સોશિયલ મીડિયામાં આપણે કોઈ પણ પોસ્ટ કે મેસેજ કે વીડિયોની સાથોસાથ હેશટેગ (#) સાથે કોઈ પણ શબ્દ લખીએ એ સાથે જે સર્વિસ હેશટેગને સપોર્ટ કરતી હોય તેમાં હેશટેગ સહિતનો એ શબ્દ ક્લિકેબલ લિંકન્કમાં ફેરવાઈ જાય છે. આથી આપણે કોઈ પોસ્ટ સાથે #gujarat એવો હેશટેગ ઉમેરી હોય તો, તેને ક્લિક કરતાં, એ સોશિયલ મીડિયા પ્લેટફોર્મ પર જેટલા લોકોએ પોતાની પોસ્ટ કે વીડિયો સાથે #gujarat ઉમેરેલ હોય તે બધી પોસ્ટ કે વીડિયો કે અન્ય કન્ટેન્ટ આપણે એક સાથે જોઈ શકીએ.

આપણા રોજિંદા કામકાજની ફાઇલ્સ, ઇમેઇલ્સ, ફોટોગ્રાફ્સ, ટાસ્ક્સ,, નોટ્સ વગેરેમાં પણ ટેગનો આ જ કન્સેપ્ટ કામે લગાડીને આપણે પોતાને માટે મહત્ત્વની ફાઇલ્સને વધુ સારી રીતે મેનેજ કરી શકીએ છીએ.

ફેર ફક્ત એટલો છે કે સોશિયલ મીડિયામાં પોસ્ટમાંની ટેકસ્ટમાં ટેગ્સને અલગ ઓળખ આપવા માટે તેની આગળ હેશટેગની નિશાની મૂકવામાં આવે છે, જ્યારે કમ્પ્યૂટર, મોબાઇલ જેવાં સાધન કે અન્ય પ્રકારની સર્વિસમાં ફાઇલ્સના ઓર્ગેનાઇઝેશનની વાત હોય ત્યારે મોટા ભાગે તેમાં હેશટેગની નિશાની મૂકવી જરૂરી નથી.

આવી સર્વિસમાં  ટેગનો ઉપયોગ કરવાની અલગ અલગ રીત હોય છે જે લગભગ એકમેકને મળતી આવે છે. એ જ રીતે અલગ અલગ સર્વિસ ટેગિંગના ફીચર માટે ‘ટેગ’, ‘લેબલ’, ‘કેટેગરી’ વગેરે શબ્દોનો ઉપયોગ કરે છે.

હવે સવાલ એ થાય કે આપણે પોતાની વિવિધ ફાઇલ્સને અલગ અલગ ફોલ્ડરમાં મૂકી શકીએ છીએ તો પછી ફાઇલ્સને અલગથી ટેગ આપવાની ઝંઝટમાં પડવાની શી જરૂર? જવાબ તદ્દન સાદો અને સ્પષ્ટ છે – ફાઇલ્સને વધુ સારી રીતે ઓર્ગેનાઇઝ કરવા માટે.

ટેગની જરૂરિયાત વધુ સારી રીતે સમજવા માટે ડિજિટલ ફાઇલ્સને વાસ્તવિક ફાઇલ સાથે સરખાવીએ. મોટા ભાગની ઓફિસમાં વાસ્તવિક ફાઇલ્સ ઘણી સારી રીતે ઓર્ગેનાઇઝ થતી હોય છે. કપબોર્ડમાં વર્ષ મુજબ, ક્લાયન્ટ મુજબ કે પ્રોજેક્ટ મુજબ ખાનામાં ફાઇલ્સ રાખવામાં આવે અને તેમાં જે તે બાબતને સંબંધિત કાગળિયાં સાચાવવામાં આવે.

તકલીફ ત્યારે થાય જ્યારે એક જ કાગળિયાને આપણે એકથી વધુ રીતે શોધવાની જરૂર ઊભી થાય. વાસ્તવિક ફાઇલ્સ અને કાગળિયાં એક સમયે માત્ર એક ફાઇલ કે ફોલ્ડરમાં રાખી શકાય, પરંતુ આપણે વર્ષ મુજબ કોઈ ફાઇલ શોધવાની થાય, પરંતુ ફાઇલ્સ ક્લાયન્ટ મુજબ સ્ટોર કરી હોય તો?

ડિજિટલ ફાઇલ્સમાં ટેગ્સ કે લેબલિંગથી આ સમસ્યાનો સચોટ ઉપાય મળે છે.

તેમાં આપણે જરૂરિયાત મુજબ ફોલ્ડર તો બનાવી જ શકીએ જેમ કે વર્ષ મુજબ ફોલ્ડર કે ક્લાયન્ટ મુજબ ફોલ્ડર. એ પછી ફાઇલ્સને અલગ અલગ ટેગ કે લેબલ પણ આપીએ તો એક જ ફાઇલને એકથી વધુ રીતે શોધી શકાય. વિન્ડોઝ એક્સપ્લોરર જેવી સર્વિસમાં બધી ફાઇલ્સને ટેગ્સ મુજબ એક સાથે સોર્ટ પણ કરી શકાય.

ટુડુ લિસ્ટ જેવી સર્વિસમાં આપણે જુદાં જુદાં ટાસ્ક લખીએ ત્યારે જરૂર મુજબ ‘મીટિંગ’ કે ‘ટુ કોલ’ જેવું લેબલ લગાવ્યું હોય તો આજના દિવસનાં બધાં ટાસ્કમાં, કેટલા લોકોને મળવાનું છે કે કોલ કરવાનો છે તે સહેલાઈથી તારવી શકાય.