હવે મોટા ભાગનાં ઘરોમાં વાઇ-ફાઇની સુવિધા હોય છે. તમારા ઘરમાં પણ વાઇ-ફાઇ હોય તો તમારો અનુભવ હશે કે ઘરે આવતા મહેમાનો, ખાસ કરીને જેમના ઘરમાં હજી વાઇ-ફાઇની સુવિધા ન હોય એ આપણા વાઇ-ફાઇનો લાભ લેવા માગતા હોય છે! હેતુ માત્ર એટલો કે કોઈ મોટી એપ ડાઉનલોડ કરવાની હોય કે હેવી ફોટો-વીડિયો આલ્બમ તેમના ક્લાઉડ એકાઉન્ટમાં અપલોડ કરવાનાં હોય કે કોઈ સાથે શેર કરવાનાં હોય.
હવે નવા સમયની મજા જુઓ – મહેમાન જ્યારે આપણા વાઇ-ફાઇનો પાસવર્ડ માગે ત્યારે ઘણી વાર આપણે કફોડી સ્થિતિમાં મૂકાઈએ! કારણ એટલું જ કે આપણને પોતાના વાઇ-ફાઇનો પાસવર્ડ આપવામાં કોઈ વાંધો ન હોય પરંતુ આપણે પોતે જ એ ભૂલી ગયા હોઇએ અને મહેમાનને લાગે કે આપણે પાસવર્ડ આપવામાં ઠાગાઠૈયા કરીએ છીએ!
આવી સ્થિતિ ટાળવાનો એક સહેલો રસ્તો તમારો વાઇ-ફાઇ પાસવર્ડ ક્યાંક વ્યવસ્થિત રીતે લખી રાખવાનો છે. પરંતુ એ કાગળ પાછો હાથવગો રાખવો પડે.
એન્ડ્રોઇડ ૧૦થી આ સ્થિતિનો એક સહેલો ઉપાય મળ્યો છે.
હવે ઠેકઠેકાણે જોવા મળતા ક્વિક રિસ્પોન્સ (ક્યૂઆર) કોડને આ માટે કામે લેવામાં આવ્યા છે. હવે જ્યારે પણ મહેમાન તમારો વાઇ-ફાઇ પાસવર્ડ માગે ત્યારે તમારા સ્માર્ટફોનમાં નીચેનાં પગલાં લો.
- સ્માર્ટફોનનાં સેટિંગ્સમાં જાઓ.
- તેમાં કનેકશન્સમાં વાઇ-ફાઇમાં જાઓ.
- તેમાં ક્યૂઆર કોડનો વિકલ્પ જોવા મળશે.
- તેને ક્લિક કરતાં તમારા વાઇ-ફાઇ કનેકશનનો ક્યૂઆર કોડ જોવા મળશે.
મહેમાન પોતાના સ્માર્ટફોનથી આ ક્યૂઆર કોડ સ્કેન કરીને તમારા ઘરના વાઇ-ફાઇ સાથે કનેક્ટ થઈ શકે છે. તેમને પાસવર્ડ આપવાની જરૂર રહેશે નહીં!