તમે ઘણી વાર નોંધ્યું હશે કે પ્લેસ્ટોરમાં આપણે કોઈ એપ જોઇએ ત્યારે તેની સાઇઝ ૧૫ – ૨૦ એમબીની દેખાય પરંતુ ફોનમાં ઇન્સ્ટોલ કર્યા પછી ફોનના સેટિંગ્સમાં એપ્સમાં એ એપના પેજ પર જઇને જોઇએ તો એપની સાઇઝ ૫૦-૫૫ એમબી જેટલી દેખાય! આમ ઘણા કિસ્સામાં એપ ઇન્સ્ટોલ કર્યા પછી તેની સાઇઝ ત્રણ ચાર ગણી વધી જતી હોય છે.
આમ થવાનું કારણ માત્ર એટલું છે કે પ્લેસ્ટોરમાંથી આપણે એપની જે ફાઇલ ડાઉનલોડ કરીએ છીએ તે એપીકે અથવા એબીબી ફોર્મેટની હોય છે. આ ફોર્મેટને આપણે ઝિપ ફોલ્ડર તરીકે સરખાવી શકીએ. એપ ડેવલપર પોતાની એપને આ ફોર્મેટમાં ગૂગલ પ્લેસ્ટોરમાં સબમિટ કરે ત્યારે ફોનમાં એપ રન થવા માટે જરૂરી તમામ કોડ, ફાઇલ્સ, ઇમેજિસ, ડેટા વગેરે બધું જ ખાસ્સું કમ્પ્રેસ્ડ થઈને એક ફોલ્ડરમાં સમાઈ જતું હોય છે.
આથી વેબ ડેવલપરને પોતાની એપ પ્લેસ્ટોરમાં સબમિટ કરવાનું સરળ રહે છે. તે જ રીતે યૂઝર માટે પ્લેસ્ટોરમાંથી એપ ફોનમાં ડાઉનલોડ કરવાનું સરળ બને છે. એપનું એ ફોલ્ડર ફોનમાં જ ડાઉનલોડ થયા પછી તેમાંની ફાઇલ એક્સ્ટ્રેક્ટ થાય છે અને મૂળ સ્વરૂપમાં ડીકમ્પ્રેસ્ડ થાય છે. આથી એપની સાઇઝ વધી જાય છે.
