વાયટુકે (યર ટુ થાઉઝન્ડ) પ્રોબ્લેમ તમને યાદ છે? આપણે એકવીસમી સદીમાં પ્રવેશવા માટે થનગની રહ્યા હતા ત્યારે કમ્પ્યૂટર જગતના નિષ્ણાતોને એક જુદી વાતની ચિંતા સતાવતી હતી. તેમને ડર હતો કે દુનિયાભરનાં કમ્પ્યૂટર વર્ષ ૨૦૦૦ને ઓળખી શકશે નહીં. કારણ એ હતું કે ઘણા કમ્પ્યૂટર પ્રોગ્રામમાં વર્ષને ચાર અંકને બદલે માત્ર છેલ્લા બે અંકથી દર્શાવવામાં આવ્યું હતું. આ કારણે કમ્પ્યૂટરને વર્ષ ૧૯૦૦ અને વર્ષ ૨૦૦૦ વચ્ચેના તફાવતની ખબર ન પડે એવી શક્યતા હતી!

કંઈક એવી જ સમસ્યા હવે નવેસરથી સામે આવી છે. આ સમસ્યા દુનિયામાં સૌથી વધુ ઉપયોગમાં લેવાતા ગૂગલ ક્રોમ અને મોઝિલા ફાયરફોક્સને લગતી છે. મોઝિલા બ્રાઉઝર વર્ષ ૨૦૦૨માં અને ગૂગલ ક્રોમ બ્રાઉઝર વર્ષ ૨૦૦૮માં લોન્ચ થયું હતું. બંને બ્રાઉઝર સતત વધુને વધુ લોકપ્રિય થતાં ગયાં છે. બંને કંપનીએ પોતપોતાના બ્રાઉઝરમાં નવા નવા અપડેટ્સ આપીને સતત તેનાં નવાં વર્ઝન લોન્ચ કર્યાં છે. હવે આ બંને બ્રાઉઝર તેના અપડેટેડ વર્ઝનની સદી ફટકારવાની બહુ નજીક છે!

ક્રિકેટમાં સદીની નજીક પહોંચેલો બેટ્સમેન જેમ ‘નર્વસ નાઇન્ટીઝ’નો અનુભવ કરે એવું જ આ બ્રાઉઝર્સના ડેવલપર્સ અનુભવી રહ્યા છે.

કારણ એ છે કે આ બ્રાઉઝર્સનું ૧૦૦મું વર્ઝન આવશે ત્યારે તેના વર્ઝનના આંકડા પહેલી વાર બેમાંથી ત્રણ થશે અને ઘણી બધી વેબસાઇટ્સ ફક્ત બે આંકડાના બ્રાઉઝરને ઓળખી શકે એ રીતે ડિઝાઇન થયેલી છે!

ક્રોમ બ્રાઉઝર માર્ચ મહિનામાં જ અને ફાયરફોક્સ મે મહિનામાં સદી ફટકારે તેવી શક્યતા છે. બંને બ્રાઉઝરના ડેવલપર્સ આગામી મુશ્કેલીને ધ્યાનમાં રાખીને તેનો ઉપાય શોધવા માટે કામે લાગી ગયા છે. જોકે વાયટુકેના કિસ્સામાં બન્યું હતું તેમ આ વખતે પણ આ સમસ્યાનો કોઇક સચોટ ઉપાય નીકળી આવશે કેમ કે ફક્ત ૨૦ વર્ષમાં ટેકનોલોજી ઘણી આગળ વધી ગઈ છે.