ફેસબુક પર ફોટોઝ અપલોડ કરવા બહુ સહેલા છે. પરંતુ કોઈ કારણસર તમે ફેસબુક પર અપલોડ કરેલા તમારા અમુક ફોટોઝ પ્રાઇવેટ રાખવા માગતા હો કે અમુક મર્યાદિત લોકો સાથે શેર કરવા માગતા હો તો એ થોડું અટપટું કામ છે.

ફેસબુક મૂળભુત રીતે સોશિયલ મીડિયા પ્લેટફોર્મ છે. તેનો મુખ્ય હેતુ શેરિંગ છે. આથી તેનો સિક્યોર ફોટો સ્ટોરેજ પ્લેટફોર્મ તરીકે ઉપયોગ કરી શકાય એવી અપેક્ષા રાખવી ખોટી છે. આથી પહેલી વાત એ કે ફેસબુક પર ચડાવેલા ફોટોઝ પર આપણો અંકુશ રહેવાનો નથી એમ માની ને જ ફોટો કે વીડિયો અપલોડ કરશો.

ફેસબુકમાં પૂરી પ્રાઇવસી શક્ય નથી એમ માનીને જ તેમાં ફોટોઝ અપલોડ કરશો.

આમ પણ અગાઉ ફેસબુક પર એવી સ્થિતિ હતી કે આપણે તેના પર જે કંઈ અપલોડ કરીએ એ બધું બાય ડિફોલ્ટ પબ્લિક રહેતું એટલે કે સૌ કોઈ જોઈ શકે એ રીતે તેનું શેરિંગ થતું. સમય જતાં ફેસબુક પર પણ પ્રાઇવસીની ડિમાન્ડ વધતી ગઈ અને તે અનુસાર ફેસબુકે આપણે જે કંઈ પોસ્ટ કરીએ તેના પર વધુ ને વધુ કન્ટ્રોલ આપવાની શરૂઆત કરી.

ફેસબુક પરનાં પ્રાઇવસી સેટિંગ બદલીએ ત્યારે એક લાક્ષણિકતા ખાસ ધ્યાનમાં લેવી જોઇએ.

અહીં આપણે જે કોઈ સેટિંગ બદલીએ એ ભવિષ્ય માટે ડિફોલ્ટ બની જાય છે. એટલે કે આપણે એક વાર અપલોડ કરેલો ફોટો માત્ર અમુક લોકો જોઇ શકે એવું સેટિંગ કરીએ તો પછી ભવિષ્યમાં જેટલા ફોટો અપલોડ કરીશું એ બધા બાય ડિફોલ્ટ અમુક જ લોકો જોઈ શકશે. એ જ રીતે જો ફોટોઝ કે અન્ય બાબતો પ્રાઇવેટ રાખી હશે અને પછી કોઈ એક પોસ્ટ કે ફોટો સૌ કોઈ જોઈ શકે એ રીતે પબ્લિકલી શેર કરીશું તો તે પછી પોસ્ટ કરેલા બધા ફોટો કે પોસ્ટ પણ પબ્લિકલી શેર થશે!

હવે મૂળ વાત કરીએ. ફેસબુકમાં અપલોડ કરેલા પોસ્ટ-ફોટોઝ માટે આપણને હંમેશા એવો વિકલ્પ મળે છે જેની મદદથી આપણે આપણા ફોટોઝ માત્ર મિત્રો જ જોઈ શકે તેવું સેટિંગ કરી શકીએ છીએ.

ફેસબુકમાં પોસ્ટ ક્રિએટ કરતી વખતે ‘ઓડિયન્સ સિલેક્ટર ટૂલ’ મળે છે. એ ડ્રોપ ડાઉન એરો પર ક્લિક કરતાં મુખ્યત્વે ‘પબ્લિક’ અથવા ‘ફ્રેન્ડઝ’ એવા બે વિકલ્પ મળે છે. જો તમે ફેસબુકનો બિઝનેસ પ્રમોશન માટે ઉપયોગ કરતા હો તો દેખીતું છે કે તમારે હેતુ તમારા ફોટોઝ કે પોસ્ટ વધુમાં વધુ લોકો જુએ તેવો હોય. આથી ઓડિયન્સ તરીકે પબ્લિક પસંદ કરી શકાય.

પરંતુ જો તમે મિત્રો કે સ્વજનો સાથે સંપર્કમાં રહેવા માટે જ ફેસબુકનો ઉપયોગ કરતા હો તો ઓડિયન્સ તરીકે ફ્રેન્ડઝ પસંદ કરવું વધુ યોગ્ય છે.  અમુક નિશ્ચિત ફ્રેન્ડ્સ સાથે શેરિંગ પણ શક્ય છે (એ આગળ શેર કરી શકે કે નહીં એ આપણે કન્ટ્રોલ કરી શકીએ). 

ફેસબુકમાં સામાન્ય રીતે આપણે કોઈ એક સેટિંગ પસંદ કરીએ, તે ભવિષ્યની બધી બાબતો માટે લાગુ થઈ જાય છે.

એ ઉપરાંત અન્ય કોઈ વ્યક્તિ ફેસબુક પર કોઈ પણ ફોટો અપલોડ કરે અને તેમાં તમને ટેગ કરે તો અમુક સેટિંગ ન હોય તો એ ફોટો સીધા તમારી ટાઇમલાઇન પર જોવા મળે છે. એવું થવા દેવાને બદલે તમને જેમાં ટેગ કરવામાં આવ્યા હોય એ ફોટોગ્રાફ પહેલાં તમે પોતે જુઓ અને પછી તેને તમારી ટાઇમલાઇન પર મૂકવાની મંજૂરી આપો એવું કરી શકાય છે.

ફેસબુકના પ્રાઇવસી સેટિંગ્સમાં જઇને ફેસબુક પર તમે અપલોડ કરેલું બધું કન્ટેન્ટ હંમેશા માત્ર ફ્રેન્ડઝ જોઈ શકે તેવું પણ સેટિંગ કરી શકાય છે.

તમે અગાઉ ફેસબુક પર અપલોડ કરેલા ફોટોઝ પણ આ રીતે મર્યાદિત લોકો જોઈ શકે અથવા મર્યાદિત હોય તેમાંથી સૌ કોઈ જોઈ શકે તે રીતે સેટિંગ બદલી શકાય છે.

ફેસબુકના પ્રાઇવસી સેટિંગ્સમાં જઇને તમે શેર કરેલી તમામ બાબતો માટે ઓડિયન્સ ગ્લોબલી બદલી શકો અથવા જો અમુક ચોક્કસ ફોટોના શેરિંગ્સ બદલવા માગતા હો તો એ ફોટો કે આલ્બમમાં જઇને તેનું સેટિંગ પણ બદલી શકાય છે. અલબત્ત, આગળ કહ્યું તેમ એક વાર કંઈ પણ ફેરફાર કરશો તે નવા ફેરફાર સુધી બધે લાગુ થશે!