કદાચ તમને યાદ હશે કે ‘સાયબરસફર’માં થોડા સમય પહેલાં આપણે વાત કરી હતી કે ગૂગલ સર્ચમાં હવે ‘ચિપ્સ’નો ઉપયોગ શરૂ થયો છે અને ધીમે ધીમે બધી સર્વિસમાં તે દેખાશે. એ સગવડ ફોટોઝમાં પણ આવી છે.

ગૂગલ ફોટોઝમાં સ્ટોર થયેલા ફોટોગ્રાફ્સને આપણે જુદી જુદી ઘણી રીતે સર્ચ કરી શકીએ છીએ. આવી ‘ઘણી રીત’ એટલે કઈ રીત? તે તપાસવા માટે ફોટોઝ એપ ઓપન કરો અને તેમાં નીચે દેખાતા સર્ચ આઇકન પર ક્લિક કરો. તમે જોશો તેમ સર્ચ ઇન્ટરફેસ ઓપન થશે અને તેમાં આપણે પીપલ, પ્લેસીસ, ડોક્યુમેન્ટ, થિંગ્સ વગેરે જુદી જુદી કેટેગરી મુજબ ફોટોગ્રાફ સર્ચ કરી શકીશું.

ધ્યાનમાં લેવા જેવી વાત એ છે કે આપણે ફોટોગ્રાફ આ સર્વિસમાં માત્ર અપલોડ કર્યા હોય છે, પછી તેને ઓળખવાનું કામ આ સર્વિસ આપોઆપ કરે છે. સેટિંગ અનુસાર તે ફોટોગ્રાફમાંની વ્યક્તિઓના ચહેરા ઓળખે છે, તે ક્યા સ્થળનો છે કે સનસેટ, પાર્ક વગેરે પ્રકારનો છે તે જાતે નક્કી કરી લે છે અને એ મુજબ ફોટોગ્રાફ તારવે છે.

વાત અહીં પૂરી થતી નથી. ફોટોઝમાં સર્ચ હજી વધુ પાવરફુલ છે. તમે ફોટોઝ સર્વિસમાં તમારા દીકરા કે દીકરીના ચહેરાને તેના નામથી ઓળખાવેલ હોય તો સર્ચમાં Pinky blue cap જેવું લખીને પણ સર્ચ કરી શકો છો! એ સિવાય આપણી સર્ચ ક્વેરીની નીચે જુદી જુદી ચિપ્સ જોવા મળે છે. જેને કારણે આપણે અલગ અલગ કોમ્બિનેશનના ફોટોગ્રાફ શોધી શકીએ છીએ (અલબત્ત, આ સગવડ આવીને પાછી ગાયબ થઈ છે, થોડા સમયમાં ફરી આવવી જોઈએ).