ધારો કે તમે તમારો ફોન બાજુએ રાખીને કોઈ મહત્ત્વના કામમાં ફોકસ કરી રહ્યા છો. બરાબર એ સમયે તમારા ફોનમાં કોઈ નોટિફિકેશન આવી ટપકે છે. આવી સ્થિતિમાં જે શક્યતા રહે એ જ નોટિફિકેશન ખરેખર કોઈ મહત્ત્વના ઇમેઇલનું હોય અથવા પછી લાંબા સમયથી તમે ફોનમાં ગેમ રમ્યા ન હો અને એ ગેમ તરફથી ગેમની યાદ અપાવતું નોટિફિકેશન મોકલવામાં આવ્યું હોય.
મહત્ત્વના ઇમેઇલનું નોટિફિકેશન તમારા કામમાં ખલેલ પહોંચાડે તો ચાલી શકે પરંતુ પેલી ગેમના નોટિફિકેશન જોવામાં તમારો સમય બગડે એ ન જ ચાલે. સારી વાત એ છે કે તમે ફોનમાં ઇન્સ્ટોલ કરેલી લગભગ બધા પ્રકારની એપ્સનાં નોટિફિકેશન તમે ઓન કે ઓફ રાખી શકો.
એટલું જ નહીં દરેક એપના નોટિફિકેશનને વધુ કસ્ટમાઇઝ કરવાની સગવડ પણ મળે છે. જેમ કે, ફોનમાંની ઇમેઇલ એપના નોટિફિકેશન સેટિંગમાં જશો તો તમને ક્યા પ્રકારના કોન્ટેક્ટ્સના ઇમેઇલના નોટિફિકેશન મળે એ તમે નક્કી કરી શકો છો. મતલબ કે મહત્ત્વના ઇમેઇલ્સનાં નોટિફિકેશન મળે પરંતુ બિનજરૂરી ઇમેઇલ્સનું નોટિફિકેશન ન મળે એવું સેટિંગ કરી શકાય. ક્યારેક ફૂરસદે આ રીતે ફોનમાંની એપ્સના નોટિફિકેશન્સને કસ્ટમાઇઝ કરી લેશો તો તમારી લાઇફ વધુ ઇઝી બનશે.
