સ્માર્ટવૉચની રેન્જ બહુ વિસ્તરી ચૂકી છે, પણ તેને મુખ્ય ચાર પ્રકારમાં વહેંચી શકાય.

જેમ સ્માર્ટફોન અનેક પ્રકારના હોય છે અને જબરી મોટી પ્રાઇસ રેન્જ ધરાવે છે એ જ રીતે સ્માર્ટવૉચમાં પણ અનેક પ્રકાર છે તેમ જ કિંમતની રેન્જ પણ બહુ મોટી છે.

આમાંથી કઈ સ્માર્ટવૉચની પસંદગી કરવી એ ખરેખર મુશ્કેલ કામ છે. ઉપરાંત દરેક પ્રકારની સ્માર્ટવૉચનાં ફીચર્સ હવે એકમેકને ખાસ્સાં મળતાં આવતાં હોવાથી આપણી પસંદગી વધુ મુશ્કેલ બને છે. આગળનાં પાનાંઓમાં આપણે, સ્માર્ટવૉચના વિવિધ અનુસાર, કેવા પ્રકારનાં ફીચર પર નજર નાખવી જોઈએ તેની વાત કરી.

હવે સ્માર્ટવૉચના મુખ્ય પ્રકાર કયા છે એની પણ વાત કરીએ. એ ખાસ યાદ રાખશો કે બજારમાં આ રીતે, ચોક્કસ કેટેગરી કે પ્રકાર અનુસાર સ્માર્ટવૉચ મળતી નથી. અહીં ફક્ત આપણી સમજ માટે આવા પ્રકાર તારવ્યા છે.

તમે સ્માર્ટવૉચના સિરિયસ યૂઝર હો અને બજેટનો કોઈ પ્રશ્ન ન હોય તો તમારી પાસે મુખ્ય ૩ વિકલ્પ છે ઃ એપલ વૉચ, જે માત્ર આઇફોન સાથે ચાલશે, એન્ડ્રોઇડ વેર ઓએસ ધરાવતી સ્માર્ટવૉચ, જેમાં ખાસ્સી મોટી રેન્જ મળશે અને પેબલ સ્માર્ટવોચ, જે આઇઓએસ અને એન્ડ્રોઇડ બંનેમાં ચાલી શકશે. પરંતુ તમે સિરિયસ યૂઝર ન હો, પણ માત્ર શોખ ખાતર કે ટાઇટ બજેટમાં સ્માર્ટવૉચ ખરીદવા માગતા હો તો અનેક બ્રાન્ડ અને અનેક મોડેલ્સ મળશે. એપલ અને એન્ડ્રોઇડની વેરેબલ માટેની ઓપરેટિંગ સિસ્ટમ સિવાય, જુદી જુદી કંપનીની ઓપરેટિંગ સિસ્ટમ ધરાવતી આવી સ્માર્ટવૉચ મોટા ભાગે એન્ડ્રોઇડ ફોન સાથે કનેક્ટ કરી શકાય છે. સ્માર્ટવૉચનો ઉપયોગ અને સ્પેસિફિકેશન્સની રેન્જ બહુ વિશાળ હોવાથી તેમાંથી કોઈ ચોક્કસની ભલામણ કરવી મુશ્કેલ છે, પણ અહીં આપેલી વિગતો તમને તમારા રિસર્ચમાં મદદરૂપ થશે!

૧. ક્લાસિક : બિલકુલ સિમ્પલ પ્રકારની સ્માર્ટવૉચ

ઓછા બજેટમાં સ્માર્ટવૉચનો શોખ પૂરો કરવો હોય તો સૌથી સિમ્પલ સ્માર્ટવૉચ લઈ શકાય. સામાન્ય ઘડિયાળની જેમ આવી સ્માર્ટવૉચનું મેઇન ફંકશન સમય અને તારીખ ડિસ્પ્લે બતાવવાનું છે. એ સિવાય તેમાં સ્ટોપવૉચ, ટાઇમર અને એલાર્મ ક્લોક જેવાં વધારાનાં, બેઝિક ફંકશન્સ પણ હોય છે.

આ પ્રકારની સ્માર્ટવૉચને બ્લૂટૂથની મદદથી આપણા સ્માર્ટફોન સાથે પેર કરી શકાય છે. એ પછી સ્માર્ટફોનમાં કોઈ મેસેજ આવે કે કોલ આવે ત્યારે તેનું નોટિફિકેશન સ્માર્ટવૉચના સ્ક્રીન પર સિમ્બોલ, બીપ કે એલાર્મ સ્વરૂપે જોઈ શકાય છે. આ પ્રકારની સ્માર્ટવૉચનાં કેટલાંક મોડેલ્સમાં મેસેજનો થોડો ભાગ વાંચી પણ શકાય છે. આવી સ્માર્ટવૉચમાં ફંકશન્સ મર્યાદિત હોવાનો ફાયદો એ છે કે તેમાં બેટરી ઘણા લાંબા સમય સુધી ચાલી શકે છે. 

૨. સ્માર્ટ : જરા વધુ સ્માર્ટ કામ આપતી સ્માર્ટવૉચ

સાદી સ્માર્ટવૉચ કરતાં જરા વધુ કામ આપતી સ્માર્ટવૉચ. આ પ્રકારની સ્માર્ટવૉચ કાંડા પર પહેરી હોય ત્યારે સ્ટેપ્સની ગણતરી રાખી શકે છે અને ઊંઘ મોનિટર કરી શકે છે. ઘણી સ્માર્ટવૉચમાં પલ્સ રેટનું પણ મોનિટરિંગ થઈ શકે છે. મોટા ભાગે આવી સ્માર્ટવૉચમાં જીપીએસ ટ્રાન્સમીટર હોય છે જેને કારણે આપણે કેટલું અંતર કાપ્યું તેની નોંધ જળવાય છે.

ઘણી સ્માર્ટવૉચ ખાસ ખેલાડીઓને ધ્યાનમાં રાખીને ડિઝાઇન થઈ હોય છે. આવી સ્માર્ટવૉચ સામાન્ય હેલ્થ મોનિટરિંગથી વિશેષ ફીચર્સ ધરાવતી હોય છે તેને સ્માર્ટફોન કે કમ્પ્યૂટર મારફત આપણી ફિટનેસ એક્ટિવિટીનું મોનિટરિંગ અને એનાલિસિસ કરતી એપ્સ કે સર્વિસ સાથે કનેક્ટ કરી શકાય છે. સ્માર્ટવૉચમાંનો ડેટા આ પ્રકારની સર્વિસમાં ટ્રાન્સફર કરી શકાય છે.

૩. એડવાન્સ : સ્માર્ટફોનની ખાસ્સી નજીક

અમુક સ્માર્ટવૉચ સ્માર્ટફોનના એક્સટેન્શન તરીકે કામ કરી શકે છે. તેને બ્લૂટૂથ દ્વારા સ્માર્ટફોન સાથે કનેક્ટ કરીએ એ પછી ફોનમાંની ઘણી એપ્સનાં ફીચર્સનો લાભ સ્માર્ટવૉચમાં લઈ શકાય છે. આવી સ્માર્ટવૉચમાં ગૂગલની વેર કે એપલની વૉચ ઓએસ જેવી ઓપરેટિંગ સિસ્ટમ હોય છે જેને કારણે ખાસ સ્માર્ટવૉચ માટેની ઘણી એપ્સનો આપણે લાભ લઈ શકીએ છીએ.

તેમાં ઇનકમિંગ મેસેજ તેમજ કેલેન્ડર એન્ટ્રીઝ વાંચી શકાય છે. વોઇસ રેક્ગ્નેશનથી આપણે સ્માર્ટવૉચ દ્વારા ટેકસ્ટ ટાઇપ પણ કરી શકીએ છીએ. આ પ્રકારની સ્માર્ટવૉચમાં વાંચવાની અને ટાઇપ કરવાની સુવિધા હોવાથી તેના સ્ક્રીન સામાન્ય રીતે મોટા અને બહેતર રેઝોલ્યુશનના હોય છે. જોકે આવી સ્માર્ટવૉચ ખરેખર સ્માર્ટ હોવાથી તેમાં બેટરી ઘણી ખર્ચાય છે.

૪. હાઇ-ટેક : સ્માર્ટફોનથી સ્વતંત્ર, ખરેખર સ્માર્ટવૉચ

આ પ્રકારની સ્માર્ટવૉચ અન્ય સ્માર્ટવૉચ જેવાં બધાં જ ફંકશન ધરાવે છે, પણ તેનાથી એક ડગલું આગળ પણ રહે છે. આવી સ્માર્ટવૉચને સ્માર્ટફોન સાથે કનેક્ટ કરવી પડતી નથી. બીજા શબ્દોમાં આવી સ્માર્ટવૉચને કાંડા પર પહેરી શકાય તેવો સ્માર્ટફોન કહી શકીએ. સ્માર્ટફોનની જેમ તેમાં આગવું સિમકાર્ડ હોય છે.

આવી સ્માર્ટવૉચ ઇન્ટરનેટ સાથે ડાઇરેક્ટ કનેક્ટ થઈ શકે છે અને તેમાં ઇન્ટરનેટ સર્ચ થઈ શકે છે કે જોઈતું કન્ટેન્ટ ડાઉનલોડ પણ કરી શકાય છે. જોકે સ્માર્ટફોનની સરખામણીમાં આવી સ્માર્ટવૉચનો સ્ક્રીન ઘણો નાનો હોવાથી હાલમાં તે સ્માર્ટફોનનો વિકલ્પ બની શકે તેમ નથી. બેટરી સાઇઝ ઘણી નાની ને સામે ફંકશન્સ ઘણાં વધુ હોય છે, આથી આવી સ્માર્ટવૉચની બેટરી પૂરો એક દિવસ પણ ચાલતી નથી.