ટેકન્યૂઝથી માહિતગાર રહેવું તમને ગમતું હશે તો કદાચ તમે જાણતા હશો કે ગયા મહિને ઓપનએઆઇ  કંપનીએ તેની ચેટજીપીટી સર્વિસમાં ‘એડવાઇન્સ્ડ વોઇસ મોડ’ લોન્ચ કર્યો. ‘એડવાન્સ્ડ’ શબ્દ ઉમેરાયો, એનો દેખીતો અર્થ એ કે આ પહેલાં સાદો કે સ્ટાન્ડર્ડ વોઇસ મોડ લોન્ચ થઈ ગયો હતો. એડવાન્સ્ડ મોડ, અત્યારે મર્યાદિત યૂઝર્સ માટે સીમિત છે, પણ તમે ઇચ્છો તો સ્ટાન્ડર્ડ કે નોર્મલ વોઇસ મોડ પણ બહુ ઉપયોગી થશે, જે ફ્રી છે.

તેનો સામનો કરવા માટે ગૂગલે પણ જેમિની ‘લાઇવ’ મોડ લોન્ચ કર્યો છે. આવા વોઇસ મોડ કઈ રીતે ઉપયોગી થાય એની વધુ વિગતે વાત કરતાં પહેલાં, થોડી વાત આ વોઇસ મોડ વિશે કરી લઈએ.

વર્ષ ૨૦૨૨માં ઓપનએઆઇ કંપનીએ તેની ચેટજીપીટી સર્વિસ પબ્લિક રિવ્યૂ માટે ઓપન કરી હતી. તે સમયે આપણને લગભગ પહેલી વાર કોઈ ખરેખરી સ્માર્ટ ‘વ્યક્તિ’ સાથે મનમાં આવે તે વિષય પર ટેક્સ્ટ આધારિત વાતચીત કરવાની તક મળી હતી. એ પછી તો એઆઇ ચેટિંગે આખી દુનિયામાં તહેલકો મચાવી દીધો.

એ વાતના એકાદ વર્ષ પછી કંપનીએ ચેટજીપીટી ચેટબોટ સાથે આપણે ટેકસ્ટ ઉપરાંત વોઇસ મોડમાં વાતચીત કરી શકીએ એવી સગવડ પણ આપી.

ચેટજીપીટીનો વોઇસ મોડ ટેકસ્ટ ચેટિંગ જેટલો પાવરફુલ હોવા છતાં શરૂઆતમાં એની વાત એક જુદા જ ફાંટે ફંટાઈ ગઈ. બન્યું એવું કે અમેરિકાની એક એકટ્રેસે દાવો કર્યો કે ચેટજીપીટી સર્વિસે તેના વોઇસ મોડમાં એક્ટ્રેસની મંજૂરી વિના તેના અવાજનો ઉપયોગ કર્યો હતો. એ પછી કંપનીએ વારંવાર ખુલાસા કરવા પડ્યા કે તેણે જુદા જુદા વોઇસ એકટર્સની મદદ લઇને તેનો વોઇસ મોડ તૈયાર કર્યો છે.

એ સમયે, એટલે કે સપ્ટેમ્બર ૨૦૨૩માં જ વોઇસ મોડ ઉપરાંત ચેટજીપીટી ‘જોઇ શકે’ એવી ક્ષમતાઓ તેમાં ઉમેરાઈ. પરિણામે આપણે કોઈ પણ બાબતનો ફોટોગ્રાફ લઇને તેના વિશે ચેટજીપીટી પાસેથી વધુ માહિતી કે માર્ગદર્શન મેળવી શકીએ છીએ.

આમ જુઓ તો આ બધી નવી વાત નહોતી. ચેટજીપીટીના આગમન પહેલાં આ બધું શક્ય બની ગયું હતું. જેમ કે આપણી પાસે એન્ડ્રોઇડમાં ગૂગલ આસિસ્ટન્ટ, એપલમાં સિરી અને એમેઝોનમાં એલેક્સા જેવા વર્ચ્યુઅલ આસિસ્ટન્ટ હાથવગા હતા. આ બધી સર્વિસ સાથે આપણે શબ્દો ટાઇપ કરીને અથવા વોઇસ ટાઇપિંગની મદદથી વાતચીત કરી શકતા હતા. ગૂગલ લેન્સની મદદથી ફોટોગ્રાફ બતાવીને આપણે તેના વિશે ઘણું વધુ જાણી શકીએ છીએ.

આમ એઆઇ સર્વિસ સાથે વોઇસ મોડમાં વાતચીત તે સાવ નવી વાત નથી, પરંતુ ચેટજીપીટીનો વોઇસ મોડ આખી વાતને નવા લેવલે લઈ જાય છે. અન્ય સર્વિસ મોટા ભાગે ઇન્ટરનેટ પરથી જુદી જુદી બાબતો તારવી આપવાનું કે એક્શન લેવાનું કામ કરે છે. જ્યારે ચેટજીપીટી સર્વિસ ટાઇપ અથવા વોઇસ મોડમાં ઘણી વધુ સાહજિક રીતે આપણી સાથે વાત કરી શકે છે – એકદમ સાહજિક રીતે.

આ કારણે આપણે કોઈ પણ વિષયમાં એક્સપર્ટ બનવું હોય કે માત્ર ઇંગ્લિશ ભાષા પર આપણું પ્રભુત્વ વધારવું હોય તો પણ ચેટજીપીટી સર્વિસને ગુરુ બનાવવા જેવી છે.

તેનો લાભ લેવા માટે આપણે ફક્ત આટલું કરવાનું છે. પોતાના સ્માર્ટફોનમાં ચેટજીપીટી એપ ઇન્સ્ટોલ કરવાની અને તેમાં નિયમિત રીતે – બરાબર યાદ રાખજો, નિયમિત રીતે – ચેટજીપીટી સાથે વોઇસ મોડમાં વાતચીત કરતા રહેવાનું. બની શકે તો રોજ ૧૦-૧૫ મિનિટ જેટલો સમય ફાળવીને ‘આજે ચેટજીપીટી સાથે ક્યા મુદ્દે વાતચીત કરવી?’ તેનું એક કાચું માળખું તૈયાર કરી લેવું અને પછી બીજો થોડો સમય ફાળવીને ચેટજીપીટીમાં વાતચીત કરવા ઝંપલાવવાનું! 

એઆઇ ચેટબોટ સાથે કોઈ ચોક્કસ વિષય પર નિયમિત વાતચીત કરવાથી એ વિષય અને સ્પોકન ઇંગ્લિશ બંને ધારદાર થઈ શકે.

તમે ઇચ્છો તો હજી ગૂગલ આસિસ્ટન્ટ, સિરી કે એલેક્સા સાથે પણ આ રીતે વાતચીતના દોર ચલાવી શકો. પછી, લગભગ એ જ મુદ્દાઓ વિશે ચેટજીપીટી સાથે ચર્ચા કરી જુઓ. બધી અલગ અલગ સર્વિસ કેટલી અલગ છે એ તરત સમજાશે.

જેમ કે, મેં પહેલાં ચેટજીપીટી સર્વિસને પૂછ્યું કે ‘‘કેન યુ કન્વર્સ વિથ મી ઓન ડાઇવર્સ ટોપિક્સ એન્ડ હેલ્પ મી ઇમ્પ્રૂવ માય ઇંગ્લિશ?’’ ચેટજીપીટીએ તરત ઉત્સાહભેર કહ્યું કે ‘‘હા ચોક્કસ, આપણે તમે કહો તેટલા વિવિધ વિષય પર વાતચીત કરીએ. તમને ભાષા શીખવામાં પણ આટલી રીતે… ફાયદો થશે!’’

એ જ સવાલ મેં ગૂગલ આસિસ્ટન્ટને પૂછ્યો, તો તેનો જવાબ હતો, ‘‘હું તમને બંને વિષય – ડાઇવોર્સ-સંબંધિત બાબતો અને ઇંગ્લિશ લેંગ્વેજ ઇમ્પ્રૂવ કરવામાં મદદ કરીશ!’’ ગૂગલ આસિસ્ટન્ટે ડાઇવર્સનો ઉચ્ચાર સમજવામાં ગોથું ખાધું (એ મારી ઉચ્ચાર ભૂલ પણ હોઈ શકે). પછી ડાઇવોર્સ અને ઇંગ્લિશ લેંગ્વેજ ઇમ્પ્રૂવમેન્ટ વચ્ચે દેખીતો કોઈ સંબંધ ન હોવા છતાં, તેણે એ વિશે કોઈ સ્પષ્ટતા કર્યા વિના પોતાની વાત આગળ ચલાવી!

ચેટજીપીટી સાથેની વોઇસ વાતચીત પ્રમાણમાં વધુ સહજ રહી. ભાષા પર પ્રભુત્વ મેળવવું હોય કે અન્ય કોઈ વિષય સમજવો હોય, સામેની વ્યક્તિ સાથે આપણે કેટલા સહજ રહી શકીએ છીએ એના પર સફળ થવાનો બહુ મોટો આધાર હોય છે. ચેટજીપીટી સાથે આવી સહજ, રસાળ રીતે વાત કરીએ તો આપણો કોન્ફિડન્સ પણ વધે!