ઘણી વાર એવું બને કે વર્ડ ડોક્યુમેન્ટમાં કામ કરતી વખતે આપણે કોઈ વાક્ય કે પેરેગ્રાફને હાઇલાઇટ કરવાનો હોય.
આ કામ આમ તો ઘણી જુદી જુદી રીતે થઈ શકે. આપણે તેને બોલ્ડ કરી શકીએ, અલગ કલર આપી શકીએ, જુદા કલરના હાઇલાઇટરથી હાઇલાઇટ કરી શકીએ કે એ ટેકસ્ટને બોક્સમાં મૂકી શકીએ.
વર્ડમાં ટેકસ્ટને બોક્સમાં મૂકવા માટે ડોક્યુમેન્ટમાં ટેકસ્ટ બોક્સ ઇન્સર્ટ કરવાની પણ સગવડ હોય છે. પરંતુ તેની તકલીફ એ છે કે એવી રીતે મુખ્ય લખાણથી અલગ ટેકસ્ટ ઉમેરવા જતાં ઘણી વાર એ બોક્સ મેઇન ટેકસ્ટનો ભાગ ન રહેવાથી મેઇન ટેકસ્ટમાં આપણે કોઈ ફેરફાર કરીએ તો બોક્સમાં રહેલી ટેકસ્ટ એની જગ્યાએ જ રહી જાય છે અને બાકીનું લખાણ ફરી જાય છે!
આના ઉપાય તરીકે મુખ્ય લખાણમાં જ કોઈ ભાગને પસંદ કરીને એને બોક્સમાં મૂકવાની રીત અજમાવવી વધુ યોગ્ય થાય.
- જ્યારે કોઈ એક વાક્યને બોક્સમાં મૂકવું હોય ત્યારે એ વાક્ય સિલેક્ટ કરો.
- મથાળાની રિબનમાં હોમ ટેબમાં પેરેગ્રાફ સેકશનમાં બોર્ડરના ડ્રોપ ડાઉન મેનૂમાં જાઓ.
- તેમાં ‘બોર્ડર એન્ડ શેડિંગ’ના વિકલ્પોમાં જાઓ.
- અહીં જમણી તરફ ‘એપ્લાય ટુ’ના ડ્રોપ ડાઉન મેનૂમાં ટેકસ્ટ પસંદ કરો.
- ડાબી તરફના વિકલ્પોમાં તમારે જે પ્રકારે બોર્ડર આપવી હોય તો પસંદ કરી લો.
તમે વાક્ય કે ફકરાની ચારે તરફ બોર્ડર આપી શકો છો અથવા માત્ર ઇચ્છો એ બાજુએ બોર્ડર એપ્લાય કરી શકો છો. આ જ મેનૂમાંથી બોર્ડરની સ્ટાઇલ, કલર તથા વિડ્થ પણ નક્કી કરાશે.