વોટ્સએપ પર મેસેજ મોકલતી વખતે, તેને ટાઇપ કરવાનો તમને કંટાળો આવે છે? ઘણા લોકોને આવતો હોય છે અને તેઓ એના ઉપાય તરીકે વોટ્સએપના વોઇસ મેસેજ ફીચરનો લાભ લેતા હોય છે. પરંતુ જેમને આ મેસેજ મળે તેમને માટે વાત થોડી અગવડભરી બને – ખાસ તો, તેમની પાસે હેડફોન ન હોય કે મીટિંગમાં બેઠા હોય ત્યારે બધાની વચ્ચે વોટ્સએપનો વોઇસ મેસેજ સાંભળી શકાય નહીં! વોઇસ મેસેજ ખાસ્સો લાંબો હોય અને તેના મુદ્દા સમજવા જરૂરી હોય ત્યારે પણ વોઇસ મેસેજ વારંવાર સાંભળવાની અગવડ વેઠવી પડે.

આના ઉપાય તરીકે, ‘વોઇસ ટ્રાન્સક્રિપ્શન’ની નવી સગવડ મળે તેવી શક્યતા છે. આ ફીચર અનુસાર વોટ્સએપમાં આપણને કોઈ વ્યક્તિ તરફથી ઓડિયો સ્વરૂપે મેસેજ મળે એ મેસેજને આપણે ઇચ્છીએ તો ટેકસ્ટમાં ફેરવી શકીશું. એ પછી, વીડિયોની ટ્રાન્સસ્ક્રીપ્ટની જેમ વોઇસ મેસેજ ટેક્સ્ટ સ્વરૂપે વાંચી શકાશે અને તેના જુદા જુદા તબક્કે સીધા પહોંચી પણ શકાશે!

સગવડ કામની છે, પણ અહીં વાત થોડી ગૂંચવણભરી બને છે. ઓડિયો મેસેજને ટેકસ્ટમાં ફેરવવા માટે તેને આપણા વોટ્સએપ એકાઉન્ટમાંથી કોઈ અન્ય જગ્યાએ મોકલવા પડે. એમ કરવા જતાં અત્યારે મેસેજ એન્ડ-ટુ-એન્ક્રિપ્ટેડ અને ખાનગી હોવાનો જે દાવો થાય છે તે એ ચોક્કસ મેસેજ પૂરતો ખોટો ઠરે. વોટ્સએપે આમાંથી વચલો રસ્તો શોધ્યો છે. હાલમાં આ ફીચર એપલની આઇઓએસ એપમાં ટેસ્ટ થઈ રહ્યું છે. એ અનુસાર આપણને કોઈ ઓડિયો મેસેજ મળશે ત્યારે વોટ્સએપ તરફથી એવું સૂચન કરવામાં આવશે કે તમે ઇચ્છો તો આ મેસેજને ઓડિયોમાંથી ટેકસ્ટમાં ફેરવી શકાય છે. એ સાથે વોટ્સએપ સ્પષ્ટતા કરશે કે એ મેસેજ એપલ કંપનીના સર્વરમાં મોકલવામાં આવશે અને ત્યાંથી ટેકસ્ટ ફોર્મમાં ફેરવાઇને આપણને પરત મોકલવામાં આવશે.

એટલે કે ઓડિયો મેસેજને ટેકસ્ટમાં ફેરવવાની પ્રક્રિયામાં વોટ્સએપની કે ફેસબુક કંપનીની કોઈ ભૂમિકા રહેશે નહીં. વહેલા મોડું આ ફીચર એન્ડ્રોઇડ એપમાં પણ રજૂ થશે તેમાં ગૂગલના સર્વર પર આપણને આવેલો વોઇસ મેસેજ મોકલવામાં આવશે. વોટ્સએપે એવી પણ સ્પષ્ટતા કરી છે કે આ ફીચર જ્યારે આવશે ત્યારે એન્ડ-ટુ-એન્ડ એન્ક્રિપ્શનનું ધ્યાન તો રાખવામાં આવશે જ, એ શક્ય નહીં હોય તો આ ફીચર આવશે નહીં!

દરમિયાન વોટ્સએપના બીજા એક ફીચરની પણ વાત કરી લઈએ. વોટ્સએપ પર હાલમાં સાત દિવસ પછી મેસેજ આપોઆપ ગાયબ થાય એ રીતે મેસેજ મોકલવાની સગવડ મળી છે. હવે પૂરા ૯૦ દિવસના લાંબા ગાળા પછી મેસેજ ગાયબ થાય એવું ફીચર પણ આવી રહ્યું છે. તમે જાણતા જ હશો કે હવે વોટ્સએપ પર માત્ર એકવાર જોઈ શકાય એ રીતે મેસેજ મોકલી શકાય છે. જોકે ૯૦ દિવસવાળું ફીચર આપણને ક્યારેય મળશે એ હજી સ્પષ્ટ નથી. વોટ્સએપ પર ઘણી વાર નવું ફીચર ટેસ્ટ થવાનું શરૂ થાય એ પછી આપણાં સુધી પહોંચે એ બંને વચ્ચે અઠવાડિયા તો ઠીક મહિનાઓ પણ વીતી જતા હોય છે.