અત્યારે વિવિધ ટેક કંપની જુદાં જુદાં સ્માર્ટ હોમ ડિવાઇસિસ બનાવી રહી છે. આ બધાં ડિવાઇસની પોતપોતાની આગવી ઇકોસિસ્ટમ છે. એટલે કે એક પ્રકારના ડિવાઇસ માટે ડેવલપ કરેલી એપ કે સિસ્ટમ બીજી કંપનીના સ્માર્ટ હોમ  ડિવાઇસમાં ચાલે નહીં!

વર્ષો પહેલાં મોબાઇલમાં આવી સ્થિતિ હતી. બધા મોબાઇલમાં ચાર્જિંગ માટેના પોર્ટ અલગ પ્રકારના હોય એટલે આપણે દરેક ફોન માટે અલગ ચાર્જિંગ કેબલ સાચવવો પડે. પછી તેમાં ચાર્જિંગ કેબલની બાબતે ઘણું સ્ટાન્ડર્ડાઇઝેશન થયું.

સ્માર્ટ હોમ ડિવાઇસ ડેવલપ કરતી કંપનીઓ પણ સોફ્ટવેર કે એપ્સની દૃષ્ટિએ આ પ્રકારનું સ્ટાન્ડર્ડાઇઝેશન લાવવાના પ્રયાસ કરી રહી હતી. આખરે તેમાં સફળતા મળી હોય તેવું લાગે છે. સ્માર્ટ ડિવાઇસિસ ડેવલપ કરતી ૩૦૦ જેટલી કંપનીઓએ સાથે મળીને ‘મેટર’ નામે એક સિંગલ સ્ટાન્ડર્ડ ડેવલપ કર્યું છે. મેટર હેઠળ ઓપન સોર્સ ટેકનિકલ સ્પેશિફિકેશન્સ વિકસાવવામાં આવ્યાં છે, જેનો ઉપયોગ કરીને કોઈ પણ કંપની જુદી જુદી કંપનીના સ્માર્ટ ડિવાઇસમાં કોઈ ફેરફાર વિના ઉપયોગી થઈ શકે તેવાં સોફ્ટવેર વિકસાવી શકશે.

અત્યાર સુધી એમેઝોન, એપલ, ગૂગલ, સેમસંગ વગેરે કંપનીએ પોતપોતાની માલિકીની સોફ્ટવેર ઇકોસિસ્ટમ વિકસાવી હતી, હવે મેટરના નેજા હેઠળ એક કોમન બેઝ પ્લેટફોર્મ તૈયાર થવાને કારણે આવી વાડાબંધી નહીં રહે.  આપણે ‘ઇન્ટરનેટ ઓફ થિંગ્સ’ એટલે કે ઘરના લાઇટિંગથી માંડીને રેફ્રિજરેટર, એસી, વોશિંગ મશીન વગેરે બધાં જ સાધનો ઇન્ટરનેટ સાથે કનેક્ટેડ હોય તેવી દિશામાં ઝડપથી આગળ વધી રહ્યા છીએ ત્યારે આવું સ્ટાન્ડર્ડાઇઝેશન સૌ માટે લાભદાયી છે.

મેટર વિશે વધુ જાણો https://csa-iot.org/all-solutions/matter/.