નવા આઇફોનમાં ફિઝિકલ સિમ રહેશે

એપલના આઇફોન ૧૪થી એપલે તેના ફોનમાં માત્ર ઇ-સિમ હોય તેવી શરૂઆત કરી. અલબત્ત એ શરૂઆત યુએસ પૂરતી સીમિત રહી. હવે આઇફોન ૧૫ આવવાની તૈયારીમાં છે ત્યારે લોકોને ડર હતો કે આખી દુનિયા માટે એપલ ઇ-સિમ અપનાવી લેશે. પરંતુ હવે એવી શક્યતા રહી નથી. નવો આઇફોન ૧૫ સપ્ટેમ્બર ૧૨ના રોજ લોન્ચ થાય તેવી શક્યતા છે અને તેમાં ફિઝિકલ સિમ માટેનો સ્લોટ હશે જ, અલબત્ત તે જરા જુદી રીતે કામ કરશે.

ફેસબુક મેસેન્જરનું લાઇટ વર્ઝન રીટાયર

જુદી જુદી ઇન્ટરનેટ કંપની પ્રમાણમાં નબળાં સ્પેસિફિકેશનવાળા સ્માર્ટફોન માટે પોતાની પોપ્યુલર એપનું લાઇટ વર્ઝન ઓફર કરતી હોય છે. એ પરંપરા અનુસાર ફેસબુક મેસેન્જરનું લાઇટ વર્ઝન ૨૦૧૬માં લોન્ચ થયું હતું. પરંતુ આ મહિનાથી એટલે કે સપ્ટેમ્બર ૨૦૨૩થી મેસેન્જરનું લાઇટ વર્ઝન રીટાયર થઈ રહ્યું છે. હવે ફુલ-ફ્લેજ્ડ મેસેન્જર એપનો ઉપયોગ અનિવાર્ય બનશે.

માઇક્રોસોફ્ટ 11માં વિવિધ રીતે એઆઇ

આર્ટિફિશિયલ ઇન્ટેલિજન્સ (એઆઇ)નો ઉપયોગ વિન્ડોઝમાં પણ વિસ્તરી રહ્યો છે. ટૂંક સમયમાં વિન્ડોઝ ૧૧માં આપણને ઓપ્ટિકલ કેરેકટર રેક્ગ્નેશન (ઓસીઆર) તરીકે ઓળખાતી સગવડ મળશે, જેને કારણે કેમેરા એપ તથા સ્ક્રીનશોટ લેવા માટેના સ્નિપિંગ ટૂલમાં ઇમેજમાંની ટેકસ્ટને એડિટ કરી શકાય તેવી ટેક્સ્ટમાં ફેરવી નાખવાની સગવડ મળશે.

એ જ રીતે ફોટોશોપની જેમ માઇક્રોસોફ્ટની ફોટોઝ એપમાં ફોટોગ્રાફના બેકગ્રાઉન્ડ દૂર કરવાની સગવડ પણ મળશે. એ ઉપરાંત માઇક્રોસોફ્ટની વર્ષો જૂની પેઇન્ટ એપમાં જનરેટિવ એઆઇની સગવડ આવી રહી છે. તેને કારણે આ સર્વિસને આપણે શબ્દોમાં જે વર્ણન આપીશું તેને આધારે પેઇન્ટ આખેઆખી નવી ઇમેજ ક્રિએટ કરી આપશે.

ગૂગલની વર્કસ્પેસ એપ્સની નવી ડિઝાઇન

એન્ડ્રોઇડ માટેની ગૂગલ ડોક્સ, શીટ્સ અને સ્લાઇડ એપની હવે જૂની લાગતી ડિઝાઇનથી તમે કંટાળ્યા છો? તો તમારે માટે ખુશીના સમાચાર છે. ગૂગલે આ બધી સર્વિસ માટેના વેબ વર્ઝનની ડિઝાઇનમાં ધરમૂળથી ફેરફાર કર્યા પછી એ જ પ્રકારના ફેરફારો હવે એન્ડ્રોઇડ એપમાં પણ આવી રહ્યા છે.

યુટ્યૂબ પર ગીત ગણગણીને સર્ચ કરો!

‘સાયબરસફર’માં આપણે એક મજાની ‘શઝામ’ સર્વિસ વિશે વાત કરી ગયા છીએ. તેની એપ ઓપન કરીને તેને એપ ઓપન કરીને ક્યાંક વાગી રહેલું મ્યુઝિક તેને સંભળાવીએ તો એ તેના વિશે સર્ચ કરી આપે છે. યુટ્યૂબ હવે એક ડગલું આગળ વધશે. રેકોર્ડેડ મ્યુઝિકને બદલે આપણે પોતે આછું પાતળું કંઈક ગણગણીશું તો પણ યુટ્યૂબ તેને લગતા મ્યુઝિક વીડિયો શોધી આપશે. આ ફીચરની શરૂઆત યુટ્યૂબની એન્ડ્રોઇડ એપથી થશે.