અત્યારે ભારતના કોઈ પણ વેપારીને આખા દેશમાં પથરાયેલા ગ્રાહકો સુધી પહોંચવું હોય તો તેની પાસે બે જ રસ્તા છે – ભારતના ઓનલાઇન માર્કેટ પર કબજો જમાવીને બેઠેલી પેલી બે કંપનીમાં સેલર તરીકે જોડાય, તેની બધી જ શરતો માની લે અથવા પોતાની રીતે ઓનલાઇન સ્ટોર ઊભો કરીને ગ્રાહકો સુધી પહોંચવાનો પ્રયાસ કરે. આ બંને રસ્તા અત્યારે વેપારીઓ માટે મુશ્કેલ છે.

અત્યારે જે સ્થિતિ છે તેમાં ઓનલાઇન પ્લેટફોર્મ પર સેલર તરીકે જોડાવાથી માંડીને કસ્ટમર્સ મેળવવા, ઓર્ડર મુજબ ડિલિવરી કરવી, ગ્રાહકોની કોઈ ફરિયાદ હોય તો તેનું નિરાકરણ કરવું, પેમેન્ટ મેળવવું, વેચેલી વસ્તુ રીટર્ન થાય તો તેનું રીફંડ કરવું વગેરે બધી બાબતો પર જે તે શોપિંગ સાઇટનો પૂરેપૂરો કંટ્રોલ છે.

એક રીતે જોઇએ  તો, વેપારીઓએ આ બધી બાબતોની ઝંઝટમાં પડવું પડતું નથી. પરંતુ બીજી રીતે જોઇએ તો આ બધા માટે શોપિંગ સાઇટ જે કહે તે શરતો તેમણે માનવી પડે છે.

ઉપરાંત માત્ર બે પ્લેટફોર્મ પર સેલર્સ બહુ મોટી સંખ્યામાં એકઠા થવાને કારણે જુદા જુદા વેપારીઓને તેમની પ્રોડક્ટ માટે પૂરતી વિઝિબિલિટી મળતી નથી.

ઓએનડીસીથી સ્થિતિ બદલાય તેવી આશા છે. તેમાં નાનાં મોટાં અનેક પ્લેટફોર્મ હોઈ શકે છે. જેમાં કોઈ પણ વેપારી સેલર તરીકે  જોડાઈ શકે છે (અત્યારે સ્થિતિ અસ્પષ્ટ છે પરંતુ છેવટે એમેઝોન અને ફ્લિપકાર્ટ પણ ઓએનડીસી નેટવર્ક પર આવી જાય તેવી પૂરી શક્યતા છે). પરિણામે વેપારી તેને યોગ્ય લાગે અને તેને વ્યાજબી લાગે તેવી શરતો ઓફર કરતા પ્લેટફોર્મ સાથે જોડાઈ શકે છે.

તેની પ્રોડક્ટ ઓએનડીસી નેટવર્કમાં સામેલ તમામ પ્લેટફોર્મ્સ પર જોવા મળશે. એટલે એક વેપારીએ પોતાનો કારોબાર ફેલાવવા માટે જુદા જુદા બધા પ્લેટફોર્મમાં જોડાવાની કોઈ જરૂર નહીં રહે.

પેમેન્ટ અને લોજિસ્ટિક્સ માટે પણ ઓએનડીસી પર જુદી જુદી અનેક સર્વિસ ઉપલબ્ધ હશે એટલે વેપારી તેમાંથી ચાહે તેની પસંદગી કરી શકશે. સ્પર્ધા રહેશે, પણ સૌ માટે શરતો અને નિયમો સરખા હશે!