તમને એનિમેશન જોવાં ગમે? કે પછી, એનિમેશન સર્જવામાં તમને વધુ રસ છે? હજી ત્રીજા પ્રકારનો રસ પણ હોઈ શકે – એનિમેશનની મદદથી, જાતભાતની બાબતો વિશે વધુ જાણવાનો રસ! આ ત્રણેય બાબતમાંથી કોઈ એકમાં પણ તમને રસ હોય તો તમને ગમે એવી એક ચેનલ છે ‘જેર્ડ અવન એનિમેશન્સ’.

જેર્ડ અવન એક અમેરિકન સોફ્ટવેર એન્જિનીયર છે. એન્જિનીયરિંગ એનો રસનો વિષય અને લાઇબ્રેરીમાં જઈને જાતભાતનાં પુસ્તકો ફેંદવાં પણ ગમે. એનિમેશન ક્રિએટ કરવામાં પણ એની માસ્ટરી. પોતાને સતત નવું નવું શીખવામાં રસ તો હતો જ, સાથે એનિમેશનની સ્કિલ પણ હતી, બંનેને સાંકળીને તેણે જુદા જુદા વિષયની બારીક સમજણ આપતા એનિમેશન વીડિયો તૈયાર કરવાનું શરૂ કર્યું.

જેર્ડ કહે છે, “ઘણી બાબતો એવી હોય છે જેને શબ્દોમાં સમજાવવી મુશ્કેલ હોય, તેને ટુડી એનિમેશનમાં પણ સારી રીતે સમજાવી ન શકાય. થ્રીડી એનિમેશનનો ઉપયોગ કરીને સરસ રીતે સમજાવી શકાય.’’ જેમ કે આપણે સૌ જેને હાથમાં મચડી-મચડીને મોટા થયા હોઈશું, એ રુબિક ક્યૂબની અંદર એવી તે કેવી કરામત હશે કે તેના બધા ક્યૂબને આપણે ધારીએ તેમ ફેરવી શકીએ છતાં, અંદરથી એ બધા જોડાયેલા જ રહે? આવી જિજ્ઞાસાથી એકાદો આવો ક્યૂબ તોડીએ તો જ અંદરની કરામત સમજાય!

જેર્ડ આવી અટપટી, આંતરિક રચના પોતાના એનિમેટેડ વીડિયોથી સમજાવે છે. જેર્ડ કમ્પ્યુટર સાયન્સમાં બેચલરની ડિગ્રી ધરાવે છે. થ્રીડી એનિમેશન તૈયાર કરવા માટે એ બ્લેન્ડર (https://www.blender.org) નામના ફ્રી અને ઓપન સોર્સ થ્રીડી ક્રિએશન સ્યૂટનો ઉપયોગ કરે છે. એનિમેશનના વિદ્યાર્થીઓ કે નિષ્ણાતો જાણતા હશે કે એનિમેશન તૈયાર કરવાની પ્રક્રિયામાં મોડેલિંગ, રિગિંગ, એનિમેશન, સિમ્યુલેશન, રેન્ડરિંગ, મોશન ટ્રેકિંગ જેવાં ઘણાં પાસાં સામેલ હોય છે. એમાં વીડિયો એડિટિંગ અને ગેમ ક્રિએશનનો અનુભવ પણ કામે લાગે. જેર્ડ પ્રોગ્રામિંગનો જાણકાર હોવાથી તે પાયથનની મદદથી બ્લેન્ડર સોફ્ટવેર પાસેથી હજી વધુ કામ લે છે.

જેર્ડે નોકરી કરતાં કરતાં પોતાના શોખને આગળ ધપાવ્યો છે.

તેણે વ્હાઇટ હાઉસ કે દુબઈની બુર્જ ખલિફા જેવી ઇમારતો, રુબિક ક્યૂબ કે પૂલ બેક ટોય કાર કે રમકડાંની ગન્સ, મોલમાંના એસ્કેલેટર, ડોર હેન્ડલ્સ વગેરેની અંદરની રચના સમજાવતાં એનિમેશન તૈયાર કર્યાં છે. જેર્ડને જે બાબતમાં રસ જાગે તેના વિશે તે માહિતી એકઠી કરે છે, હાથમાં લઈ શકાય એવી વસ્તુ હોય તો એનો એકેએક ભાગ છૂટો કરીને તેની રચના પહેલાં પોતે સમજે અને પછી એના એનિમેશનની સ્ક્રિપ્ટ તૈયાર કરે છે, એનિમેશન વીડિયો બનાવે છે અને વોઇસ પણ પોતે જ આપે છે!

જેર્ડના વીડિયો જોવા યુટ્યુબ પર સર્ચ કરો : Jared Owen Animation