વિશ્વની વસતી સાડા સાત અબજના આંકે પહોંચવા આવી છે ત્યારે એન્ડ્રોઇડના પ્લે સ્ટોરમાંથી સંખ્યાબંધ એપ્સની ડાઉનલોડ સંખ્યા પાંચ અબજના આંકને ઓળંગી ગઈ છે.
હજી હમણાં સુધી કુલ ૧૩ એપ આ આંકને વટાવી શકી હતી. તેમાંથી ૧૧ એપ ગૂગલની પોતાની છે. આમ જુઓ તો આમાં બહુ નવાઈની વાત નથી કારણ કે ગૂગલ સર્ચ, યુટ્યૂબ, મેપ્સ, જીમેઇલ, ગૂગલ ડ્રાઇવ, ગૂગલ ફોટોઝ વગેરે એપ મોટા ભાગે નવા સ્માર્ટફોનમાં પહેલેથી ઇન્સ્ટોલ્ડ હોય છે. આ યાદીમાં ગૂગલ સિવાયની એપ્સમાં ફેસબુક અને વોટ્સએપ એપ સામેલ છે. મે મહિનાની શરૂઆતમાં ફેસબુકની માલિકીની ત્રીજી એપ ફેસબુક મેસેન્જરે પણ આ યાદીમાં એન્ટ્રી મેળવી લીધી છે.
મેસેન્જર એપમાં એન્ડ-ટુ-એન્ડ એન્ક્રિપ્શન જેવી સુવિધા હજી નથી એ જોતાં તેની આટલી લોકપ્રિયતા નોંધપાત્ર છે.
