આપણે ભલે કોરોનાને દોષ દઈએ, એના આવ્યા પહેલાંથી જ આપણા સૌનો સ્માર્ટફોનમાં ઇન્ટરનેટનો ઉપયોગ બહુ વધી ગયો છે. એ જ રીતે ફોનમાંની એપ્સ પણ વધુ ને વધુ પાવરફુલ બનતી જાય છે. આ બંને કારણે સ્માર્ટફોનમાં ઇન્ટરનેટ ડેટાનો ઉપયોગ સતત વધતો જાય છે.
ખાસ કરીને ભારતમાં ઇન્ટરનેટ ડેટા પ્લાન ઘણી સસ્તા થયા છે એટલે આપણે માટે આ બહુ મોટી ચિંતાનો વિષય નથી, પરંતુ એન્ડ્રોઇડ અને આઇફોન બંનેમાં ઇન્ટરનેટ ડેટાના ઉપયોગમાં બચત કરવાની કેટલીક સગવડ આપવામાં આવે છે.
‘ડેટા સેવર’ મોડ તરીકે ઓળખાતી આ વ્યવસ્થા અમુક ખાસ કિમિયા અજમાવીને સ્માર્ટફોનમાં ઇન્ટરનેટ ડેટાની ખપત ઘટાડે છે. બેકગ્રાઉન્ડમાં પણ ડેટાનો ઉપયોગ કરતી એપ્સ પર આપણે ડેટા સેવર મોડથી આપોઆપ રોક લગાવી શકીએ છીએ.
આ સગવડ ઘણા લોકોને બહુ કામની છે, પરંતુ આપણને સસ્તા ભાવે લગભગ અનલિમિટેડ ડેટા મળતો હોય તો ફોનમાં ડેટા સેવર મોડની આપણે જરૂર નથી. (એન્ડ્રોઇડ ક્રોમમાં આ સગવડ હવે બંધ થવામાં છે). આપણે જો ફોનમાં આ મોડ ઇનેબલ કર્યો હોય તો તેને કારણે ફોનમાં ઇન્ટરનેટ કનેકશન ધીમું પડતું હોય એવું લાગી શકે.
આના ઉપાય તરીકે એન્ડ્રોઇડમાં સેટિંગ્સમાં નેટવર્ક એન્ડ ઇન્ટરનેટમાં જાઓ અને તેનો ડેટા સેવર મોડ ઓન હોય તો તેને બંધ કરી જુઓ. આઇફોનમાં આ મોડ ‘લો ડેટા મોડ’ તરીકે ઓળખાય છે. તમે સેટિંગ્સમાં સેલ્યુલર અને તેમાં સેલ્યુલર ડેટા ઓપ્શન્સમાં જઇને આ મોડ બંધ કરી શકો છો.