મંગળની ‘ધરતી’ કેવી છે? રોજ આપણી માથેથી પસાર થતા, જીવતા જાગતા અવકાશયાત્રીઓ સાથેનું ઇન્ટરનેશનલ સ્પેસ સ્ટેશન કેવું છે? આ અવકાશયાત્રીઓને તેમની યાત્રા માટે કેવી રીતે તૈયાર કરવામાં આવે છે? રોજ રાત્રે આપણે જેને જોઈએ છીએ એ ચંદ્ર તદ્દન નજીકથી કેવો દેખાય છે?

આ બધા સવાલોના જવાબ મેળવવા હોય તો નીચેની લિંક્સ તપાસો.

યાદ રહે, અહીં આપેલું બધું હીમશીલાની ટોચ જેટલું પણ નથી, પણ આટલું જોશો તો બીજું જોવાનું મન જરૂર થશે!

મંગળની ‘ધરતી’નું નિકટદર્શન

૨૬નવેમ્બર, ૨૦૧૧ના દિવસે અમેરિકાએ ‘ક્યુરિયોસિટી’ નામે, આપણી કાર જેવડું એક વાહન – રોવર –  અવકાશમાં મોકલ્યું. તે ૫૬૦ મિલિયન કિલોમીટરની યાત્રા ખેડીને ૬ ઓગસ્ટ ૨૦૧૨ના દિવસે, તેના મુકામ મંગળ પર પહોંચ્યું. લક્ષ્ય હતું, માનવવસવાટ માટે મંગળ અનુકૂળ છે કે નહીં તે તપાસવું. તેનું મિશન બે વર્ષ પૂરતું હતું, પણ રોવર એવું કામઢું સાબિત થયું કે આજે પણ મંગળ પર એક્ટિવ છે!

ક્યુરિયોસિટી રોવરે મંગળની સપાટીની મોટા પાયે ફોટોગ્રાફી કરી છે. નાસાએ એ તમામ ફોટો એકમેક સાથે જોડીને મંગળની સપાટીનું આબેહૂબ ૩ડી મોડેલ તૈયાર કર્યું છે, જેથી મંગળનો અભ્યાસ થઈ શકે અને ભવિષ્યમાં કેવા અભ્યાસ કરવા તેનું પ્લાનિંગ થઈ શકે.

 બરાબર એ જ ૩ડી મોડેલ, આપણે આપણા બ્રાઉઝરમાં જોઈ શકીએ છીએ!

એસ્ટ્રોનોટ બનવું છે?

આરામખુરશીમાં બેઠાં બેઠાં અવકાશદર્શન કરવું છે? (આકાશ નહીં!) ગૂગલ આર્ટ્સ એન્ડ કલ્ચર એક એવું ઓનલાઇન પ્લેટફોર્મ છે જેમાં દુનિયાભરનાં ૨૦૦૦થી વધુ મ્યુઝિયમ્સ અને આર્કાવ્ઝની વિવિધ બાબતો ડિજિટલ સ્વરૂપે જોઈ શકાય છે.

નાસા અને બીજી એજન્સીઝના સાથમાં, આ પ્લેટફોર્મ પર અવકાશ સંશોધન સંબંધિત વિવિધ પ્રકારના કન્ટેન્ટની ભરમાર છે. જેમ કે ‘હાઉ ટુ બી એન આર્મચેર એસ્ટ્રોનોટ’ પેજ પર ઇમેજ, વીડિયો, ૩૬૦ ડિગ્રી વીડિયો, સ્ટ્રીટવ્યૂ વગેરે પ્રકારના મીડિયાની મદદથી અવકાશ અને અવકાશયાત્રી સાથે દોસ્તી કરી શકાય છે. એસ્ટ્રોનોટ્સની ટ્રેનિંગ ફેસિલિટી, સ્પેસ શટલનાં લોન્ચ પેડ્સ, ઇન્ટરનેશનલ સ્પેસ સ્ટેશનની અંદરના ૩ડી વ્યૂ, અવકાશની સફર કરી પરત આવેલ એપોલો ૧૧ કમાન્ડ મોડ્યુલની એઆર ટુર… જોવા જેવું ઘણું છે!