ફોનમાંની ઓપરેટિંગ સિસ્ટમની જેમ આપણે ફોનમાં ઇન્સ્ટોલ કરેલી વિવિધ એપ્સમાં પણ સતત નવા નવા અપડેટ્સ આવતા હોય છે. એપના ડેવલપર એપ લોન્ચ થયા પછી ધ્યાનમાં આવેલી ખામીઓ સુધારી લેવા કે નવી સગવડો ઉમેરવા આવા નવા અપડેટ આપતા હોય છે.

સામાન્ય સ્થિતિમાં આપણે ફોનમાંની બધી એપ નિયમિત રીતે અપડેટ કરતા રહીએ એ હિતાવહ છે. એ માટે પ્લે સ્ટોર ઓપન કરો. ઉપર જમણા ખૂણે તમારા પ્રોફાઇલ પિકચર પર ક્લિક કરો અને જે પેજ ખૂલે તેમાં ‘મેનેજ એપ્સ એન્ડ ડિવાઇસ’ પર ક્લિક કરો. અહીં ‘અપડેટ્સ અવેલેબલ’ એવા શીર્ષક હેઠળ જેટલી એપમાં નવા અપડેટ આવ્યા હશે તે જોવા મળશે. ‘અપડેટ ઓલ’ પર ક્લિક કરીને આપણે બધી જ એપ વારાફરતી અપડેટ કરી શકીએ.

જો કોઈ ચોક્કસ એપ ઓપન કર્યા પછી ફોન આપમેળે રિસ્ટાર્ટ થઈ જતો હોય તો સૌથી પહેલાં એ એપમાં કોઈ અપડેટ ઉપલબ્ધ છે કે નહીં તે તપાસીને તેને અપડેટ કરી શકાય. એપ બહુ ઉપયોગી ન હોય તો તેને અનઇન્સ્ટોલ કરવાથી ફોન આપમેળે રિસ્ટાર્ટ થવાની સમસ્યા ઉકેલાઈ જાય છે કે નહીં તે તપાસી શકાય.

ક્યારેક એવું પણ બને કે આપણે ઇન્સ્ટોલ કરેલી એપ જૂની હોય અને તે ફોનની ઓપરેટિંગ સિસ્ટમના લેટેસ્ટ વર્ઝન સાથે મેચ ન થતી હોય. આવું બને તો પણ એ એપને ઓપન કરતાં ફોન રિસ્ટાર્ટ થવાની સમસ્યા સર્જાઈ શકે છે.

એવું પણ બને કે ફોનમાંની કોઈ ચોક્કસ એપ જ ફોનની કામગીરીમાં તકલીફ ઊભી કરી રહી હોય પરંતુ એ એપ આપણને હાથતાળી આપતી હોય. દેખીતું છે કે આપણે તો ફોનમાં પાર વગરની એપ્સ ડાઉનલોડ કરીને બેઠા હોઇએ. એમાંથી કઈ એપ આપણી ગુનેગાર છે એ કઈ રીતે શોધવું?

એક સહેલો ઉપાય એ કે ફોન વારંવાર રિસ્ટાર્ટ થવા જેવી તકલીફ જ્યારથી શરૂ થઈ હોય તેના થોડા સમય પહેલાં આપણે ઇન્સ્ટોલ કરેલી એપ્સ વારાફરતી અનઇન્સ્ટોલ કરી શકાય. એ રીતે ચોક્કસ કઈ એપને કારણે તકલીફ થઈ રહી છે તે પકડી શકાશે. પછી અનઇન્સ્ટોલ કરેલી, પણ ‘નિર્દોષ’ સાબિત થયેલી એપ્સ આપણને હજી પણ ઉપયોગી લાગતી હોય તો તેને ફરી ઇન્સ્ટોલ કરી શકાય.