આગળના લેખમાં, ફેસબુક ‘ઓથેન્ટિકેટર એપના ઉપયોગનો આગ્રહ રાખશે’ એવી વાત કરી, પણ તમે ઓથેન્ટિકેટર એપના ઉપયોગ બાબતે જ ગૂંચવણ અનુભવો છો? તેનો ઉપયોગ સ્ટેપ-બાય-સ્ટેપ જાણીએ.
આપણે વિવિધ એકાઉન્ટ માટે ટુ-સ્ટેપ વેરિફિકેશન ઓન કરીએ, પછી તે માટેનો ઓટીપી જુદી જુદી ઘણી રીતે મેળવી શકીએ છીએ. જેમ કે, પોતાના રજિસ્ટર્ડ મોબાઇલમાં વોઇસ કોલથી, એસએમએસથી તથા લોગઇન કરવા માગો છો કે નહીં તેવા પ્રોમ્પટથી. આ ઉપરાંત પોતાના મોબાઇલમાં એક ખાસ પ્રકારની ઓથેન્ટિકેટર એપ ઇન્સ્ટોલ કરીને તેમાં પણ ઓટીપી મેળવી શકાય.
જુદી જુદી કંપનીઓ આપણા ઓનલાઇન એકાઉન્ટને સલામત બનાવવા માટે ઓથેન્ટિકેટર એપની સગવડ આપે છે. આમાં ગૂગલ અને માઇક્રોસોફ્ટ મોખરે છે. આપણે સૌ એન્ડ્રોઇડ મોબાઇલને પ્રતાપે ગૂગલમાં એકાઉન્ટ ધરાવતા હોવાથી અહીં તેની ઓથેન્ટિકેટર એપની વાત કરીએ.
આ ઓથેન્ટિકેટર એપ ભલે ગૂગલની હોય, આપણે તેમાં ગૂગલની વિવિધ સર્વિસ ઉપરાંત ફેસબુક, ટ્વીટર વગેરે ઘણા એકાઉન્ટને કનેક્ટ કરીને તેમાં લોગઇન થવા માટેના ઓટીપી મેળવી શકીએ.
આ એપની ખાસિયત એ છે કે ફોન ઇન્ટરનેટ કનેકશન ન હોય તો પણ તેમાં ઓટીપી મેળવી શકાય છે. પોતાના ફોનમાં ઓથેન્ટિકેટર ઇન્સ્ટોલ કર્યા પછી આપણે જે એકાઉન્ટમાં ટુ-સ્ટેપ વેરિફિકેશન માટે ઓટીપી મેળવવા માગતા હોઇએ તે એકાઉન્ટને કનેક્ટ કરવાનું રહે છે. આ વિધિ એક જ વાર કરવાની હોય છે. એ પછી આપણી ઓથેન્ટિકેટર એપમાં એ સર્વિસ માટેનો ઓટીપી દર ૩૦ સેકન્ડે બદલાતો રહે છે.
(1) સૌથી પહેલાં તમારા એન્ડ્રોઇડ કે આઇફોનમાં ગૂગલ ઓથેન્ટિકેટર એપ (Google Authenticator Google LLC) ઇન્સ્ટોલ કરી લો. તમે ઇચ્છો તો આ જ હેતુ માટે માઇક્રોસોફ્ટ ઓથેન્ટિકેટર એપનો ઉપયોગ પણ કરી શકો. બંનેમાં જુદાં જુદાં એકાઉન્ટ કનેક્ટ કરવાની વિધિ લગભગ એક સરખી છે.
(2) ગૂગલ ઓથેન્ટિકેટર એપ ઓપન કરી, ‘ગેટ સ્ટાર્ડેટ’ બટન પર ક્લિક કરતાં, તેમાં આપણું પહેલું એકાઉન્ટ સેટ અપ કરવા કહેવામાં આવશે. તેના બે રસ્તા છે. બંનેમાંથી ક્યૂઆર કોડ સ્કેન કરવાનો રસ્તો સહેલો હોવાથી તે પસંદ કરો (એપ કેમેરા એક્સેસ કરવાની મંજૂરી માગશે).
(3) હવે આ તબક્કે, ટુ-સ્ટેપ-વેરિફિકેશનની સગવડ આપતી કોઈ પણ સર્વિસ (ગૂગલની અથવા ફેસબુક, ઇન્સ્ટાગ્રામ વગેરે કોઈ પણ)માં એકાઉન્ટના સેટિંગ્સમાં જાઓ. તેમાં ‘સિક્યોરિટી’ સેક્શનમાં ‘ટુ-ફેક્ટર વેરિફિકેશન’ ઓન કરો. તેમાં સેકન્ડ ફેક્ટર તરીકે, ‘ઓથેન્ટિકેટર એપ’ પસંદ કરો.
(4) ધારો કે આપણે ઇન્સ્ટાગ્રામ એકાઉન્ટને વધુ સલામત બનાવવું છે અને તેમાં સેટિંગ્સમાં ટુ-ફેક્ટર ઓથેન્ટિકેશન ઓન કરી, ઓથેન્ટિકેટર એપનો રસ્તો પસંદ કર્યો છે. હવે ઇન્સ્ટાની સર્વિસ એક ક્યૂઆર કોડ બતાવશે, જે આપણે ફોનમાંની ગૂગલ ઓથેન્ટિકેટર એપથી સ્કેન કરવાનો છે (ચિંતા કરશો નહીં, આ વિધિ ફક્ત એક વાર કરવાની છે!).
(5) કોડ સ્કેન કરતાં ઇન્સ્ટાગ્રામનું એકાઉન્ટ અને ફોનમાંની ઓથેન્ટિકેટર એપ ‘કનેક્ટ’ થશે. ટેક્નોલોજીની મજા જુઓ, વાસ્તવમાં બંને એકાઉન્ટ કનેક્ટ થતાં નથી, ફક્ત બંનેમાં એક સરખા ઓટીપી જનરેટ થવા લાગે છે, જે દર ૩૦ સેકન્ડે બદલાય છે! એટલે ફોનમાં નેટ કનેક્શન ઓન ન હોય ત્યારેય એપમાંનો ઓટીપી આપતાં લોગઇન થઈ શકાય છે.
(6) હવે તમે જ્યારે પણ કોઈ ડિવાઇસમાં ઇન્સ્ટાગ્રામમાં લોગઇન થશો ત્યારે પાસવર્ડ ઉપરાંત ઓથેન્ટિકેટર એપમાં આવેલો ઓટીપી પૂછવામાં આવશે. આપણે એ એપ ઓપન કરી, તેમાં દેખાતો જે તે સમયનો ઓટીપી ઇન્સ્ટાગ્રામની સાઇટ પર આપીશું. જો ઇન્સ્ટાના સર્વર પરનો ઓટીપી અને આપણો ઓટીપી મેચ થશે તો આપણે લોગઇન થઈ જશું!
