થોડા સમય પહેલાં કરિયાણા કે સ્ટેશનરીના નાના દુકાનદારોને ડર હતો કે તેમના ગ્રાહકો મોટા મોટા મોલમાં ખેંચાઈ રહ્યા છે. એ પછી નાના મોટા રિટેલર્સ અને મોલ એક તરફ આવી ગયા અને તેમને ઓનલાઇન શોપિંગ સાઇટ્સ તરફથી તીવ્ર સ્પર્ધાનો સામનો કરવાનો સમય આવ્યો.

આવું જ હવે ટ્યૂશન ક્લાસીસ અને વિરાટ એજ્યુકેશનલ પ્લેટફોર્મ્સ વચ્ચે થઈ રહ્યું છે. આપણે જાણીએ છીએ કે રાજસ્થાનનું કોટા શહેર સ્પર્ધાત્મક પરીક્ષાઓના કોચિંગ ક્લાસ માટે દેશભરમાં કેપિટલ તરીકે જાણીતું છે. થોડા સમય પહેલાં એવું બન્યું કે એક મોટા ઓનલાઇન એજ્યુકેશનલ પ્લેટફોર્મે કોટા શહેરમાં જાહેરાતોનાં હોર્ડિંગ મૂક્યાં અને વિદ્યાર્થીઓને કોચિંગ ક્લાસની ફીમાં ૯૫ ટકા ડિસ્કાઉન્ટ આપવાની જાહેરાત કરી!

શરત એટલી હતી કે જે વિદ્યાર્થીઓ કોઈને કોઈ વાસ્તવિક ટ્યૂશન ક્લાસમાં જોડાયેલા હોય માત્ર તેમને જ આ ડિસ્કાઉન્ટનો લાભ મળી શકે. આનો અર્થ એ થયો કે જેઈઈ કે નીટ જેવી પરીક્ષાની તૈયારી માટે કોઈ સ્ટુડન્ટે રોજિંદા ટ્યૂશન ક્લાસમાં જોડાઈને એક લાખ રૂપિયા કે તેથી વધુ ફી ભરી હોય, તે આ ટ્યૂશન ક્લાસમાંથી પોતાની ફી પરત માગીને વર્ચ્યુઅલ ટ્યૂશન ક્લાસમાં જોડાઈ જાય તો તેને માત્ર પાંચ હજાર રૂપિયા જેટલી ફી ભરવાની થાય.

ઘણા ખરા રોજિંદા ટ્યૂશન ક્લાસીસ હપ્તામાં ફી ભરવાની સગવડ આપતા હોવાથી કદાચ તે છૂટા થવા માગતા વિદ્યાર્થીએ ભરેલી ફી પરત ન કરે તોય વિદ્યાર્થીને ટ્યૂશન બદલવાનું બહુ મોંઘું પડે નહીં.

સ્કીમ માત્ર થોડા સમય માટે હતી. પરંતુ કોટામાં હોબાળો મચ્યો. વિદ્યાર્થીઓ ઉપરાંત ટીચર્સ પણ વધુ પગાર અને સગવડથી લલચાઈ સામાન્ય ટ્યૂશન ક્લાસ છોડીને વર્ચ્યુઅલ ક્લાસમાં જોડાઈ રહ્યા છે. આ કારણે દેશભરના રોજિંદા ટ્યૂશન ક્લાસના સંચાલકો વર્ચ્યુઅલ પ્લેટફોર્મ સામે અકળાયા છે. તેમનું એસોસિએશન વર્ચ્યુઅલ કોચિંગ પ્લેટફોર્મ્સની નીતિ રીતિઓ તથા ફીમાં ‘‘વધુ પડતું ડિસ્કાઉન્ટ ઓફર’’ કરવા જેવી મોનોપોલી સર્જતી તરકીબો સામે અવાજ ઉઠાવવાનું વિચારી રહ્યું છે. કોચિંગ ક્લાસિસનું એસોસિએશન આ બાબતે વડાપ્રધાનના મંત્રાલયને એક પત્ર લખે તથા કોમ્પિટિશન કમિશન ઓફ ઇન્ડિયાનો પણ સંપર્ક કરે તેવી શક્યતા છે.