મલ્ટિ-ડિવાઇસ સપોર્ટ

લાંબા સમયથી જેની રાહ જોવાઈ રહી હતી તે ફીચર આખરે ગયા વર્ષે વોટ્સએપમાં મળ્યું (‘સાયબરસફર’ના ઓગસ્ટ ૨૦૨૧ અંકમાં આ વિશે આપણે વિગતવાર વાત કરી છે).

આ ફીચરને કારણે વોટ્સએપનો એક સાથે ચાર ડિવાઇસમાં ઉપયોગ શક્ય બન્યો. આ ફીચરની મદદથી આપણે મૂળ જે સ્માર્ટફોનમાં વોટ્સએપ એકાઉન્ટ હોય એના ઉપરાંત અન્ય બ્રાઉઝરમાં વોટ્સએપ એક્સેસ કરી શકીએ છે.

આ ફીચરનો મોટો ફાયદો એ છે કે મૂળ સ્માર્ટફોન ઇન્ટરનેટ સાથે કનેક્ટેડ ન રહે તો પણ અન્ય ડિવાઇસમાં વોટ્સએપનો ઉપયોગ કરી શકાય છે.

અલબત્ત ઘણાં યૂઝર્સે નોંધ્યું છે તેમ વોટ્સએપ એકાઉન્ટ એક જ હોય તો પણ બ્રાઉઝરમાં એક્સેસ કરીએ ત્યારે અમુક મેસેજ તેમાં ન દેખાય તેવું બની રહ્યું છે. મેસેજિસ સિંક થવામાં મુશ્કેલીને કારણે હાલમાં આ તકલીફ થઈ રહી છે.

તેમ છતાં ખાસ કરીને બિઝનેસ પ્રમોશન માટે વોટ્સએપનો ઉપયોગ કરતી નાની ટીમ માટે મલ્ટિ-ડિવાઇસ સપોર્ટ વરદાનરૂપ સાબિત થઈ રહ્યો છે.

વોટ્સએપ પેમેન્ટ્સ

વોટ્સએપમાં યુપીઆઈ પેમેન્ટની પણ ઘણા સમયથી રાહ જોવાઈ રહી હતી. તેના ટ્રાયલ રનને ૨૦૧૮માં મંજૂરી મળી ગઈ હતી. પરંતુ ત્યારે બહુ મર્યાદિત પ્રમાણમાં વોટ્સએપ યૂઝર્સ તેનો ઉપયોગ કરી શકતા હતા.

ગયા વર્ષથી ચાર કરોડ લોકોને વોટ્સએપમાં યુપીઆઈની મદદથી પોતાનું બેન્ક એકાઉન્ટ કનેક્ટ કરવાની સગવડ મળી ગઈ છે. ભારતના વોટ્સએપના ટોટલ યૂઝર્સ ૪૦ કરોડ ઉપર છે એટલે આગળ જતાં વોટ્સએપને વધુ યૂઝર્સને આ સુવિધા આપવાની મંજૂરી મળશે તે પછી ભારતમાં ઓનલાઇન પેમેન્ટનું ચિત્ર હજી વધુ બદલાશે.

ગાયબ થતા મેસેજ

વોટ્સએપમાં આપણા પર પાર વગરના મેસેજ આવતા હોય તો તેને ડિલીટ કરવા એ એક મોટી કસરત થઈ જાય છે. વોટ્સએપે મેસેજિસ અમુક નિશ્ચિત સમય પછી આપોઆપ ડિલીટ થાય એવી સગવડ ગયા વર્ષે આપી અને એ પછી ગયા વર્ષે આ ફીચર અપડેટ કર્યું. હવે ૨૪ કલાક, સાત દિવસ અથવા ૯૦ દિવસ પછી મેસેજ આપોઆપ ડિલીટ થાય એવી સગવડ મળી છે. વોટ્સએપમાં જે તે વ્યક્તિ અથવા ગ્રૂપની ઇન્ફર્મેશન ધરાવતા પેજ પર પહોંચીને મેસેજ કેટલા સમય પછી ડિલીટ થાય તે આપણે નક્કી કરી શકીએ છીએ.

વેબવર્ઝનમાં વીડિયો-ઓડિયો કોલિંગ

વોટ્સએપનો તમે સ્વજનો કે મિત્રો સાથેના સંપર્ક ઉપરાંત બિઝનેસ કે ઓફિસના કામકાજ માટે પણ વધુ ઉપયોગ કરતા હો તો ગયા વર્ષે  મળેલી આ સુવિધા તમને બહુ કામ લાગી શકે છે. વોટ્સએપનું ડેસ્કટોપ વર્ઝન ડાઉનલોડ કર્યા પછી પીસી કે લેપટોપમાંથી વોટ્સએપના અન્ય યૂઝર સાથે વોઇસ કોલ કે વીડિયો કોલ કરી શકાય છે.

અત્યારે મર્યાદિત પ્રમાણમાં યૂઝર્સને આ સગવડ મળી રહી છે. પરંતુ તેનો વ્યાપ વધ્યા પછી ઓફિસના સમય દરમ્યાન લોકો સામાન્ય કોલને બદલે વોટ્સએપ કોલ  જ કરતા થઈ જાય તો નવાઈ નહીં!

પ્રાઇવસી ફીચર્સ

ગયા વર્ષે વોટ્સએપમાં કેટલાંક ખાસ પ્રાઇવસી ફીચર્સ પણ ઉમેરાયાં. આ કારણે આપણું ‘લાસ્ટ સીન’ તથા ‘ઓનલાઇન’ હોવાનું સ્ટેટસ અજાણ્યા કોન્ટેક્ટસ ન જોઈ શકે એવી સુવિધા આપણને મળી. એ માટે સેટિંગ્સમાં, એકાઉન્ટમાં, પ્રાઇવસીમાં જવાનું રહેશે.

ક્યૂઆરકોડ સ્કેનર

વોટ્સએપમાં યુપીઆઈ પેમેન્ટ સુવિધા વધુ યૂઝર્સને મળવા લાગી એ પછી વોટ્સએપે તેના કેમેરાને ક્યૂઆર કોડ સ્કેનરમાં ફેરવી નાખ્યો છે. પરિણામે આપણે વોટ્સએપમાં યુપીઆઈ એકાઉન્ટ કનેક્ટ કર્યું હોય તો કોઈ યુપીઆઈ ક્યુઆર કોડ સ્કેન કરીને એ યુપીઆઇ એકાઉન્ટને વોટ્સએપમાંથી રકમ મોકલી શકીએ છીએ કે તેની પાસેથી રકમ માગી શકીએ છીએ.

વોઇસ મેસેજ પ્રીવ્યૂ

વોટ્સએપ પર બહુ મોટા પ્રમાણમાં લોકો વોટ્સએપમાં મેસેજ ટાઇપ કરવાને બદલે વોઇસ મેસેજ મોકલી આપતા હોય છે. હજી હમણાં સુધી વોઇસ મેસેજ રેકોર્ડ કરીએ તે પછી તરત ને તરત તે સેન્ડ થઈ જતો હતો.

ગયા વર્ષથી મેસેજ રેકોર્ડ કર્યા પછી આપણે પોતે તેને ફરી સાંભળી શકીએ અને પછી યોગ્ય લાગે તો મોકલી શકીએ એવી સુવિધા મળી.

મેસેજ ટ્રાન્સફર

ગયા વર્ષે વોટ્સએપે આઇફોન અને એન્ડ્રોઇડ ફોનમાં આપણી જૂની ચેટ્સ ટ્રાન્સફર કરવાનું સહેલું બનાવી દીધું. અગાઉ આઇફોન કે એન્ડ્રોઇડના જ એક ફોનમાંથી બીજા ફોનમાં વોટ્સએપ એકાઉન્ટ ટ્રાન્સફર કરવું સરળ હતું, પરંતુ એકમાંથી બીજા પ્લેટફોર્મમાં જવું અઘરું હતું. હવે આઇફોનના કેબલ કે એન્ડ્રોઇડના યુએસબી ટાઇપ સી પોર્ટથી ચેટ સહેલાઈથી ટ્રાન્સફર કરી શકાય છે. અલબત્ત હજી આ સુવિધા અમુક ફોનમાં જ ઉપલબ્ધ છે.

ઓફિસ માટે પણ વોટ્સએપનો ઉપયોગ કરતા મોટા ભાગના લોકો સ્માર્ટફોન ઉપરાંત પીસીમાં વોટ્સએપનો ઉપયોગ કરે છે. હવે પીસીમાં જ વોઇસ કોલ પણ કરવાની સગવડ મળી છે.