નવરાત્રિને હજી વાર છે, પણ માની લો કે નવરાત્રિ આવી ગઈ છે, તમે ‘ટ્રેન્ડીશનલ’ ડ્રેસમાં સજ્જ થઈને ફ્રેન્ડ્સ સાથે ગરબાની રમઝટ માણી રહ્યા છો. એ સમયે, તમારી નજીક, રાત્રીના સમયે પણ સ્ટાઇલિશ ગોગલ્સ પહેરેલ કોઈ હેન્ડસમ યુવાન કે ફૂટડી યુવતી તમને ટીકી ટીકીને જુએ છે એવું લાગે, તો બહુ ખુશ ન થશો. બની શકે એ યુવક કે યુવતી તમારો વીડિયો ઊતારી રહ્યા હોય અને પછી તેને ફેસબુક, ઇન્સ્ટાગ્રામ, વોટ્સએપ કે એવી બીજી એપ પર સ્ટોરી તરીકે શેર કરવાની તૈયારીમાં હોય! એ વ્યક્તિના હાથમાં સ્માર્ટફોન કે કોઈ કેમેરા નથી. ફક્ત તેણે ગોગલ્સ પહેર્યાં છે.

આ છે ફેસબુકની નવી ભેટ – ‘સ્માર્ટ ગોગલ્સ’, આઇવેર માટે વિશ્વસ્તરે જાણીતી બ્રાન્ડ રે-બાન (કે રે-બેન) સાથે મળીને.

આ અગાઉ ફેસબુક જેવી સ્નેપચેટ એપે, માત્ર તેના પ્લેટફોર્મ પર શેર કરી શકાય તેવા વીડિયો/ઇમેજ કેપ્ચર કરતાં ‘સ્પેક્ટેકલ્સ’ લોન્ચ કર્યાં હતાં. એની પણ પહેલાં, ગૂગલના સ્માર્ટ ગ્લાસ ગાજ્યા હતા.

આ ગોગલ્સ હજી ભારતમાં ઉપલબ્ધ નથી, પણ તેના વિશે જાણી રાખીએ.

એમાં ઓગમેન્ટેડ રિયાલિટી હોવાથી તેના મેડિકલ કે ઇન્ડસ્ટ્રીયલ યૂઝની પણ શક્યતાઓ હતી, પણ એ ગ્લાસિસ છેવટે ગૂગલે પાછા ખેંચી લીધા.

હવે ફેસબુકે આ ગોગલ્સ લોન્ચ કર્યાં છે.

આમ તો તે સપ્ટેમ્બર ૨૦૨૧માં જ લોન્ચ થઈ ગયાં હતાં, હવે તેમાં નવાં નવાં ફીચર્સ ઉમેરાઈ રહ્યાં છે. આ ગોગલ્સનો ઉપયોગ કરનારા લોકો કહે છે કે હાલમાં તે વધુ એક ‘ટેક-ટોય’થી વિશેષ કશું જ નથી. તે ફક્ત, પ્રાઇવસીની બાબતે મોટી પરેશાની ઊભી કરી શકે તેમ છે કેમ કે લોકો આવાં ગોગલ્સ પહેરીને ગમે ત્યાં, ગમે ત્યારે, ગમે તે વ્યક્તિનો, તેને ખાસ જાણ ન થાય એ રીતે, વીડિયો કે ફોટો લઈ શકે છે!