ઇન્સ્ટાગ્રામમાં હવે ‘એડ બ્રેક્સ’ ઉમેરાઈ રહ્યા છે. આપણે ઇન્સ્ટાગ્રામ પર જુદી જુદી બાબતો જોતા હોઇએ ત્યારે વચ્ચે વચ્ચે એડ્સ આવતી જ હોય છે. પરંતુ અત્યારે આપણે તેને સ્કિપ કરી શકીએ છીએ. હવે જે નવા પ્રકારની જાહેરાતો આવી રહી છે તેને એટલી સહેલાઈથી સ્કિપ કરી શકાશે નહીં. આપણે ઓછામાં ઓછી ૩ થી ૫ સેકન્ડ માટે જાહેરાત જોવી પડશે અને પછી જ આગળનું કન્ટેન્ટ જોવા માટે આગળ વધી શકીશું.

આમ જુઓ તો આ નવી વાત નથી. યુટ્યૂબ કે જાહેરાતો આધારિત ઓટીટી પ્લેટફોર્મ પર અમુક જાહેરાતો આપણે ધરાર જોવી પડે છે અને આપણે સૌએ તેને સ્વીકારી લીધી છે. હવે એવી જ સ્થિતિ ઇન્સ્ટાગ્રામમાં થવાની છે.  એ પણ ધ્યાને લેવા જેવું છે કે અત્યાર સુધી ઇન્સ્ટાગ્રામમાં જાહેરાતો એટલે કે સ્પોન્સર્ડ કન્ટેન્ટ ભરપૂર માત્રામાં હોવા છતાં, આપણને નડતું નહોતું, આપણા ઇન્સ્ટાગ્રામમાં હોમ સ્ક્રીનમાં સ્ક્રોલિંગ કરતા હોઇએ ત્યારે આપણે જેમને ફોલો કરતા હોઇએ તેમની પોસ્ટની વચ્ચે વચ્ચે જે સ્પોન્સર્ડ કન્ટેન્ટ જોવા મળે તેનો કંપનીએ અન્ય કન્ટેન્ટ સાથે સરસ તાલમેલ બેસાડ્યો હતો. એ કારણે એ જાહેરાતો આપણા સ્ક્રોલિંગમાં અવરોધરૂપ બનતી નહોતી.

અત્યારે નવા પ્રકારના ‘એડ બ્રેક્સ’નો અનુભવ માત્ર અમુક યૂઝર્સને થઈ રહ્યો છે. પરંતુ જે યૂઝર્સે ઇન્સ્ટાગ્રામમાં સ્ક્રોલિંગ દરમિયાન ધરાર જાહેરાતો જોવા માટે અટકવું પડે છે એ લોકો અન્ય સોશિયલ મીડિયા પર આ બાબતે ઉભરો ઠાલવવા લાગ્યા છે. અત્યારે યૂઝર્સ આવા એડ બ્રેક્સથી અકળાઈને ઇન્સ્ટાગ્રામ છોડવાની વાતો કરી રહ્યા છે. પરંતુ કંપની પણ જાણે છે કે છેવટે લોકો આ અવરોધ સ્વીકારી લેશે.

ઇન્સ્ટાગ્રામમાં સતત સહેલું સ્ક્રોલિંગ એ જ તેના ઉપયોગનું કદાચ સૌથી મજાનું પાસું છે. આમ પણ ઇન્સ્ટાગ્રામ પરનું બધું કન્ટેન્ટ એકદમ ટૂંકું હોય છે. તેમાં પણ આપણે આંખના પલકારામાં શું જોવું કે શું ન જોવું તે નક્કી કરી શકીએ છીએ. કંઈ ગમે તો આખું જોઈએ, બાકી આગળ વધી જઈએ. હવે એવું નહીં રહે. અમુક કન્ટેન્ટ આપણે ઇચ્છીએ કે ન ઇચ્છીએ તો પણ અમુક નિશ્ચિત સેકન્ડ સુધી ફરજિયાત જોવું પડશે. આ જ કારણે, સ્મૂધ સ્ક્રોલિંગમાં ઉભો થતો આ ખટકો અનેક યૂઝર્સને ખટકી રહ્યો છે!