મેટાએ જાહેરાત કરી છે કે વહેલામોડું, વોટ્સએપમાં પણ સર્ચ એન્જિનની જેમ એઆઇ-ચેટબોટ સાથે ચર્ચાનો દોર ચલાવવાની સગવડ આવી રહી છે – એ સુવિધા તો આવે ત્યારે, પરંતુ વોટ્સએપના બિટા વર્ઝનમાં એક વધુ ઇન્ટરેસ્ટિંગ ફીચર દેખાવા લાગ્યું છે – ન્યૂઝલેટર્સનું ફીચર! 

ઇન્ટરનેટ પર ઇ-ન્યૂઝલેટર્સ માર્કેટિંગનું એક અસરકારક માધ્યમ ગણાય છે. વર્ષોથી તેનો ઉપયોગ થતો રહ્યો છે. પરંતુ ઇ-ન્યૂઝલેટર્સની ડિલિવરી અત્યાર સુધી ઈ-મેઇલ  આધારિત રહી છે. ઈ-મેઇલ પ્રોગ્રામ્સમાં સૌથી વધુ પોપ્યુલર જીમેઇલ કંપનીએ આપણા પર આવતા ઈ-મેઇલ્સને અલગ અલગ કેટેગરીમાં આપમેળે વહેંચી નાખવાનું શરૂ કર્યું એ પછી ઇ-ન્યૂઝલેટર્સની અસરકારકતા થોડી ઘટી પણ છે.

જો તમે પણ આ રીતે તમારા ઇનબોક્સને પ્રાઇમરી, પ્રમોશન, સોશિયલ, અપડેટ્સ અને ફોરમ્સ એવી કેટેગરીમાં વહેંચી નાખ્યું હશે તો તમે મોટે ભાગે માત્ર પ્રાઇમરી કેટેગરીમાંનાં મેઇલ્સ જોઇને અટકી જતા હશો! આપણે પોતે વિવિધ કંપનીના ઇ-ન્યૂઝલેટર્સ માટે સાઇનઅપ કર્યું હોય તો પણ એ બધા ન્યૂઝલેટર્સ ઓટોમેટિકલી ફિલ્ટર થઈને પ્રમોશન સેકશનમાં ચાલ્યા જતા હોય છે, એટલે આપણે તેના તરફ ભાગ્યે જ નજર કરીએ તેવું બને.

ઉપરાંત, વોટ્સએપ પ્રચલિત થયા પછી ઈ-મેઇલનો ઉપયોગ સતત ઘટી રહ્યો છે. લોકો બિઝનેસ કમ્યુનિકેશન માટે તથા ફાઇલ્સની આપલે માટે પણ વોટ્સએપ તરફ વળી ગયા છે. એ જોતાં વોટ્સએપમાં જ ન્યૂઝલેટરનું ફીચર ઉમેરાય તો તે ગેમચેન્જર બની શકે છે!

અત્યારે વોટ્સએપના એન્ડ્રોઇડ માટેના બિટા વર્ઝનના  જે સ્ક્રીનશોટ્સ ઉપલબ્ધ થયા છે એ જોતાં લાગે છે કે આ ફીચર વોટ્સએપના સ્ટેટસ ટેબમાં ઉમેરાશે.

આ ટેબમાં આપણે વિવિધ યૂઝર્સ તરફથી ઓફર થતા ન્યૂઝલેટર સર્ચ કરી શકીશું અને જેમાં રસ પડે તેને સબસ્ક્રાઇબ કરતાં આ ન્યૂઝલેટર્સ નિયમિત રીતે વોટ્સએપમાં જ આપણને મળવાનું શરૂ થશે.

નવેમ્બર ૨૦૨૨માં વોટ્સએપમાં કમ્યુનિટિઝ ફીચર ઉમેરાયું હતું તેમાં વધુમાં વધુ પાંચ હજાર સભ્યો સામેલ થઈ શકે એવી મર્યાદા છે, પરંતુ ન્યૂઝલેટર ટૂલમાં એવી કોઈ મર્યાદા હોય તેવું લાગતું નથી. હાલ પૂરતું કોઈ પણ પ્રકારની એડ વગર આ ન્યૂઝલેટર આપણને જોવા મળશે. એ જ રીતે તેનો ક્રમ પણ ‘વહેલા તે પહેલા’ના ધોરણે રહેશે, તેમાં અલ્ગોરિધમની કોઈ અસર થશે નહીં. એવી પણ શક્યતા છે કે વોટ્સએપ પર ન્યૂઝલેટર ક્રિએટ કરનાર વ્યક્તિ અને તેને સબસ્ક્રાઇબ કરનાર વ્યક્તિ બંનેના ફોન નંબર અન્ય લોકો જોઈ શકશે નહીં.

વોટ્સએપની હરીફ જેવી ટેલિગ્રામ એપમાં વોટ્સએપના ગ્રૂપ્સની સરખામણીમાં ખાસ્સી વિસ્તૃત એવી ચેનલ્સ છે, જેમાં બે લાખ જેટલા સભ્યો જોડાઈ શકે છે. વોટ્સએપ કદાચ ન્યૂઝલેટર ફીચરથી ટેલિગ્રામની ચેનલ્સની હરીફાઈ કરે તેવું લાગે છે.

જોકે વોટ્સએપની પહેલાં, ફેસબુક, ટ્વીટર વગેરેએ પણ પોતપોતાના પ્લેટફોર્મ પર ઈ-મેઇલ  જેવી ન્યૂઝલેટર સર્વિસ શરૂ કરવાની કોશિશ કરી છે. ટ્વીટરે ‘રિવ્યૂ’ અને ફેસબુકે ‘બુલેટિન’ નામે આવો અખતરો કર્યો હતો અને પછી બંને પ્રયોગ સમેટાઈ ગયા.

અત્યારે બિઝનેસ એપીઆઇ સાથે વોટ્સએપમાં ન્યૂઝલેટર પ્રકારની જ સર્વિસ ઉપલબ્ધ છે, હવે તે આપણા જૂના ને જાણીતા, સાદા વોટ્સએપ એકાઉન્ટમાં પણ મળે તેવી શક્યતા છે!