આપણે ફેસબુક એપ ઓપન કરીએ કે પીસી/લેપટોપમાં ફેસબુક સાઇટ પર લોગઇન થઇએ ત્યારે આપણી ન્યૂઝ ફીડમાં શું જોવા મળશે એનો બધો આધાર ફેસબુકના અલ્ગોરિધમ પર હોય છે. ફેસબુક આપણી હિસ્ટ્રી અને બીજી કેટલીયે બાબતોના આધારે નક્કી કરે છે કે આપણને શું બતાવવું. હવે આ બાબત થોડી બદલાશે.
ફેસબુકે ‘ફીડ ફિલ્ટર બાર’ નામની એક નવી સગવડ રજૂ કરી છે, જેની મદદથી આપણા ફ્રેન્ડઝ અને આપણે જે પેજીસ ફોલો કરતા હોઇએ તેનું કન્ટેન્ટ જોવા અંગે આપણે નિર્ણય કરી શકીશું. આ ફીચર અત્યારે ફેસબુકની એન્ડ્રોઇડ એપ પર રોલઆઉટ થઈ રહ્યું છે અને આવનારા થોડા સમયમાં આઇઓએસ યૂઝર્સ માટે પણ લોન્ચ થશે.
ફેસબુકના વેબવર્ઝનમાં આ સગવડ મળશે કે નહીં તે નક્કી નથી. તમે કદાચ જાણતા જ હશો કે ફેસબુકના ન્યૂઝ ફીડના સેટિંગ્સમાં જઇને આપણે વધુમાં વધુ ૩૦ ફ્રેન્ડઝ અને પેજીસ ફેવરિટ ગણાવી શકીએ છીએ અને તેમનું કન્ટેન્ટ આપણી ન્યૂઝ ફીડ પર વધુ પ્રમાણમાં જોવા મળી શકે છે. નવા ફીડ ફિલ્ટર બારને કારણે ન્યૂઝ ફીડ પરનો આપણો અંકુશ વધશે.
