ફેસબુક, ગૂગલ વગેરે બધી જાણીતી કંપની હવે આ સગવડ આપે છે – તમે તમારા પોતાના એકાઉન્ટમાં લોગ-ઇન ન થઈ શકતા હો અને તમારા વિશ્વાસપાત્ર મિત્રોની ઓળખ પહેલેથી તમે જે તે કંપનીને આપી રાખી હોય, તો એ મિત્રોની મદદથી કંપની ખાતરી કરે છે કે આપણે ‘આપણે પોતે જ’ છીએ!
એપલ પણ આ રીતે તમારા એપલ આઇડી એકાઉન્ટમાં ‘એકાઉન્ટ રીકવરી કોન્ટેક્ટ’ ઉમેરવાની સગવડ આપે છે. કોઈ સંજોગમાં તમે પોતે તમારા એકાઉન્ટમાં લોગ-ઇન ન થઈ શકો ત્યારે એકાઉન્ટ રીકવરી કોન્ટેક્ટ તરીકે જેમની મદદ લઈ શકાય એવા ભરોસાપાત્ર એક કે વધુ મિત્રોના નામ એપલને આપી શકાય છે, તેઓ તમારો ડેટા જોઈ નહીં શકે, પણ તમને ફરી એક્સેસ મેળવવામાં મદદરૂપ થઈ શકશે (એમની ઉંમર ૧૬ વર્ષથી વધુ અને એમની પાસે એપલ ડિવાઇસ હોવું જરૂરી છે).
એ માટે આઇફોનના સેટિંગ્સમાં જાઓ. તમારા નામ કે એપલ આઇડી પર ક્લિક કરો અને ‘પાસવર્ડ એન્ડ સિક્યોરિટી’ સેકશનમાં ‘એકાઉન્ટ રીકવરી’માં જાઓ. ‘એડ રીકવરી કોન્ટેક્ટ’ પર ક્લિક કરી આગળ વધો!
