મે 4, 2000 દુનિયાને મોંઘો પડ્યો લવલેટર

આજના દિવસે ફક્ત છ કલાકમાં, વિન્ડોઝ પર ચાલતાં દુનિયાભરનાં ૨૫થી ૩૦ લાખ કમ્પ્યૂટર્સમાં એક ઈ-મેઇલ ફરી વળ્યો.

તેની સબ્જેક્ટ લાઇન એવી હતી કે મોટા ભાગના લોકો તેને ઓપન કરવા લલચાયા – આઇ લવ યુ! ઈ-મેઇલ ઓપન કરતાં તેમાંનો વાઇરસ કમ્પ્યૂટરને લાગ્યો. ફક્ત આ એક વાઇરસે દુનિયાને ૮.૭ અબજ ડોલરનું નુક્સાન કર્યું.

મે 6, 1998 એપલમાં ‘આઇ’ યુગની શરૂઆત

આજના દિવસે, સ્ટીવ જોબ્સે ‘આઇમેક’ રેન્જનાં કમ્પ્યૂટર્સ લોન્ચ કર્યાં (મેક કમ્પ્યૂટર્સ ૧૯૮૪માં રજૂ થઈ ગયાં હતાં). જોબ્સના મતે, આ ‘ઇન્ટરનેટ-એજનાં કમ્પ્યૂટર્સ હતાં’ એટલે તેને નામ મળ્યું આઇમેક. આ કમ્પ્યૂટરની ડિલિવરી શરૂ થાય એ પહેલાં તેને માટે દોઢ લાખ ઓર્ડર મળી ગયા હતા! આઇમેક એટલાં ચાલ્યાં કે તેણે એપલનું સામ્રાજ્ય ઊભું કર્યું અને એપલે પછી તેની લગભગ દરેક પ્રોડક્ટમાં ‘આઇ’નો ઉપયોગ શરૂ કર્યો.

મે 10, 1894 વાયરલેસનો જન્મ

આજે રેડિયો વેવ્ઝ આધારિત વાયરલેસ ટેક્નોલોજીએ જીવન ઘણું સહેલું બનાવી દીધું છે, તેનાં મૂળ ૧૮૯૪માં આજે નખાયાં હતાં. ગૂગ્લીએલ્મો માર્કોની નામના ઇટાલિયન સંશોધકને આજના દિવસે એકાદ કિલોમીટર જેટલે દૂર સુધી વાયરલેસ સિગ્નલ્સ મોકલવામાં સફળતા મળી. પછીનાં બે વર્ષમાં તેમણે વાયરલેસ ટેલિગ્રાફી માટે વિશ્વની પહેલી પેટન્ટ મેળવી અને ૧૮૯૯માં તેમણે ઇંગ્લેન્ડ અને ફ્રાન્સ વચ્ચે વાયરલેસ સિગ્નલ્સની આપલે કરી બતાવી. ૧૯૦૯માં તેમને ભૌતિકશાસ્ત્રનું નોબેલ પારિતોષિક પણ મળ્યું.

મે 12, 1941 પહેલું ફુલ્લ ફંક્શનલ કમ્પ્યૂટર

વર્ષ ધ્યાનથી વાંચજો – ૧૯૪૧! દુનિયાનું પહેલું ફુલ્લ ફંક્શનલ, પ્રોગ્રામેબલ, ફુલ્લી ઓટોમેટિક, ડિજિટલ કમ્પ્યૂટર આ વર્ષે, આજના દિવસે રજૂ થયું હતું! ઝેડથ્રી નામનું આ કમ્પ્યૂટર કોનરેડ ઝૂસ (Konrad Zuse) નામના એક જર્મન સિવિલ એન્જિનીયર (ધ્યાન આપજો – સિવિલ એન્જિનીયર!) અને સંશોધકે વિક્સાવ્યું હતું.

તેમણે ઝેડ-વન મશીન ૧૯૩૫માં વિક્સાવ્યું હતું,પણ એ મિકેનિકલ રીતે ગણતરી કરતું હતું. ત્યાર પછી તેમણે ટેક્નોલોજી બદલી, ઝેડ-ટુ મશીન આવ્યું અને પછી ઝેડ-થ્રી આવ્યું.

જોકે એ સમયગાળો બીજા વિશ્વયુદ્ધનો હોવાથી ઝેડ-થ્રી વિશે વધુ વિગતો યુદ્ધ પૂરું થયા પછી જ પ્રકાશમાં આવી.

મે 13, 1980 કમ્પ્યૂટર્સના ‘ગઠબંધન’ની શરૂઆત

આજે એકમેક સાથે કનેક્ટેડ કમ્પ્યૂટર્સ વિનાના જગતની કલ્પના કરવી મુશ્કેલ છે, આ શક્ય બન્યું ઇધરનેટ નેટવર્કિંગ ટેક્નોલોજીથી. આજના દિવસે, ડિજિટલ ઇક્વિપમેન્ટ, ઇન્ટેલ અને ઝેરોક્સ એમ ત્રણ કંપનીએ સાથે મળીને આ પ્રકારના નેટવર્ક સ્પેસિફિકેશન્સની સંયુક્ત રીતે જાહેરાત કરી. ઇધરનેટને કારણે એકથી વધુ કમ્પ્યૂટર્સને એકબીજા સાથે જોડવાનું અને તેમની વચ્ચે ડેટાની આપલે કરવાનું શક્ય બન્યું!

મે 17, 1971 પહેલું વેબ સર્વર

યુરોપમાં ‘સર્ન’ (યુરોપિયન ઓર્ગેનાઇઝેશન ફોર ન્યૂક્લીયર રિસર્ચ) નામની સંસ્થામાં કામ કરતા ટીમ બર્નર્સ લીને એક વાતની ભારે અકળામણ થતી હતી – સંસ્થાનાં જુદાં જુદાં કમ્પ્યૂટર્સમાં સ્ટોર કરેલી ઇન્ફર્મેશન શોધવામાં પડતી અગવડ તેમને અકળાવતી હતી.

આ અકળામણમાંથી જન્મ થયો વર્લ્ડ વાઇડ વેબનો. માર્ચ ૧૨, ૧૯૮૯માં તેમણે ‘વેબ’ શબ્દનો ઉપયોગ કરીને જુદાં જુદાં કમ્પ્યૂટર્સને જોડતી વ્યવસ્થા માટે ‘‘ઇન્ફર્મેશન મેનેજમેન્ટઃ એ પ્રમોઝલ’’ની રજૂઆત કરી. જેણે આગળ જતાં, આજના દિવસે  દુનિયાના પહેલા વેબ સર્વરનું સ્વરૂપ લીધું.

મે 19, 1980 એપલ-3ની નિષ્ફળ રજૂઆત

આજના દિવસે રજૂ થયેલું એપલ ૩ કમ્પ્યૂટર એ બિઝનેસ કમ્પ્યૂટર રજૂ કરવાનો એપલનો પહેલો પ્રયાસ હતો, પણ કંપનીએ જાહેર કરેલા સમય કરતાં અડધા વર્ષ પછી છેક કંપની તેને સ્ટોર્સ સુધી પહોંચાડી શકી. એ પછી પણ તેમાં સંખ્યાબંધ ખામીઓ સર્જાતી રહી અને કંપનીએ  મોટા પ્રમાણમાં કમ્પ્યૂટર્સ પાછાં ખેંચવાં પડ્યાં.

મે 19, 2001, એપલ સ્ટોર્સની શરૂઆત

આજે એપલની દરેક પ્રોડક્ટ એકદમ આગવી હોવાની જબરજસ્ત છાપ છે. આ પ્રોડક્ટ્સ જ્યાં વેચાય છે તે એપલ કંપનીના પોતાના સ્ટોર્સ પણ બીજાથી કંઈક અનોખા હોય છે. કંપનીએ આજના દિવસે તેના પહેલા સ્ટોર્સ અમેરિકાના વર્જિનિયા અને વોશિંગ્ટનમાં ઓપન કર્યા. પાંચ વર્ષ પછી, આજના જ દિવસે કંપનીએ ન્યૂ યોર્કમાં ૨૦,૦૦૦ ચોરસ ફૂટનો સ્ટોર ઓપન કર્યો. આખો સ્ટોર અન્ડરગ્રાઉન્ડ, પણ સ્ટ્રીટ લેવલે ૩૨ ફૂટના વિશાળ કાચના ક્યૂબથી આ સ્ટોર સૌનું ધ્યાન ખેંચે છે. આ સ્ટોર ખુદ સ્ટીવ જોબ્સે ડિઝાઇન કર્યો હતો. એપલ નિષ્ફળતાઓમાંથી સફળતા તરફ વળી તેમાં તેના સ્ટોર્સનો સિંહફાળો ગણાય છે.

મે 22, 1980 પેક-મેન વીડિયો ગેમનું પબ્લિક ટેસ્ટિંગ

૯૦ના દાયકામાં જેનું કુલ વેચાણ ૨.૫ અબજ ડોલરના આંકે પહોંચી ગયું, એ જબરી લોકપ્રિય ગેમ ‘પેક-મેન’નું આજે જાપાનના એક મૂવી થિયેટરમાં પહેલું પબ્લિક ટેસ્ટિંગ થયું. એ સમયે મોટા ભાગની વીડિયો ગેમ વોર કે સ્પોર્ટ્સની થીમ પર હતી, એટલે આ ગેમ મહિલાઓ માટે બનાવાઈ, પણ છેવટે સ્ત્રી-પુરુષ બંનેમાં પોપ્યુલર થઈ. હવે તમે ફક્ત pacman સર્ચ કરીને બ્રાઉઝરમાં જ આ ગેમ રમી શકો છો.

મે 24, 1844 ટેલિગ્રાફની શરૂઆત

આજની પેઢીને, કોઈ જમાનામાં ટપાલી મહત્ત્વના સંદેશા ‘તાર’થી પહોંચાડતા એની ખબર પણ નહીં હોય! એ મૂળ ટેલિગ્રાફ સર્વિસ દોઢસોથી વધુ વર્ષ જૂની છે! બે સ્ટેશન વચ્ચે નાખેલા વાયર (તાર!) મારફત ચોક્કસ રીતે ડોટ અને ડેશના કોડ ઇલેક્ટ્રિકલ સિગ્નલ તરીકે મોકલવાની આ પદ્ધતિના શોધક સેમ્યુઅલ મોર્સ હતા (અન્યોનું પણ તેમાં યોગદાન હતું), જેણે આજના દિવસે તેનું પહેલું ટેસ્ટિંગ કર્યું હતું. સ્માર્ટફોનના યુગમાં ભારતે ૨૦૧૩માં સત્તાવાર રીતે આ સેવા સમેટી લીધી.

મે 26, 1995 સમય પારખવામાં ગોથાં

પીસી સોફ્ટવેરમાં દુનિયા પર રાજ કરનારા બિલ ગેટ્સે ૧૯૯૩માં એમ કહ્યું હોવાનું કહેવાય છે કે ‘‘ઇન્ટરનેટ? અમને એમાં રસ નથી!’’ પછી બે જ વર્ષમાં તેમને ઇન્ટરનેટનું એવું મહત્ત્વ સમજાયું કે તેમણે માઇક્રોસોફ્ટના કર્મચારીઓને આવનારા સમયમાં ઇન્ટરનેટ કેવી રીતે દુનિયા બદલશે અને માઇક્રોસોફ્ટે આ નવા સમયમાં શું કરવું જોઈશે એ દર્શાવતો એક લાંબો મેમો, આજના દિવસે લખ્યો (નેટ પર સર્ચ કરી જુઓ Bill Gates The Internet Tidal Wave). બિલ ગેટ્સે કહ્યું હતું કે આઇબીએમ કંપનીએ પર્સનલ કમ્પ્યૂટર વિકસાવ્યું એ પછી ઇન્ટરનેટ બીજા ક્રમની સૌથી મહત્ત્વની શોધ છે. આગળ જતાં, સ્માર્ટફોનના વધતા મહત્ત્વને પારખવામાં પણ માઇક્રોસોફ્ટ કંપનીએ થાપ ખાધી અને એપલ તથા એન્ડ્રોઇડની હરીફાઇમાં તેણે ટકવું મુશ્કેલ થઈ પડ્યું. આવું બીજું ઉદાહરણ ગૂગલનું છે. સોશિયલ મીડિયામાં ફેસબુકે જે ધાક જમાવી તેની સામે અનેક રીતે પ્રયાસ કરવા છતાં ગૂગલે ક્યારેય સફળતા મેળવી નહીં!

મે 29, 1992 એપલની વધુ એક નિષ્ફળ પ્રોડક્ટ

શિકાગોમાં યોજાયેલા કન્ઝ્યુમર ઇલેક્ટ્રોનિક શો (સીઇએસ)માં આજે એપલ કમ્પ્યૂટરના ત્યારના સીઇઓ જ્હોન સ્કલીએ ‘એપલ ન્યૂટન’ નામનું એક પર્સનલ ડિજિટલ આસિસ્ટન્ટ ડિવાઇસ લોન્ચ કરવાની જાહેરાત કરી. એપલનો આઇફોન લોન્ચ થવાને તો હજી પંદરેક વર્ષની વાર હતી. આ નવી પ્રોડક્ટની જાહેરાત કરતી વખતે, તેના પરથી પીઝાનો ઓર્ડર કેવી રીતે આપી શકાય તેનો ડેમો બતાવવામાં આવ્યો હતો. એ જમાનામાં આ ડિવાઇસમાં સ્ક્રીન પર, હાથે લખી શકાય એવો કન્સેપ્ટ રજૂ કરાયો હતો. લોકોમાં જબરી ઉત્સુકતા જાગી, પરંતુ જાહેરાતના પૂરા એક વર્ષ સુધી કંપની આ પ્રોડક્ટ રીલિઝ કરી શકી નહીં. રીલિઝ થયા પછી  તેનું ‘કીલર ફીચર’ સરખું ચાલ્યું જ નહીં અને બીજી ખામીઓ પણ જણાઈ. છેવટે સ્ટીવ જોબ્સે એપલ કંપનીમાં પાછા ફર્યા પછી ૧૯૯૮માં આ પ્રોડક્ટ પાછી ખેંચી લીધી.