તમને યાદ હશે કે થોડા સમય પહેલાં ‘સાયબરસફર’માં આપણે ગૂગલની નવી ઓપરેટિંગ સિસ્ટમ વિશે વાત કરી હતી. ક્રોમઓએસ ફ્લેક્સ નામની આ ફ્રી ઓપરેટિંગ સિસ્ટમની મદદથી આપણે પોતાના જૂના વિન્ડોઝ કે મેક પીસી, લેપટોપમાં રીતસરનો નવો પ્રાણ ફૂંકી શકીએ છીએ. જોકે આ નવી ઓપરેટિંગ સિસ્ટમ લોન્ચ કરવામાં આવી ત્યારે તે પ્રમાણમાં મર્યાદિત વિન્ડોઝ, મેક કમ્પ્યૂટર્સમાં ઇન્સ્ટોલ કરી શકાતી હતી. હવે તેનો વ્યાપ ઘણો વધારવામાં આવ્યો છે. ગૂગલના કહેવા અનુસાર હવે આ ઓપરેટિંગ સિસ્ટમ જુદાં જુદાં ૪૦૦ જેટલાં ડિવાઇસમાં ઇન્સ્ટોલ કરી શકાય છે.

આથી જો તમારી પાસે જો કોઈ જૂનું વિન્ડોઝ કે મેક લેપટોપ હોય અને તેની મૂળ ઓપરેટિંગ સિસ્ટમ તેને હવે ભારે પડી રહી હોય તો તેમાં આ નવી ઓપરેટિંગ સિસ્ટમની અજમાયશ કરી શકો છો. એ માટે તમારે ક્રોમ ઓએસ ફ્લેક્સ વેબસાઇટ (https://chromeenterprise.google/os/chromeosflex/)પર જવાનું રહેશે અને કોઈ ખાલી પેનડ્રાઇવમાં ક્રોમ ઓએસનું બૂટેબલ ઇન્સ્ટોલેશન ડાઉનલોડ કરવાનું રહેશે. આ પછી તમારા મશીનમાં પહેલાં એ પેનડ્રાઇવથી નવી ઓપરેટિંગ સિસ્ટમ રન કરી જુઓ. જો બધું બરાબર ચાલે છે એમ લાગે અને નવી ક્રોમ ઓપરેટિંગ સિસ્ટમથી તમારા કમ્પ્યૂટરનું પર્ફોર્મન્સ ખરેખર સુધર્યું છે એવું લાગે તો પછી તમે કમ્પ્યૂટરમાંની જૂની ઓપરેટિંગ સિસ્ટમને સ્થાને આ નવી ઓપરેટિંગ સિસ્ટમ ઇન્સ્ટોલ કરી શકો છો. જોકે યાદ રાખશો કે વિન્ડોઝ અને મેક ઓએસમાં ચાલતા ઘણા પ્રોગ્રામ ક્રોમઓએસમાં ન ચાલે એવું બની શકે છે.

આથી તમારી પાસે કોઈ જૂનું લેપટોપ પડ્યું હોય જે હવે ધીમું ચાલતું હોય અને તેમાં તમે માત્ર વિન્ડોઝમાં જ ચાલે તેવા કોઇ પ્રોગ્રામ હવે ચલાવવા માગતા ન હો તો જ તેમાં આ નવી ઓપરેટિંગ સિસ્ટમ ઇન્સ્ટોલ કરી શકો છો. ક્રોમ ઓપરેટિંગ સિસ્ટમ ઘણી લાઇટ વેઇટ હોવાથી આજના સમયની સરખામણીમાં પ્રમાણમાં નબળા હાર્ડવેરવાળા લેપટોપ કે પીસીમાં પણ તમે સારી રીતે કામ કરી શકશો.

અલબત્ત ક્રોમ ઓપરેટિંગ સિસ્ટમમાં તમારું બધું કામકાજ ક્લાઉડમાં કરવાનું વધુ સરળ રહેશે. એટલે કે તમારું કામકાજ મોટે ભાગે ઇન્ટરનેટના સર્ફિંગ આધારિત હોય અને ઓફિસના કામકાજ માટે તમે ગૂગલ ડ્રાઇવ જેવી સર્વિસનો ઉપયોગ કરતા હો તો જ આ વિકલ્પ તમારે માટે કામનો છે.