‘સાયબરસફર’માં આપણે વારંવાર ગૂગલ એકાઉન્ટની સ્ટોરેજ લિમિટ્સ વિશે વાત કરી છે. ગૂગલ પર ફ્રી એકાઉન્ટમાં આપણને કુલ ૧૫ જીબી સ્પેસ મળે છે, જે તેના પ્રકારની અન્ય પ્રકારની મોટા ભાગની સર્વિસ કરતાં ઓછામાં ઓછી ત્રણ ગણી વધુ છે. તકલીફ એ છે કે આપણા ગૂગલ એકાઉન્ટમાં સ્ટોર થતા ડેટાનું પ્રમાણ પણ સતત વધતું જાય છે.

વધુ તકલીફ એ વાતની છે કે જીમેઇલ, ગૂગલ ડ્રાઇવ અને ગૂગલ ફોટોઝ એ ત્રણેય સર્વિસમાંનો આપણો ડેટા આ ૧૫ જીબીની ફ્રી સ્ટોરેજ લિમિટ માટે કાઉન્ટ થાય છે.

‘સાયબરસફર’માં આપણે જીમેઇલ, ગૂગલ ડ્રાઇવ અને ગૂગલ ફોટોઝમાંથી આપણે માટે બિનજરૂરી બાબતો ડિલીટ કરીને સ્ટોરેજ ખાલી કરવાના જુદા જુદા રસ્તાઓની પણ વાત કરી છે.

તેમ છતાં જો તમારા ગૂગલ એકાઉન્ટની સ્ટોરેજ ભરાવા આવી હોય તો વધુ સ્ટોરેજ ખરીદવા સિવાય લગભગ કોઈ રસ્તો રહેતો  નથી. આવી પેઇડ સ્ટોરેજનો પ્રોગ્રામ ‘ગૂગલ વન’ તરીકે ઓળખાય છે. તેમાં બેઝિક પ્લાનમાં હાલના દર મુજબ એક વર્ષના રૂ. ૧૩૦૦ની ફી ચૂકવવાથી કુલ ૧૦૦ જીબી સ્ટોરેજ મળે છે. એ સાથે આપણે આ સ્ટોરેજ અન્ય પાંચ લોકો સાથે શેર કરી શકીએ છીએ તેમજ ગૂગલ ફોટોઝમાં ફોટો એડિટિંગનાં નવા ફીચર મળે છે અને આપણો ડેટા ડાર્ક વેબ્સમાં વેચાઈ રહ્યો છે કે કેમ તે મોનિટર પણ કરી શકાય છે.

બેઝિક પ્લાન ઉપરાંત આપણે ઇચ્છીએ તો ૨૦૦ જીબીથી શરૂ કરીને પાંચ ટીબી સુધીના પ્લાન પણ ખરીદી શકીએ છીએ.

ગૂગલ કંપની આપણને તેના પેઇડ પ્લાન તરફ વાળવા માટે અવારનવાર પ્રમોશનલ ઓફર પણ આપતી હોય છે.

જો તમે હાલમાં ગૂગલ એકાઉન્ટ ભરાઈ જવાને કારણે તેનો બેઝિક પેઇડ પ્લાન ખરીદવાનું વિચારી રહ્યા હો તો હાલમાં એક ઓફર ચાલી રહી છે. તે મુજબ પહેલા બે મહિના માટે આપણે એક મહિનાના રૂ.૧૩૦ને બદલે રૂ. ૩૫ ચૂકવવાના રહે છે. અને ૨૦૦ જીબીના પ્લાન માટે બે મહિના માટે એક મહિનાના રૂ.૨૧૦ને બદલે રૂ.૫૦ ચૂકવવાના રહે છે. જોકે બે મહિના પછી પૂરેપૂરી રકમના ચૂકવણાનું ચક્ર શરૂ થઈ જાય છે, એ યાદ રાખશો!