તમે આઇફોન કે એપલના અન્ય કોઈ ડિવાઇસનો ઉપયોગ કરતા હશો તો તમારું એપલ આઇડી હશે જ. એપલની વિવિધ સર્વિસ માટે એપલ આઇડી માસ્ટર કી સમાન છે.
એપસ્ટોર, એપલ મ્યુઝિક, આઇક્લાઉડ, ફેસટાઇમ વગેરે દરેક સર્વિસનો ઉપયોગ કરવા માટે એપલ આઇડી અનિવાર્ય છે. ઇ-મેઇલ એડ્રેસ અને પાસવર્ડની મદદથી એપલ આઇડી બને છે, અમુક સંજોગમાં ઇ-મેઇલ એડ્રેસને બદલે ફોન નંબરનો પણ ઉપયોગ કરી શકાય છે.
તમારા આઇફોનમાં સેટિંગ્સમાં જઈ, તમારા નામ પર ક્લિક કરીને તમારા એપલ આઇડી સંબંધિત વિગતો તપાસી શકશો. આ આઇડીને સલામત રાખવા પાસવર્ડ, સિક્યોરિટી ક્વેશ્ચન્સની વિગતો, વેરિફિકેશન કોડ્સ, રિકવરી કી કે અન્ય કોઈ વિગતો કોઈની સાથે શેર કરશો નહીં.
તમે આઇઓએસ ૧૩.૪ કે ત્યાર પછીનું વર્ઝન ધરાવતા આઇફોન માટે નવું એપલ આઇડી ક્રિએટ કર્યું હશે તો તેમાં ટુ-ફેકટર ઓથેન્ટિકેશનનો આપોઆપ ઉપયોગ થતો હશે. તમારું એપલ આઇડી જૂનું હોય અને તેમાં ટુ-ફેકટર ઓથેન્ટિકેશન ઓટોમેટિકલી ઓન ન હોય તો આ સુવિધા ઓન કરી લેવી ચોક્કસ હિતાવહ છે.