હાલમાં ગૂગલના પ્લેસ્ટોરમાં મૂકાયેલી એપ્સના ડેવલપર ડિજિટલ પ્રોડ્ક્ટ્સના સેલિંગ બાબતે ખાસ્સી તકલીફોનો સામનો કરી રહ્યા છે. આવી એપ્સના એપ ડેવલપર જ્યારે કોઈ પણ પ્રકારની ડિજિટલ પ્રોડક્ટનું વેચાણ કરે ત્યારે તેણે ફરજિયાતપણે ગૂગલની બિલિંગ સિસ્ટમનો ઉપયોગ કરવો પડે છે. આ માટે ગૂગલ ૩૦ ટકા સુધીની ઊંચી ફી વસૂલ કરી શકે છે (એપલના એપ સ્ટોરમાં પણ આ જ સ્થિતિ છે). તેને બદલે જો ડેવલપર પોતાની વેબસાઇટ પરથી અન્ય કોઈ પણ પ્રકારના પેમેન્ટ ગેટવેની મદદથી પેમેન્ટ મેળવે તો તેને માંડ ૨ કે ૩ ટકા જેટલી ફી ચૂકવવાની હોય છે. ગૂગલ અને એપલની આ નીતિ સામે લાંબા સમયથી વિરોધ થઈ રહ્યો છે.

એ પછી ગૂગલે નિશ્ચિત પ્રકારના કન્ટેન્ટ માટે પોતાની ફી અડધી કરીને ૧૫ ટકા કરી છે. દરમિયાન હવે ગૂગલે ભારત સહિત કેટલાક દેશોમાં એપ્સ ડેવલપર્સને પોતાની એપમાં ગૂગલની પે સિસ્ટમ ઉપરાંત અન્ય પેમેન્ટ સિસ્ટમનો ઉપયોગ કરવાની છૂટ આપવાનું પ્રાયોગિક ધોરણે શરૂ કર્યું છે.

અલબત્ત ડેવલપર્સનો તેનો ખાસ ફાયદો થાય તેમ નથી કારણ કે આવા કિસ્સામાં ડેવલપરે ગૂગલની ફી તો ભરવી પડશે, માત્ર તે ૪ ટકા ઓછી થશે. એની સામે બીજી પેમેન્ટ સિસ્ટમની ફી પણ ચૂકવવાની રહે. આથી ગણિત હરી ફરીને ૧૫ ટકા સુધીની ફી પર આવીને ઊભું રહે છે! ઉપરાંત ગૂગલે આવી છૂટછાટ માત્ર નોનગેમિંગ કન્ટેન્ટ આપતી એપ્સ માટે લાગુ કરી છે.

ગૂગલની ફી અન્ય પેમેન્ટ ગેટવે કરતાં ખાસ્સી ઊંચી હોવાને કારણે ડેવલપર્સ અને છેવટે સામાન્ય યૂઝર્સ માટે એપ દ્વારા ડિજિટલ કન્ટેન્ટની ખરીદી હજી પણ મોંઘી રહે છે!