તમારા પરિવારમાંથી કોઈ સ્ટુડન્ટને કોલેજ પૂરી કર્યા પછી બેંગલુરુ, હૈદ્રાબાદ કે પરદેશના કોઈ શહેરમાં જોબ મળે અને એ પહેલી વાર ઘર છોડીને નવા શહેરમાં સેટલ થવા જાય ત્યારે માતા-પિતાના મનમાં સ્વાભાવિક રીતે ચિંતા રહે કે નવા શહેરમાં તેને રહેવાની જગ્યા સારી તો હશે ને?

હવેના સમયમાં પેઈંગ ગેસ્ટ કે અન્ય પ્રકારે રેન્ટ પર શેર્ડ એપાર્ટમેન્ટ શોધવાનું સહેલું બન્યું છે. ફેસબુક જેવી સોશિયલ મીડિયા સાઇટ્સ પર અનેક લોકો આ રીતે ઘર શોધી રહેલા લોકોને મદદરૂપ થતા હોય છે. પરંતુ મનમાં પેલી ચિંતા તો રહે જ – ઘર જ્યાં ભાડે લેવાનું વિચાર્યું છે એ વિસ્તાર કેવો હશે? જ્યાં સુધી ત્યાં જાતે પહોંચીને આપણે ખાતરી કરીએ નહીં કે બધું બરાબર છે ત્યાં સુધી મનમાં થોડો અજંપો રહે.

સત્તરેક વર્ષ પહેલાં સાદા નક્શાઓને ડિજિટલ સ્વરૂપ મળ્યું ત્યારથી, નક્શાની દુનિયા જ જાણે બદલાઈ ગઈ છે.

હવે આ સમસ્યાનો ગૂગલ મેપ્સમાં ઉપાય મળશે. ગૂગલ મેપમાં તમે જાણો છો તેમ વિવિધ પ્રકારના લેયર એક્ટિવેટ કરી શકાય છે. જેમ કે આપણે સ્ટાન્ડર્ડ મેપ જોઈ શકીએ અથવા સેટેલાઇટ વ્યૂ ઇનેબલ કરી શકીએ. સ્ટ્રીટવ્યૂની મદદથી જે તે જગ્યાએ જાતે ઊભા હોઇએ ત્યારે આજુબાજુ દેખાતી બાબતોને પણ મેપ પર જોઇ શકીએ. અમુક સ્થળો માટે લાઇવ વ્યૂની પણ સગવડ છે અને હવે તેમાં ‘ઇમર્સિવ વ્યૂ’નો ઉમેરો થઈ રહ્યો છે.

આ પ્રકારના વ્યૂમાં સ્ટ્રીટવ્યૂને એરિયલ ઇમેજિસ સાથે સાંકળી લેવામાં આવે છે અને એ રીતે વિવિધ જગ્યાઓના થ્રીડી મોડેલ તૈયાર કરવામાં આવે છે. ઇમર્સિવ વ્યૂમાં આપણે કોઈ લોકેશન પસંદ કરીએ ત્યારે સૌથી પહેલાં આપણે પંખીની નજરે તેને જોઈ રહ્યા હોઇએ તેવો વ્યૂ જોવા મળે છે. પછી ઝૂમ ઇન કરીને આપણે જે તે સ્થળે રૂબરૂ પહોંચ્યા હોઇએ તેવો અનુભવ મેળવી શકીએ છીએ.

સ્માર્ટફોન આવતાં આખી દુનિયાનાં સ્થળોની વિવિધ માહિતી, નક્શાના સંદર્ભ સાથે, ખરા અર્થમાં હાથવગી બની.

માની લો કે આપણે અમેરિકાના ન્યૂયોર્ક કે લંડન જેવા કોઈ શહેરની મુલાકાત લેવા માગીએ છીએ તો આ શહેરના નિશ્ચિત વિસ્તારો દિવસના વિવિધ ભાગમાં કેવા લાગે છે કે ક્યા સમયે કઈ જગ્યાએ વધુ ભીડ રહે છે, વેધરની અલગ અલગ સ્થિતિમાં આ વિસ્તારોમાં કેવો અનુભવ થાય છે એ બધું જ આપણે એ સ્થળે પહોંચ્યા પહેલાં પોતાના ઘરમાં બેસીને મેપ્સ એપમાં અનુભવ કરી શકીશું! ત્યાં સુધી કે કોઈ મોલ કે રેસ્ટોરાંની અંદર પહોંચીને તેના થ્રીડી મોડેલ પણ આપણે જોઈ શકીશું.

ગૂગલ મેપ્સ એપમાં ઇમર્સિવ વ્યૂ આ વર્ષમાં થોડા મહિનાઓમાં લોન્ચ થઈ જશે અને લગભગ દરેક ફોન કે ડિવાઇસમાં તેનો લાભ લઈ શકાશે. શરૂઆતમાં માત્ર ન્યૂયોર્ક, સાનફ્રાન્સિસ્કો, લોસએન્જેલસ, લંડન અને ટોકિયો શહેરના વિવિધ વિસ્તારોને ઇમર્સિવ વ્યૂમાં જોઈ તપાસી શકાશે. સમય સાથે વિવિધ શહેરોમાં આ સુવિધા ઉમેરાતી જશે.

ગૂગલે આ ફીચરના ડેમો રૂપે એક વીડિયો લોન્ચ કર્યો છે. તેમાં શરૂઆતમાં આપણે પસંદ કરેલા લોકેશનનું કોઈ ડ્રોનથી શૂટિંગ થઈ રહ્યું હોય એવો વ્યૂ દર્શાવવામાં આવ્યો છે. વિહંગાવલોકન એટલે કે ‘પંખીની નજરે જોવાતાં દૃશ્યો’ શબ્દો સાર્થક થતા હોય તેમ આ વ્યૂમાં આકાશમાં ઊડતાં પંખીઓ પણ જોઈ શકાય છે!  દેખીતી રીતે આ લાઇવ ઇમેજ નથી, પરંતુ લાઇવ હોવાનો આભાસ જરૂર આપે છે. એ પછી સ્ક્રીન પર ટાઇમ સ્લાઇડર જોવા મળે છે જેની મદદથી આપણે હાલના સમયથી શરૂઆત કરીને ભવિષ્યના વિવિધ સમય પસંદ કરી શકીએ છીએ. આ દરમિયાન રસ્તા પર કેટલો ટ્રાફિક છે તે પણ કાર સાથે જોઈ શકીએ છીએ.

આ સુવિધાને હવે એક નવા સ્તરે લઈ જવામાં આવી રહી છે. હવે અમુક સ્થળોનો જાત અનુભવ શક્ય બનશે – નક્શા પર.

આ બધું આખરે આભાસી અને વર્ચ્યુઅલ હોવા છતાં કોઈ જગ્યાનું લાઇવ સ્ટ્રીમિંગ જોઈ રહ્યા હોઇએ તેવો અનુભવ આપે છે. એ પછી આ વીડિયોમાં ઝૂમ ઇન થઈને આપણે કોઈ રેસ્ટોરાંમાં દાખલ થઈએ છીએ અને પછી તેના રીસેપ્શન ડેસ્કને પાર કરીને ડાઇનિંગ એરિયાને પણ તપાસી શકીએ છીએ!

ગયા વર્ષે એપલે આઇઓએસ૧૫માં તેની મેપ્સ એપમાં થ્રીડી વ્યૂ લોન્ચ કર્યા છે. દેખીતી રીતે ગૂગલે ઇમર્સિવ વ્યૂથી તેનો પોતાની રીતે જવાબ આપવાની કોશિશ કરી છે!