બિલકુલ નાના પાયે કામકાજ કરી રહ્યા છો? તમારી બિઝનેસ વિગતો વોટ્સએપમાં ટાઇપ કરો અને એ જ શેર કરતા રહો! જૂનું વિઝિટિંગ કાર્ડ હોય તો એનો સારો ફોટો પાડી તેનાથી કામ ચલાવી શકાય.

થોડા આગળ વધીને, માઇક્રોસોફ્ટ વર્ડમાં બિઝનેસ કાર્ડનું ટેમ્પ્લેટ પસંદ કરી, તેમાં વિગતો ઉમેરો અને તેને પીડીએફ તરીકે સેવ કરી લો.

હજી આગળ વધવું હોય તો પાવરપોઇન્ટમાં સ્લાઇડની સાઇઝ બદલીને વર્ટિકલ બિઝનેસ કાર્ડ જેવી કરો, તેમાં તમારો મજાનો ફોટોગ્રાફ ઉમેરો, વિગતો ઉમેરો, ફેસબુક, ઇન્સ્ટાગ્રામ, ટ્વીટર વગેરે એકાઉન્ટનાં એડ્રેસ લખો અને તેની લિંક પણ આપો. ફરી તેની પીડીએફ બનાવી લો. પીડીએફ ઓપન કરી, લિંક્સ બરાબર કામ કરે છે તે તપાસી લો અને પછી તમે જાતે ક્રિએટ કરેલું આ ડિજિટલ કાર્ડ સૌને શેર કરતા રહો!

આટલે સુધી આપણું કામ સહેલું થશે, પણ કાર્ડ મેળવનાર ટેકસેવી નહીં હોય અને એ આપણા કાર્ડને ગૂગલ કીપ જેવી સર્વિસમાં સેવ નહીં કરે, તો એનું કામ સહેલું થશે નહીં. તેમની એડ્રેસબુકમાં આપણી વિગતો સહેલાઈથી સેવ થશે નહીં!

ત્યાં સુધી પહોંચવા માટે https://www.hihello.me/ જેવી સર્વિસની તમે મદદ લઈ શકો. આ સર્વિસ મનુ કુમાર નામના કેલિફોર્નિયામાં સ્થાયી થયેલા મૂળ ભારતીયે લોન્ચ કરેલી છે. તેમણે આ પહેલાં પેપર વિઝિટિંગ કાર્ડને સ્કેન કરીને ડિજિટલ કોન્ટેક્ટ્સ સેવ કરવાની સગવડ આપતી ‘કાર્ડમન્ચ’ નામની સર્વિસ લોન્ચ કરી હતી. ૨૦૧૧માં લિંક્ડઇન કંપનીએ તેને ખરીદી લીધી. આ પછી મનુ કુમારે ‘હાઇહેલ્લો’ સર્વિસ લોન્ચ કરી.

એન્ડ્રોઇડ અને આઇફોનમાં એપ તરીકે કે બ્રાઉઝરમાં આ સર્વિસનો ઉપયોગ કરી શકાય છે.

આપણે ફ્રી એકાઉન્ટ ખોલાવી બહુ સહેલાઈથી ઉપરના સ્ક્રીનશોટ જેવું ડિજિટલ બિઝનેસ કાર્ડ બનાવી શકીએ છીએ. તમે નામ, ફોન નંબર, ઈમેઇલ, પોસ્ટલ એડ્રેસ, વેબસાઇટ વગેરે વિગતો ઉપરાંત વિવિધ સોશિયલ સર્વિસની લિંક્સ પણ એડ કરી શકો. ઇચ્છો તો એકથી વધુ કાર્ડ પણ ક્રિએટ કરી શકો છો.

એ પછી આ કાર્ડનો ક્યૂઆર કોડ બનાવીને તેને શેર કરો અથવા  તેની લિંક ફેસબુક, ટવીટર, લિંક્ડઇન, વોટ્સએપ, મેસેજ કે ઈ-મેઇલમાં કોઈને પણ મોકલો. સામેની વ્યક્તિ તેને ક્લિક કરે તો ઉપર બતાવ્યા મુજબનું કાર્ડ જોવા મળે!

એ તેને ક્લિક કરી, તમારી વિગતો પોતાના ફોનમાં સેવ કરી શકે છે.

આનો અર્થ એ પણ થયો કે કોન્ટેક્ટ્સની આપલે માટે જેનો સૌથી વધુ ઉપયોગ થાય છે તે વોટ્સએપમાં માત્ર લિંક કે ક્યૂઆર કોડ જશે, પહેલાં તેમને આવું કાર્ડ જોવા મળશે નહીં.

થોડું સર્ચ કરતાં, આ પ્રકારની સર્વિસ આપતી ઘણી કંપની મળી આવશે. લગભગ દરેક ફ્રી ટ્રાયલ આપે છે, પરંતુ અમુક, કેટલીક મર્યાદા સાથે લાઇફટાઇમ ફ્રી પ્લાન પણ આપે છે, થોડું રિસર્ચ કરવું પડશે!

ઉપાય તરીકે તમે કાર્ડને ઇમેજ તરીકે સેવ કરી, તેને શેર કરો અને સાથે તેની લિંક મોકલો, જેને ક્લિક કરી તમારી વિગતો સેવ કરી શકાય.

તમે આ કાર્ડને જ તમારા ઈ-મેઇલ પ્રોગ્રામમાં સિગ્નેચર તરીકે સેટ કરી શકો છો. વધુ એક મજાની સગવડ પણ છે. તમારી વિગતો અને કાર્ડના ક્યૂઆર કોડ સાથેનું ઝૂમ વીડિયો મીટિંગ માટેનું બેકગ્રાઉન્ડ તૈયાર કરી શકાય છે. અન્ય લોકો ચાલુ મીટિંગે કોડ સ્કેન કરી, તમારી વિગતો સેવ કરી શકશે!

કેટલીક કંપની આ બધી જ સગવડો સાથે, એક ચિપવાળું ફિઝિકલ કાર્ડ ખરીદવાની પણ સગવડ આપે છે. એ કાર્ડને ‘નીયર કમ્યૂનિકેશન ફીલ્ડ (એનએફસી)’ ફીચર ધરાવતા સ્માર્ટફોન પર ટેપ કરતાં, કાર્ડમાંની વિગતો ફોનમાં સેવ થઈ જાય છે!