૂરી હોય તેનો સફાયો કરીએ.

આ બંને રસ્તા, ખાસ તો ‘નો-એન્ટ્રી’ કહેવાના ઉપાય જાણી લઈએ.