આપણે સૌ અવારનવાર આપણા ફોન માટે સિસ્ટમ અપડેટ કરવા વિશેનું નોટિફિકેશન મેળવતા હોઇએ છીએ. સામાન્ય રીતે આવું નોટિફિકેશન આપણા ફોનની મેન્યુફેકચરિંગ કંપની તરફથી આવતું હોય છે અને તેને ઇન્સ્ટોલ કરી લેવું હિતાવહ હોય છે.
પરંતુ હવે આ ઉપયોગી બાબતમાં પણ ચિંતાનો ઉમેરો થયો છે. હવે મળતી માહિતી અનુસાર ‘સિસ્ટમ અપડેટ’ નામે એક એન્ડ્રોઇડ એપ વિકસાવવામાં આવી છે અને જો આપણે તેના સકંજામાં આવીએ તો તે ફોનમાંનો આપણો લગભગ બધો ડેટા ચોરી શકે છે તથા આપણી ઓનલાઇન સર્ચ હિસ્ટ્રીની વિગતો પણ મેળવી શકે છે.
એ ખાસ નોંધવા જેવું છે કે આ જોખમી એપ ગૂગલ પ્લે સ્ટોર પરથી ડિસ્ટ્રિબ્યુટ થઈ રહી નથી એટલે જો તમે ગૂગલ પ્લે સ્ટોર સિવાય અન્ય કોઈ લિંક પરથી આવેલી એપ્સ ઇન્સ્ટોલ ન કરતા હો તો ખાસ ચિંતા કરવા જેવું નથી. મુશ્કેલી માત્ર એટલી છે કે આ એપ સિસ્ટમ અપડેટના નામે આપણી નજરમાં આવવાનો પ્રયાસ કરતી હોવાથી આપણે છેતરાઈ શકીએ છીએ. આથી જ્યારે પણ આપણને સિસ્ટમ અપડેટનું નોટિફિકેશન મળે ત્યારે તે આપણા ફોનની કંપની તરફથી હોવાની ખાતરી કર્યા પછી તેને ઇન્સ્ટોલ કરવા માટે આગળ વધવું અને અન્ય કોઈ પણ માધ્યમ જેમ કે ફેસબુક, વોટ્સએપ કે એસએમએસ દ્વારા સિસ્ટમ અપડેટ કરવા વિશે જણાવતી કોઈ લિંક મળે તો તેના પર ભરોસો મૂકવો નહીં.
