વધુ મફત સ્ટોરેજ, ઓફિસ પ્રોગ્રામ્સ, ફાસ્ટ સિન્ક, એન્ક્રિપ્શન વગેરેમાંથી તમારે માટે શું મહત્ત્વનું છે તેના આધારા ક્લાઉડ સર્વિસ પસંદ કરવી જોઈશે.

ગૂગલ ડ્રાઇવ (google.com/drive)

ગૂગલ ડ્રાઇવથી તમે પરિચિત હશો જ. એ ક્લાઉડ સ્ટોરેજ ઉપરાંત માઇક્રોસોફ્ટ ઓફિસના મુખ્ય પ્રોગ્રામ જેવા જ ડોક્સ, શીટ્સ અને સ્લાઇડ્સ જેવા પ્રોગ્રામનો સ્યૂટ પણ આપે છે. તેના ફ્રી વર્ઝનમાં પણ ૧૫ જીબીની ફૂલ સ્પેસ મળે છે. અલબત્ત તેમાં જીમેઇલ, ડ્રાઇવ અને ફોટોઝ ત્રણેય સર્વિસની સ્ટોરેજ સામેલ છે. તેમાં માઇક્રોસોફ્ટ ઓફિસની ફાઇલ પણ સ્ટોર અને એડિટ થઈ શકે છે.

જો તમારે મુખ્યત્વે વર્ડ, એક્સેલ અને પાવરપોઇન્ટ પ્રકારની ફાઇલમાં જ કામ કરવાનું થતું હોય તો ઓફિસ યૂઝ માટે ગૂગલનું એક અલગ એકાઉન્ટ ખોલાવી તમારી બધી જ ફાઇલ્સ તેમાં સ્ટોર કરો અને ટીમ એક સાથે પોતપોતાના પીસી/લેપટોપ/સ્માર્ટફોનમાં આ ફાઇલ્સ ઓપન કરીને તેના પર કામ કરી શકે.

ઓફિસ ફાઇલ્સ માટે ગૂગલ ડ્રાઇવનું સિન્કિંગ અફલાતૂન છે, પરંતુ અન્ય પ્રકારની ફાઇલ્સ માટે એટલું સારું નથી.

વનડ્રાઇવ (onedrive.com)

વિન્ડોઝ૧૦/૧૧ ધરાવતા તમારા પીસી/લેપટોપમાં વનડ્રાઇવ પર્સનલ ક્લાઉડ ફોલ્ડર હશે જ.

તમે જુદા જુદા પીસી/લેપટોપ કે સ્માર્ટફોનમાં પોતાના માઇક્રોસોફ્ટ એકાઉન્ટથી લોગઇન થાઓ ત્યારે આ ફોલ્ડરમાંની ફાઇલ્સ ગમે ત્યાંથી એક્સેસ કરીને તેને એડિટ કરી શકો છો.

આ ફોલ્ડરમાં માઇક્રોસોફ્ટ પ્રોગ્રામ સિવાયના અન્ય કોઈ પણ પ્રોગ્રામની ફાઇલ્સ પણ સ્ટોર અને સિન્ક કરી શકાય. વનડ્રાઇવના ફ્રી એકાઉન્ટમાં પાંચ જીબી સુધીની સ્ટોરેજ ફ્રી મળે છે. તમારે કે તમારી ટીમને ફક્ત માઇક્રોસોફ્ટ ઓફિસ પ્રોગ્રામ્સમાં કામ કરવાનું થતું હોય તો વનડ્રાઇવ તમારે માટે બેસ્ટ છે. બજેટ હોય તો માઇક્રોસોફ્ટ ૩૬૫નું સબસ્ક્રિપ્શન ખરીદવાથી ઓફિસ પ્રોગ્રામ્સ પણ મળશે!

વનડ્રાઇવ બધા પ્રકારની ફાઇલ્સ માટે બ્લોક લેવલ સિન્કની સગવડ આપે છે, પરંતુ તેમ છતાં તે અન્ય સર્વિસ જેટલી ફાસ્ટ નથી.

ડ્રોપબોક્સ (dropbox.com)

તમારે ઓફિસ ફાઇલ્સ સિવાયના અન્ય પ્રોગ્રામ્સમાં વધુ પ્રમાણમાં કામ કરવાનું થાય છે? તમારે માટે ક્લાઉડ સ્ટોરેજ કરતાં ફાઇલ્સમાં કરેલા ફેરફાર જુદા જુદા કમ્પ્યૂટરમાં ઝડપથી સિન્ક થાય તે વધુ મહત્ત્વનું છે? તો તમારે માટે ડ્રોપબોક્સ એક સારો ઓપ્શન બની શકે છે.

ધ્યાન આપજો કે તેમાં ફ્રી એકાઉન્ટમાં ફક્ત ૨ જીબી સ્પેસ જેટલી, સાવ ઓછી સ્પેસ મળે છે. પરંતુ તેમાં બ્લોક-લેવલ સિન્કિંગ થતું હોવાથી ગૂગલ ડ્રાઇવ કે માઇક્રોસોફ્ટ વનડ્રાઇવ કરતાં તે ઘણું ઝડપી છે. તમે પોતાના માટે કે ટીમ માટે ડ્રોપબોક્સમાં ફ્રી એકાઉન્ટ ખોલાવી લો અને માત્ર કરન્ટ વર્કની ફાઇલ્સ તેમાં સ્ટોર કરો (જેની કુલ સાઇઝ બે જીબીથી ઓછી હોય) તો ડ્રોપબોક્સની મદદથી તમે કે તમારી ટીમ ગમે ત્યાંથી, ગમે ત્યારે ફટાફટ કામ કરી શકશો.

ફ્રી એકાઉન્ટમાં ફક્ત બે જીબી સ્પેસ હોવા છતાં કરન્ટ વર્કની ફાઇલ્સના સિન્કિંગ માટે ડ્રોપબોક્સ બહેતર છે.

સિન્ક.કોમ (sync.com)

સિન્ક.કોમ ફ્રી એકાઉન્ટમાં પાંચ જીબી સ્ટોરેજ આપે છે. આગળ જણાવેલી ત્રણેય સર્વિસમાં આપણા ડેટાની સંપૂર્ણ પ્રાઇવસી નથી. આ ત્રણેય કંપનીની સિસ્ટમ કે એન્જિનીયર્સ આપણા ડેટાને જોઈ શકે છે, જ્યારે સિન્ક સર્વિસ ફ્રી એકાઉન્ટમાં પણ ફૂલ એન્ક્રિપ્શનની સગવડ આપે છે!

અલબત્ત એન્ક્રિપ્શનને કારણે આ સર્વિસમાં આપણને ડ્રોપબોક્સની જેમ બ્લોક-લેવલ સિન્કની સગવડ મળતી નથી. આથી તેમાં સિન્કિંગ ડ્રોપબોક્સ જેટલું ફાસ્ટ નથી. તેમ છતાં તેમાં, ઓફિસ પ્રોગ્રામ્સ સિવાયની ફાઇલ્સમાં સિન્કની સ્પીડ ગૂગલ ડ્રાઇવ અને વનડ્રાઇવ કરતાં વધુ સારી મળે છે. આ કંપની કેનેડાની છે અને આપણો બધો જ ડેટા કેનેડામાંનાં સર્વર્સમાં સ્ટોર થાય છે.

કરન્ટ વર્ક માટે તમારે વધુ સ્ટોરેજ જોઈતી હોય અને ડેટાની પ્રાઇવસી બહુ મહત્ત્વની હોય તો સિન્ક.કોમ તમને ઉપયોગી થઈ શકે છે.

પીક્લાઉડ (pcloud.com)

તમારે ડ્રોપબોક્સ જેવું ફાસ્ટ સિન્ક જોઈએ છે, સાથોસાથ ગૂગલ ડ્રાઇવની નજીકની ક્લાઉડ સ્ટોરેજ જોઇએ છે?! તો પીક્લાઉડ તમને ઉપયોગી થશે. આ સર્વિસ આપણને ફ્રી એકાઉન્ટમાં ૧૦ જીબી સુધીની સ્ટોરેજ આપે છે!

જોકે તેમાં શરૂઆતમાં બે જીબી ફ્રી મળે છે, પછી નજીવાં એક્શન લઈ ફ્રી સ્ટોરેજ વધારી શકાય. જેમ કે જુદા જુદા ડિવાઇસમાં તેનું ક્લાઉડ ફોલ્ડર ઇન્સ્ટોલ કરીએ, અન્ય મિત્રોને તેની ભલામણ કરીએ અને તેઓ પણ આ સર્વિસમાં એકાઉન્ટ ખોલાવે તો આપણને એક-એક જીબી વધુ ફ્રી સ્ટોરેજ મળતી જાય છે.

પીક્લાઉડ પણ બ્લોક-લેવલ સિન્કની સગવડ આપતું હોવાથી તેમાં સિન્કિંગ ઘણું ફાસ્ટ મળે છે. ફક્ત આ સર્વિસમાં સિન્ક.કોમની જેમ મફતમાં એન્ક્રિપ્શનની સગવડ નથી. હા, કંપની સ્વીટ્ઝરલેન્ડની છે!

પીક્લાઉડ ફાસ્ટ સિન્કિંગ સાથે ૧૦ જીબી સુધીની ફ્રી સ્પેસ આપે છે, ફક્ત તેમાં એન્ક્રિપ્શન મફત નથી.

હવે તમે જ નક્કી કરો…

આપણે જોયું તેમ, દરેક ક્લાઉડ સર્વિસની અલગ અલગ ખાસિયત છે ઃ

ગૂગલ ડ્રાઇવમાં ૧૫ જીબી ફ્રી સ્પેસ છે, અને ફક્ત ઓફિસ પ્રોગ્રામ્સનો યૂઝ હોય તો તે બેસ્ટ છે.

માઇક્રોસોફ્ટ વનડ્રાઇવમાં ફ્રી સ્પેસ ૫ જીબી છે, પણ તમારો ઉપયોગ ઓફિસ પ્રોગ્રામ્સનો જ હોય, તો તેનું સબસ્ક્રિપ્શન ખરીદતાં તે આખી ટીમ માટે બહુ અનુકૂળ બની શકે.

ડ્રોપબોક્સ ફ્રી એકાઉન્ટમાં માત્ર ૨ જીબી સ્પેસ અાપે છે અને ફક્ત ૩ ડિવાઇસમાં તેનો ઉપયોગ થઈ શકે છે. છતાં, ફાસ્ટ સિન્કને કારણે સોલો પ્રોફેશનલ કે સાવ નાની ટીમ માટે તે બેસ્ટ ઓપ્શન બની શકે.

સિન્ક.કોમ ફ્રી એકાઉન્ટમાં ૫ જીબી સ્પેસ અને ૫ ડિવાઇસમાં ક્લાઉડ ફોલ્ડર આપે છે. તેમાં ફ્રી એન્ક્રિપ્શન પણ છે. સિન્કની ઝડપ પણ પ્રમાણમાં સારી છે. નાની ટીમ માટે સારો ઓપ્શન.

ફક્ત કરન્ટ વર્ક ફાઇલ્સ ક્લાઉડમાં રાખવા માટે અને લગભગ રિઅલ ટાઇમમાં સિન્ક્ડ રાખવા માટે પીક્લાઉડ બેસ્ટ છે – તેમાં ૧૦ જીબી સુધીની ફ્રી સ્પેસ છે, ફક્ત એન્ક્રિપ્શન નથી.

તમને જે યોગ્ય લાગે તે પસંદ કરી લો!

ફાઇનલ ફાઇલ્સના બેકઅપ માટે 15 જીબી સ્પેસ આપતી ગૂગલ ડ્રાઇવ અને કરન્ટ વર્ક માટે 2 જીબી સ્પેસ આપતી ડ્રોપબોક્સ સર્વિસનો ઇપયોગ કરી શકાય.